කෝච්චියේ ගිය ලස්සන ගමන |5% to SL Charity

ලස්සන ගමන් හැම එකක්ම දිග ගමන් නෙමෙයි. මං කියන්නෙ මරදානෙ ඉඳන් මොරටුවට යන එක වුණත් ජීවිත කාලයක් මතක හිටින සුන්දර ගමනක් වෙන්නත් පුලුවන්. වටින්නෙ ඒ මොහොතෙ කොච්චරක් සතුටින් හිටියද කියන එක. එහෙම නේද?

අද උදේම නැගිටලා බෝඩිමේ ඔක්කොම එක්ක මරදානට දුවලා කෝච්චියේ නැගලා මොරටුවට ගිය ගමනත් එහෙම එකක්. ගියේ කොහෙද කියලා වෙන දවසක ලියන්නම්. අද ඉරිදා දවස හින්දා හැමෝටම වාඩිවෙන්න ඉඩ තිබුණා. හැමෝටම කිව්වෙ බැච් එකේ එක්කෙනෙක් දෙන්නෙක් හැරුණම හැමෝම වගේ හිටිය නිසා. මගේ හොඳ යාලුවා එයාගෙ අයිනෙ සීට් එක මට දීලා දාන්න තරම් හොඳයි. එකපාරටම මුහුද!

ඒක කොච්චර ලස්සනද? මං ජනේලෙ ඇරගන්න ගොඩාක් පාරක් ට්‍රයි කරත් බැරි වුණා. ඒක බලන් හිටිය එහා පැත්තෙ වාඩි වෙලා හිටිය අන්කල් කෙනෙක් ඇවිත් ඒක ඇරලා දීලා ගියා. මුහුද හුළං එක්ක මුහුද ඇවිත් ඇඟේ වදිනකොට කොච්චර සනීපද? හිතට වගේම ඇඟටත්.

මේ දවස් වල මගේ ආසම සිංදුවයි තව කැමති සිංදු ටිකකට ඔහේ ප්ලේ වෙන්න ඇරලා ජනේලෙ අයිනට වෙලා මුහුද දිහා බලන් හිටිය එක තමයි ගමනෙන් වැඩි හරියක් කළේ.

මවුන්ට් ලැවීනියා පහු කරන් යනකොට ඉස්සරම දවස් මතක් වුණා. කැම්පස් එකේ ඉඳන් යාලුවෝ එක්ක මවුන්ට් ලැවීනියා ගිය දවස්. ආයෙ එන් නැති ලස්සන දවස්.

රේල් පාර අයිනෙ ගෙවල් පේළි දකිනකොට මං කල්පනා කරා හදිසියේ මට එහෙම ගෙයක ඉන්න වුණොත් කියලා. එයාලගෙ ජීවිත ඔය ටෙලි නාට්‍ය වල පෙන්නන විදියෙ ඒවමද නැත්නම් වෙනස් ද කියලත් හිතුණා.

ඒ කොහොම වුණත් ඒක ලස්සන ගමනක්. මුහුදයි හුළඟයි!❤