හරිම ලස්සන මිනිස්සු

අපට ජිවිතේ දි හම්බුවෙන එක එක විදියේ මිනිස්සු ඉන්නවනෙ. එක එක මිනිස්සු ආස කරන දේවල් විවිධයි. අද මායි මල්ලියි අහම්බෙන් වගේ ගිය ගමනක් නිසා ඒ වගේ අමුතු සුන්දරත්වයකින් යුතු මිනිසෙක් අපට මුණ ගැහුණ. වෘතියෙන් ඔහු ගුරුවරයෙක්. මේ සුන්දර ගුරුවරයා අවුරුදු දෙකක් තිස්සේ අසාවෙන් ගොඩනගාගත්ත පතොක් පැල තවාන අපට දැකබලාගන්න අද අවස්ථාව ලැබුණ.

කවදාවත් අදුරගෙන නොඉඳපු අපි දෙන්නව ඔහු ඉතාම උණුසුම්ව පිළිගත්තා. "එන්න මම ඔක්කොම කියල දෙන්නම්". මීට කලින් මේ වගේ පැල හිමිකරුවෙක්ගෙන් අහන්න නොලැබුණ වචන පෙළක්. ඔහුගේ මුළු මිදුලම විවිධාකාරයේ පැළවලින් අලංකාර වෙලයි තිබුණේ. විශේෂය මේ ඔක්කොම ශුෂ්ක කලාපිය පැල.

ඉතා විශාල විදියට ඉදිකරන ලද කුටි දෙකකින් ඔහුගේ මිදුල ආවරණය වෙලා තිබුණා. පළමුවෙන්ම ඔහු කතා කරේ පවත්වාගෙන යන්න ඕන පාරිසරික තත්ත්ව ගැන. "ගොඩක් පැල මැරෙන්නෙ වතුර වැඩිවෙලා". කුඩා බඳුන් වල පැල හිටවන විදිය, ඒවා ක්‍රමයෙන් ලොකු බඳුන් වලට මාරු කරන විදිය, හැදෙන ලෙඩ රෝග, ඒවට මුණ දෙන හැටි මේ හැම දෙයක්ම ඔහු ස්වාකමත්තෙන්ම අපි එක්ක බෙදාහදා ගත්ත.

"මට ඕන ළමයිව මේ වගේ දේට උනන්දු කරවන්න"

ඔහු සතුව වර්ග රාශියකට අයත් පතොක්, Euphorbia සහ Aloevera වර්ග විශාල ප්‍රමාණයක් තිබුණ. මේක කෙනෙකුට සාමාන්යෙන් නොලබන අවස්ථාවක්. විදේශ රටවලින් ගෙන්වන ලද පැල, වෙනත් විශාල වගා කරුවන් සමඟ හුවමාරු කරගත් පැල, ඉතා විශාල මුදලකට මිලට ගත්ත පැල, බද්ද කිරීම මගින් සකස් කරගත් පැල, විවිධ විකෘති ප්‍රභේධ එකී මෙකී නොකී වර්ග රාශියක් මේ එකතුවේ තිබුණා.

මිනිස්සු අපූරු දේවල් වලට ආස කරනව කියල අහල තිබුනට මම ජිවිතේ කවම දාවත් මේ වගේ දෙයක් සියැසින් දැකල තිබුනේ නෑ. "මේ එකක්වත් මම විකුණන්න නෙවෙයි කරන්නෙ. මේක මගේ ආසාව. මේවට තමයි මගේ වෙලාව යන්නෙ"

ඉතාම ඉහල මිලට මිලදී ගත්ත පැල වර්ග ත් මේ තවානේ තිබුණ. උදාහරණයක් විදියට පහල තියන පැලය රුපියල් ලක්ෂයකට ආසන්නයි.

ඇත්තටම මේක හරිම අපුරු අත්දැකීමක් වුණා. කටු තියන කටු නැති, රවුම්, දිගටි, විශාල කුඩා පැල ගොඩක් මැද්දෙ හරිම නිහතමානී ගුරුවරයෙක්. ඔහු නිර්ලෝභීව බොහෝ දේ අපි එක්ක හුවමාරු කරගත්තා. රසම රස තේකක් හදල දීල කඩාහැලෙන මහා වැස්ස මැද අපව උණුසුම් කරන්න එතුමාගේ බිරිඳත් සහයෝගය ලබා දුන්න.

හරිම ලස්සන මිනිස්සු.

5% to SL-Charity