මැයි මාර ප්රසංගය!
සෙංකොට්ටන් ලියලා විශාල පාඨක ආදරයක් සහ අවදානයක් දිනාගත්ත මහින්ද ප්රසාද් මස් ඉඹුල මහත්තයගෙ අලුත්ම පොත මැයි මාර ප්රසංගය. ෆේස් බුකෙන් කියෙව්ව ලස්සන රිවීව්ස් සහ පොතේ යම් යම් කොටස් නිසා මේක කියවන්න ආසාවෙන් මම ඉන්නකොට මගේ උපන්දිනෙත් ආවා. ඉතින් birthday gifts අස්සෙ හැංගිලා මැයි මාර ප්රසංගය මගේ අතට ආවා. ඉතින් මුලින්ම කියලා ඉන්න ඕනෙ ඇත්තම හැඟීම. මං බලාපොරොත්තු වුණ මොකක් හරි දේ මේ පොතේ තිබ්බෙ නෑ. ඒත් ඒක ලස්සනයි!
සමහර විට මේ ගස ගැන කියන්නම ඔබ මෙහි ඇවිත් ගියා විය හැකිය! ඔව් එයා ආවෙ එහෙම වෙන්නත් පුලුවන්.
මේ කතාන්දරයට ජීවත් වන්නට මුලු අවකාශයම පුද කර මේ තුළින් මම සදහටම මිය යමි. එහෙත් මෙය කියවන ඔබ සැම මා වටේ ගැවසෙන්න. ගැවසි ගැවසි මගෙ ආදරය ඉවසන්න!
ඔක්කොටම වඩා ලස්සනයි කතාව පටන් ගන්න කලින් කියවන්න ලැබෙන මේ සටහන. ඒ ආදරය ඉවසගන්න නම් ඇත්තටම ටිකක් අමාරුයි.
එයාගෙ බාහිර විස්තර හොයන්නෙ නැතිවම ඉන්න මං උපරිම උත්සාහ කළා. මට නම ඕනෙ වුණේ නෑ. කාගෙ කවුද? ඉන්නෙ කොහෙද? දුප්පත්ද? පොහොසත්ද?කොච්චර ඉගෙන ගෙනද? කතා කරන්නෙ මොන භාශාවක්ද? කුලය-ආගම-ලග්නෙ මොකක්ද? කේන්දරේ කොහොමද? ඒවා එකක්වත් හොයන්න වෙහෙසන්න මට ඕනෙ වුණේ නෑ. ඒ එකම දෙයක් වත් දැනගෙන නෙමෙයිනෙ මගෙ හිතට එයාව දැනුණෙ
එයා මීදුමට ගොඩාක් ආස කළා. ඒ තරමටම ඉර එළියටත්!
ඇත්තටම සමිධ අයියා වගේ කෙනෙකුට මේ ලෝකෙ ඉඩක් තියෙනවද? එහෙමත් ආදරේ කරන්න පුලුවන්ද කියලා සමහර කෙනෙක්ට හිතෙන්න පුලුවන්. හරියටම මට වගේ. මේ ගහ කොළ, මැයි මාර මල් ගැන, මීදුම ගැන, බදුල්ලෙ තියෙන සුන්දරත්වය ගැන, කඳු වලට ඉර එළිය වැටුණම ලස්සන ගැන, මනුස්සයෙක්ගෙ හිතේ සොබාදහම කෙරේ පවතින්න පුලුවන් ආදරයට නිමාවක් නැති වග මේ කතාව කියෙව්වම ඔයාලට දැනගන්න ලැබේවි.
සියල්ල දත් ඔහුටයි
ඔහුගෙ මිහිරි බවටයි
නමක් නොදත් ඔබටයි
ඔබෙ නොදන්න කමටයි!
කතාව අවසානෙදි මේ පිදුම ඔයාලට තේරෙවි!