83 Movie - The Story of 1983 Cricket World Cup | 5% For SL-Charity

Source

ඔන්න අද කියන්න යන්නේ මම හුග දවසක ඉදන් ආසාවෙන් බලන්න හිටපු ෆිල්ම් එකක් ගැන. මේ ෆිල්ම් එක ක්‍රිඩාමය චිත්‍රපටියක් ලෙස තමයි නිකුත් වන්නේ. ඉතින් මේ ෆිල්ම් එකේ නම තමයි 83. ඒ කියන්නේ මේ ෆිල්ම් එකේ තියෙන්නේ 1983 දි ඉන්දියාව ඒගොල්ලන්ගේ පළවෙනි එක්දින ලෝක කුසලානය දිනපු කතාව. ඉන්දියාවේ හැම ක්‍රිඩා කතාවක වගේම මේ කතාවෙත් එයාලගේ දේශාභිමානය හොදින් ඉස්මතු කරලා පෙන්නවා.

මේ ෆිල්ම් එකේ ප්‍රධාන චරිතය නිරුපණය කරන්නේ රන්වීර් සිං. ඒ කපීල් දේව් ගේ චරිතය වෙනුවෙන්. කපිල් දේව් විදිහටම වගේ මේ කතාවේදි රන්වීර් සින්ව ඉතාමත් හොදින් වේශනිරූපණය කරලා තියෙනවා. ඒ වගේම කපිල් දේව්ගේ පෙම්වතියගේ චරිතය නිරූපණය කරන්නේ දිපිකා පදුකෝන් විසින්. ඒ වගේම දිපිකා මේ ෆිල්ම් එකට නිෂ්පාදනයෙනුත් දායක වෙලා තියෙනවා. විශේෂයෙන්ම කියන්න ඕනේ ඉන්දියානු කණ්ඩායමේ වගේම බටහිර ඉන්දියානු කණ්ඩායමේ හිටපු ක්‍රීඩකයන්ගේ චරිත ඒහා සමානව වගේ මේ චිත්‍රපටියේ හැඩගන්වලා තියෙනවා.

2021 දෙසැම්බර් 15 වෙනිදා තමයි මේ ෆිල්ම් එක සිනමාශාලා වලට නිකුත් වුනේ. Kabir Khan ගේ අධ්‍යක්ෂණය යටතේ නිමවුනු මේ චිත්‍රපටිය ඉන්දියානු රුපියල් කොටි 190කට අධික බොක්ස් ඔෆිස් වාර්තාවක් තැබිමටද සමත්වෙලා තියෙනවා. ඒ වගේම මේ ෆිල්ම් එක 7.5/10 IMDB අගයක් වගේම 85%ක ගූගල් පරිශීලක මනාපයක් ලබාගන්නත් සමත්වෙලා තියෙනවා.

පුහුණු තරගවලින් පසුව 1983දී ඉන්දියාව ලෝක කුසලාන තරගාවලියේදි පළවෙනි තරගය විදිහට මුහුණ දෙන්නේ බටහිර ඉන්දීය කොදෙව් කණ්ඩායම සමගයි. ඒ 1983 ජුනි 09 වෙනිදා, ඒ වන විට ලෝක ශූරයන් වූයේ ඔවුනුයි. ඉන්දියාව ඒ වන විටත් කිසිදු ලෝක කුසලාන තරගයක් ජයග්‍රහණය කර තිබුණේද නෑ. සුනිල් ගවස්කාර් සමගින් ක්‍රිෂ්ණමාචාරි ශ්‍රීකාන්ත් තමයි ඒ වන විට ඉන්දියාවේ ආරම්භක පිතිකරුවන් විදිහට පැමිණුනේ. බටහිර ඉන්දීය කණ්ඩායමේ විදුලිසැර වේගවන් පන්දු යවන්නන් හමුවේ ඉන්දිය පිතිකරුවන් දැඩි ලෙස අසරණ වුනා. එම ඉනිමේදි ඉන්දියාව වෙනුවෙන් සාර්ථක වුයේ ‍යශ්පාල් ශර්මා පමණයි. ඒ අනුව පන්දුවාර 60 අවසානයේදි ඉන්දියානු කණ්ඩායම ලකුණු 262ක් ලබාගැනිමට සමත් වුනා. වර්ෂාව නිසා ඒ තරගය දින දෙකක් පැවැත්වුනා. කෙසේ නමුත් ඉන්දිය විශිෂ්ට පන්දු යැවිම හමුවේ ලෝක ශූර කොදෙව්වන්ව ලකුණු 34කින් පරාජය කිරිමට ඔවුන් සමත් වුනා.

