මෝඩයා! නැති කෙරුව මගෙ අගෝස්තුව

Source

අන්තිම මාලුවත් දැන් යට ගියා
ඌත් තියලා තිවුණා පණිවිඩය
යට ඉඳන් උඩට ආපු වතුර බුබුලක
දැන් බලා හිඳ පලක් නැති වග

ඌ මහ බොරුකාරයෙක්
ආයෙ එනවා මම
මේ කුඹුක් ගහ මුල පතහට
අපි හම්බවෙයි කවදහරි දවසක

මල්ලියේ.. තාත්තයි මායි පීනපු තරම
අගාදෙක උඹව හොයන්නට
තවම හැංගිලා නෙවද
නෙලුඹු දණ්ඩක් යට
දැන්වත් වරෙන් උඩට

මං ලබන අවුරුද්දෙත් එනව
ඉස්කෝලෙ නිවාඩුවේ ගමට
අමතක වෙන්නෙ කෝමද
මෝඩයා නැති කෙරුවා මගෙ අගෝස්තුව
හතලිස් අවුරුද්දකට උඩ
අපරාදෙ ඒ ඉස්කෝලෙ නිවාඩුව

ආය හැංගිමුත්තන් කරන් නෑමයි
මම කුඹුක මුල උඹ එක්ක!

මගේ ජීවිතේ ඇතුළෙ මං එක එක මිනිස්සුන්ගෙ එක එක විදියෙ කවි ගොඩාක් කියවලා තියෙනවා. කොච්චර සසල වුණත් ජනිත් විතාරණගෙ "අම්මා බලන්නට ගියෙමි" කවියයි, නුවන් ඉශාර මහගමගේ ගෙ මෙන්න මේ කවියයි දෙක මං දැක්ක දවසෙන් පස්සෙ කවදාවත් ගැලරියෙන් ඩිලීට් කලේ නෑ.

මේක තමයි මගෙ ජීවිතේදි මාව වඩාත් දුකට පත් කරපු කවිය. මේ ලියන වෙලේදිත් මගේ උගුරෙ මොනව හරි දෙයක් හිර වෙනවා වගේ දැනෙනවා. සමහර විට මං පුංචි බබාලට ගොඩාක් ආදරේ එක එක හේතුවක්. අනෙක මේ සිද්ධිය ලියලා තියෙන විදිය..

එක නිවාඩු කාලෙක අයියයි මල්ලී දෙන්නා යනවා සෙල්ලම් කරන්න. ගඟක් ළඟ කුඹුක් ගහකුත් තියෙන. හැංගිමුත්තන් කරනකොට මල්ලි ( එයා ගොඩාක් පොඩි ඇති) කුඹුක් ගහේ මුල් අස්සෙ හැංගෙනවා. අන්තිමේදි එයා ඒත් එක්කම තිබුණ ගඟේ කොයි විදියකට හරි ගිලිලා මැරෙනවා. සිද්ධිය වෙලා දැන් හතලිස් අවුරුද්දකටත් වැඩී! ඒත් අයියට ඒක අමතක වෙන්නෙ නෑ.

එයා කියනවා මල්ලියේ.. තාත්තයි මායි පීනපු තරම!තව තැනක තියෙනවා අපි කවදහරි දවසක හම්බවෙයි!හතලිස් අවුරුද්දකට පස්සෙත් අයියට අමතක වෙන්නෙ නෑ. සමහර වේදනාවල් එහෙමයි. සමහර තුවාල එහෙමයි.

මට දැනෙන විදියට ලොකුම වේදනාව තියෙන්නෙ මෙන්න මේ කොටසෙ.

මෝඩයා! නැති කෙරුවා මගෙ අගෝස්තු නිවාඩුව!
ආයෙ සෙල්ලම් කරන් නෑමයි කුඹුක මුල උඹ එක්ක!

අයියට දැනෙනවා අයියගෙ වරදකින් මල්ලි නැති වුණා වගේ හැඟීමක්. අවුරුදු හතලිහක් පුරාවට පස්සෙන් පන්නන පසුතැවීමක්! මේක දුකම දුක කවියක්. නුවන් ඉශාර මහගමගේ කියන්නෙ මට නම් මාරම කවියෙක්! මට මේ කවිය කවදා කියෙව්වත් දුකයි. හැඟීම උපරිමයි. මෙහෙම අත්දැකීමක් නැති වුණත් ඒක දනවන්න පුලුවන් එහෙම කවියෙක්ටම විතරයි!