කම්මැලිකම 🥱

කම්මැලිකමේ ලියන්න දෙයක් ගැන හිත හිත ඉන්නකොට ලියන්න කියලා කිසිම දෙයක් මතක් වුනේ නෑ. ලියන්න දෙයක් ඇත්තෙත් නෑ. හැබැයි ලියන්න දේවල් නැත්තෙත් නෑ. ඒ උනාට ලියන්නේ මොනවා ගැනද කියලා හිතාගන්නත් බෑ. ඇයි එහෙම මටම වෙන්නේ ☹️ කියලා හිත හිත ඉන්නකොට මට හිතුනේ මේ ඔක්කොටම මුල මේ කම්මැලිකම කියලා. ඉතින් අන්තිමට ලියන්න දෙයක් නැති නිසා මට හිතුනා කම්මැලිකම ගැනම ලියනවා කියලා.

කම්මැලිකම කිව්වාම ඉස්සෙල්ලම මතක් වෙන්නේ මට නම් ඇද තමයි. කරන්න වැඩක් නැති වෙලාවට හරි වැඩ තිබිලත් කරන්න බෑ කියලා හිතෙන වෙලාවට කරන්නේ ඉතිං ඇදට වෙලා ෆෝන් එක ඔබ ඔබ ඉන්න එකනේ. කොරෝනා කලේ හැමෝම ගෙදරට වෙලා ඉන්නකොට ඒ කියන්නේ අපි ගෙවල් අස්සේ හිර වෙලා හිටපු කාලේ කරන්න දේවල් තිබ්බෙම නැනේ. කොරොනා මුල් කාලේ කාමරෙට වෙලා දවසේම ෆෝන් එකේ ඉන්නකොට නම් අම්මා කාමරේ ගාවින් යන සැරයක් ගානේ බනිනවා ගෙදර වැඩක්වත් කරනවා කියලා. හැබැයි ටික දවසක් යනකොට අම්මටම තේරුණා මේ ළමයි නිකන්ම ෆෝන් එක කඩාල කඩාල ඉන්නෙත් නෑ වැදගත් දේවලුත් කරනවා කියලා 😌

කොරෝනා දවස් වල ඇදට වෙලාම හිටපු එකේ ප්‍රතිඵල කොච්චර හොදයිද කියනවනම් අන්තිමට කොන්දේ අමාරුවකුත් හැදුණා ඇදේ එකම විදිහට ඉදලා. කොහොම හරි කොරොනත් ඉවර වෙලා මේ කාලේ වෙනකොට ඇගට කොහොමත් වැඩිය මහන්සි වෙලා වැඩ කරන්න බෑ කියලා දැනෙනවා. ඒ තරම්ම ඇග කම්මැලි වෙලා. ඉස්සර නම් හැමදාම හවසට ක්‍රිකට් ගහන නිසා හොඳට දාඩිය දාල මහන්සි වෙන නිසා හොද ෆිට් එකට හිටියා. ඒ උනාට දැන් හැමදේටම ඇග හොර වෙලා තමයි තියෙන්නේ.

මට වගේම මෙහෙම කම්මැලිකම ගැන තව කාට හරි මොනවා හරි හිතිලා තියෙනවද කියලා බලන්න මං නිකන් ෆේස්බුක් එකේ සර්ච් කරලා බැලුවා ඒ උනාට කම්මැලිකම ගැන එහෙම මොකුත් තිබ්බේ නෑ. එක හාමුදුරුවෝ නමක් නම් කම්මැලිකම ගැන කරපු බණ කතාවක කොටසක විඩියෝ එකක් තිබ්බා. ඒකේ ඒ හාමුදුරුවෝ නම් දේශනා කරන්නේ අපිට කම්මැලිකමක් දැනෙන වෙලාවට ඉස්සරහට කරන්න තියෙන වැඩ ගැන අවදානය යොමු කරන්න කියලා. අද දවසේ ඉවර කරන්න තියෙන වැඩ අදම ඉවර කරන්න කම්මැලියි කියලා හෙටට කල් දාන එකෙන් වෙන්නේ තවත් වැඩ ගොඩ ගැහෙන එක කියලා. එකෙන් වෙන්නේ අපි තව තවත් කම්මැලිවෙන එක.

ඒ නිසා කම්මැලිකම කියන්නේ ජිවිතේට එච්චර හොද දෙයක් නෙමෙයි. කම්මැලියි කියලා අපි වැඩ පස්සට දාන එකෙන් වෙන්නේ වැඩ ගොඩගැහිලා අන්තිමට කිසිම දෙයක් හරියට කරගන්න බැරි වෙන එක. දවසේ කම්මැලිකම නැති වෙන හොද පුරුද්දක් තමයි උදේම ඇහැරෙන එක. මට නම් උදේම ඇහැරුණු දවසට මාර් ෆ්‍රෙෂ් ගතියක් දැනෙනවා. එහෙම දවස් වලට දවසේ වැඩ ටිකත් හොදටම කරන්න පුලුවන්. අර මොකක් හරි සිංදුවක කැල්ලක් තියෙනවනේ,

"කම්මැලිවෙලා කොහොමද ලෝකේ ජය ගන්නේ🎶" කියලා.

දැන් මේක ලියලා ඉවර වෙනකොට හෙට ඉදන් අලුත් ජිවිතයක් පටන් ගන්නවා කියලා හෙනට ස්වයං මෝටිවේට් වෙලා ඉන්නේ මම 😎🤏