දෙවෙනි තරගය පැවැත්වුණේ 1983 ජුනි 11 වෙනිදා සිම්බාබ්වේ කණ්ඩායමට එරෙහිවයි. එම තරගය ඉන්දිය කණ්ඩායම කඩුළු 05කින් ජය ගැනිමට සමත් වුනා. ඒ තරගයේ වීරයා වුයේ මදන් ලාල්. ඒ වන විට පිට පිට තරග දෙකක් ජයගෙන ඉන්දීය කණ්ඩායම B කාණ්ඩයේ ප්‍රථම ස්ථානය ගෙන තිබුනා.

තුන්වෙනි තරගය පැවැත්වුණේ 1983 ජූනි 13 වෙනිදා ඔස්ට්‍රේලියාවට එරෙහිවයි. එම තරගයේදි ඔස්ට්‍රේලියානු කණ්ඩායම ඉන්දියාවට ලකුණු 321ක ඉලක්කයක් ලබාදුන්නා. සුනිල් ගවස්කාර්ද නොමැතිව සැකසුණු ඉන්දිය පිතිකරුවන්ට ඔස්ට්‍රේලියානු පන්දු යවන්නන් හමුවේ සාර්ථක වීමට හැකි වූයේ නෑ. ඒ අනුව ඔස්ට්‍රේලියාව එම තරගය ලකුණු 162කින් ජය ගැනිමට සමත් වුනා.

ඉන්දියාව මුහුණදුන් මීළඟ තරගය පැවැත්වුණේ කොදෙව්වන් සමගයි. එම තරගයේ ප්‍රථමයෙන් පන්දුවට පහර දුන් කොදෙව්වන් ලකුණු 282ක් ලබා ගැනිමට සමත් වුනා. ඒ වන විට ලෝකයේ හොදම පිතිකරුවා වූ Vivian Richards ලකුණු 119ක් ලබාගැනිමට සමත් වුනා. තරමක් ප්‍රවේගකාරි පන්දුයැවිමක නිරත වූ කොදෙව් පන්දු යවන්නන් පන්දුවෙන් පහර දෙන්නාක්මෙන් ඉන්දිය පිතිකරුවන්ට පන්දු යැවිම සිදුකලා. ඒ දිලිප් වෙන්ග්සර්කාර්ට දරුණු ලෙස තුවාල කිරිමත් සමගයි. එය මැහුම් හතක දරුණු තුවාලයක් වී තිබුනා. එම තරගය ඉන්දීය කණ්ඩායම ලකුණු 66කින් පරාජය වුනා.

මීළඟ තරගය ඉන්දියාවට අවසන් පූර්ව වටයට තේරිම සදහා වැදගත් තරගයක් වුනා. එය පැවැවුනේ 1983 ජූනි 18 වෙනිදා සිම්බාබ්වේ කණ්ඩායමට එරෙහිවයි. එම තරගය ලෝක වර්තාවකට හිමිකම් කියු තරගයක් වුනා. ඒ කපිල් දේව් විසින් නොදැවි ලකුණු 175ක් ලබාගනිමින්. එය ඒ වන විට පිතිකරුවෙක් රැස්කළ ඉහළම ලකුණු සංඛ්‍යාව වූවා.

ඒ අනුව අවසන් පූර්ව තරගයේදි එංගලන්ත කණ්ඩායම පරදවා ප්‍රථම වරට ලෝක කුසලාන තරගයක අවසන් මහා තරගයකට පිවිසීමට ඉන්දීය කණ්ඩායම සමත්වුණා.

ඒ අනුව අවසාන මහා තරගය පැවැත්වුණේ 1983 ජුනි 25 වෙනිදා ලොර්ඩ්ස් ක්‍රීඩාංගණයේදීයි. එම තරගයේදි කොදෙව් පන්දු යවන්නන් හමුවේ ඉන්දියානු කණ්ඩායම ලබාගත්තේ ලකුණු 183ක් පමණයි. නමුත් කපීල් දේව්ගේ දක්ෂ නායකත්වය ඉන්දියානු කණ්ඩායම 83 ලෝක ශූරයන් කරා රැගෙන ගියා.

ඇත්තටම මේ ලිපිය මේ තරම් දිග වුනේ 1983 ලෝක කුසලානයේ කතාව මට ඒ තරම්ම හිතට දැනුණ නිසයි.

ස්තුතියි.