සංසාරික බැඳීම් ගැන |අසනඟ වැසි

"හමුවේවි.වෙන්වේවි.නිවන් දකින තාක්කල් මේ සංසාරේ සැරිසරනවා.මේ සංසාරේ දුක් ගැහැට අපමණ තිබුණත් අපි කැමතියි ආයෙම අපේම අය අතර ඉෙපදෙන්න.අපි ජීවිතේ අනන්තවත් මුමුණන්න ඇති අපි කැමති අය නැවත සංසාරේ මුණගැහෙන්න කියලා".
අසනඟ වැසි - (දර්ශනා ශම්මි විජේතිලක)

src

හද්දා පිටිසර කතරගං නුවර පරිසරයත් එක්ක ආදරය,මනුෂ්‍යයත්වය,සරල ගැමි ජීවන රටාව මෙන්ම නාගරික ජීවිතයේ බැඳීම් එක්ක හදවතට දැනෙන්න දිගහැරිය කලා කෘතියක් තමයි දර්ශනා මහත්මියගේ අසනඟ වැසි කියන්නේ.

කතරගං නුවර මුල් බැස ගත්ත ජීවිතයක් උරුම මට මේ කථාව හදවතට ගොඩක් ම සමීපව දැනුනා කීවොත් බොරු නෙවෙයි. පොත ගත්ත දිනේ ඉදන් මේ වෙනකන් දහ දොළොස් වතාවක් එක හුස්ම ට කියෙව්වෙ ඒ තරමට ආලත්ති අම්මා මගේ හදවතේ ජීවත් වෙලා ඉන්න නිසායි.අද කියෙව්වත් හෙට කියෙව්වත් හැමදාම නැවුම් රසයක් අරගෙන එන විදියට කතුවරිය පොත පෙළගස්වා තිබෙනවා.

සරල ගැමි ජීවන රටාවත් එක්ක ,මනුෂ්‍යයත්වයට මුල් තැන දීපු,රාජකාරිය දේවකාරිය කරගත්තු අවංක අහිංසක ගැමි ජීවිත වටා මොනතරම් දුක් කම්කටොලූ කරදර තිබුණත් ඒවායේ කටුක බව පවා හදවතට අමුතු ම හැඟීමක් ඇති වෙන ආකාරයට පෙළගස්සවන්න කතුවරිය සතුව පුදුම ඉවසිල්ලක් තියෙන්න ඇති.

බැඳීම් කියන්නේ සංසාරේන් සංසාරේ ට පතාගෙන එන දෙයක් කියලා මේ කථාවේ සුන්දර ව පෙන්නලා තිබෙනවා.බැඳීම් බරක්,නැවත හමුවීමක් එපා කියලා හිතුවත්,ඒ බැඳීම් වලට අපේ හදවතේ තියෙන ඉඩත් එක්ක අපි ඒවාට තව තව ඇලෙනවා.ගැලවෙලා යන්න හිත දෙන්නේ නැ.සංසාරේ පුරාවට සක්මන් කරනවා.

ගැමි ජීවන රටාව වටා මේ කථාව ගොඩනගලා තිබුණත් ආදරය,බැඳීම් කියන සාංසාරික පුරැද්ද ඉස්මතු කරලා කියලායි මට නම් හිතෙන්නෙ.බැඳීමක සුන්දරත්වය,ගැමි ජීවිතයක රසය කවදාවත් විදලා නැති කෙනෙක්ට මේ පොත කියෙව්වත් ඒ මිහිර හදවතින්ම විදගන්න පුඵවන් කියලා මට හිතෙනවා.ඒ තරමට හිත දැහැන් ගත වෙලා ආලත්ති අම්මා කෙනෙක් අපෙන් බිහි වෙනව කියලා හිතෙනවා. ආලත්ති අම්මාගේ සරල බව,ඉවසීම,නිහතමානී කම වගේම නොසැලෙන දහිරිය අද කාලයේ කාන්තාවන් ටත් ලොකු ආදර්ශයක්.

බැඳීම් දුකක් කියලා කිව්වත් කතුවරිය පොත අවසන් කරලා තියෙන්නෙත් තවත් බැඳීමකට මුල පුරලයි.ඒක තමා ලෝක ධර්මතාවය.ඉතින් අපිට කොයින්ද බැඳීම් වලින් ගැලවීමක්.