He Changed My Entire World!

මේ දවස් වල මට විභාග. තවමත් විභාග වල එල්ලිලා ඉන්න සිද්ධ වෙන එකක් නම් දුකක් තමයි. ඒත් කරන්න වෙනවා. ඔය අතරෙ එකපාරටම මට එයාව මතක් වුණා. දවසක මිනිස්සුන්ට මුණගැහෙනවා තමන්ගෙ ලෝකෙ අනික් පැත්ත ගහන්න පුලුවන් මනුස්සයෙක් කියලා කතාවක් මං දැකලා තියෙනවා. මට ඒක ලිව්ව කෙනා මතක නෑ. ඒත් ඒක ඇත්ත. හොඳ පැත්තට හෝ නරක පැත්තට අපේ ලෝකෙ අනික් පැත්ත පෙරලන්න අපේ ජීවිත වලට එන අයට පුලුවන්.

ඉපදිලා ගෙදර අරන් ආව දවසෙ ඉඳන් මං එයාව දන්නවා. රතු පාටට අම්මගෙ අතේ හිටිය කලු වෙයි සමහරක් විට අත්තම්මලා අනාවැකි කිව්ව, අඬාගත්ත ගමන් හිටිය පොඩිම පොඩි කොලු පැටියෙක්ටත් මගෙ ලෝකෙ අනික් පැත්ත පෙරලන්න පුලුවන් කියලා කවදාවත් හිතලා තිබුණෙත් නෑ. එයාගෙ අම්මා නෑකමට මගෙ අක්කා කෙනෙක් වුණාට ඇත්තටම අපි දෙන්නා ඒ තරම් ළඟ අය නෙමෙයි.

සෙනිත නිවේන්.. අපේ ගෙදරට පල්ලෙහා ගෙදර හිටියෙ. මගෙ ආදරේ උදුරගෙන එයා ටික ටික ලොකු වුණා. පුංචි ළමයින්ට තමන්ට හදවතින් ආදරේ කරන අයව දැනෙනවා කියලා මං අහලා තියෙනවා. ඒ නිසා එයා මට ගොඩාක් ළං වුණාදත් හිතෙනවා. කතා කරන්න පුලුවන් වෙනකොට නැන්දේ කියාගෙන මාව හොයාගෙන එයාගෙ ආච්චි අම්මා එක්ක එන එයාගෙ පුංචි කටහඬ තාමත් හිතින්න අහන්න පුලුවන්.

පුංචි අත් දෙකින් මගෙ දොරට තට්ටු කරලා මාව උදේට ඇහැරවන්න එයා හැම උදේකම ආවා. ඒ දවස් වල මං කැම්පස් එකේ. ඔන්ලයින් ඉගෙන ගන්න කාලෙ. ඉතින් දොර වහන්න අමතක වෙන සමහර දවසට එයා ඇවිත් එයාගෙ පුංචි අත් වලින් අල්ලලා මාව අවදි කරගන්න හදනවා. ඒක ඔයාලට තේරෙයිද මං දන්නෙ නෑ. ඒත් ඒ තරම් පුංචි ජීවියෙක්ට මගෙ ලෝකෙ අනික් පැත්ත පෙරලන්න පුලුවන් වුණ එක ගැන සමහර දාට පුදුමයි.

මේ ලෝකෙ පුංචි බබාලා දිහා කුතුහලෙන් බලන්න ඉගෙන ගත්තෙ, ඒ සුන්දරත්වය දකින්න ඉගෙන ගත්තෙ එයාගෙන් කියලා අද මට හිතෙනවා. එයාගෙ පොඩි හිතින් දුන්න ආදරේ ඒ දවස් වල මාව සතුටින් පුරවලා තිබ්බා. එයාගෙ අහිංසකම අහිංසක වැඩ, අහිංසක සිතුවිලි ඒවා මැජික් වගේ. ඔයා නැතිව පාලුයි නැන්දෙ කියලා වචන අමුණ අමුණ කෝල් කරලා කියපු දවස් කියන්නෙ හොඳම දවස්!

හැම පොඩි ළමයෙක්ම වගේ එයත් අන්තිමේ ලොකු වුණා. ඒත් එක්කම මං දිගටම කොළඹ හිටියා සහ එයා එයාලගෙ අම්මලත් එක්ක වෙන ගෙදරක පදිංචියට ගියා. ඉතින් ඇත්තටම අපි ඈත් වුණා.

ඒත් මං එයා ලොකුම ලොකු වුණ දවසක කියන්නයි ඉන්නෙ එයා මගෙ ලෝකෙ වෙනස් කරපු හැටි! ඒකට මට මේ ආර්ටිකල් එකක් කොහෙත්ම මදි!