අප්රේල් 13 - අවුරුද්දට කලින් දවස 🥱
දන්නෙම නැතුව 2022 වසරේ හතර වෙනි මාසෙටත් ඇවිල්ලා. ඒ කියන්නේ සිංහල හා හින්දු අලුත් අවුරුද්ද තියෙන අප්රේල් මාසේ තමයි මේ ගෙවෙන්නේ. හැබැයි මේ පාරත් අපිට අවුරුදු ගෙවන්න වෙලා තියෙන්නේ ප්රශ්න ගොඩාක් මැද. පසුගිය වසර දෙක කොරොනා වසංගතයෙන් පීඩා විදපු අපිට ඒ ගෙවුණු අවුරුදුත් ඒහැටි ලොකුවට සමරන්න උනේ නෑ. කොහොම හරි කොරෝනා පොඩ්ඩ පොඩ්ඩ ඉවර වෙලා මේ අවුරුද්ද ටිකක් හොඳට පටන් ගන්න කොට මිනිස්සුන්ට ඊට වඩා ලොකු ප්රශ්න ගොඩකට මුහුණ දෙන්න වුනා. ඒ තමයි ගෑස් ප්රශ්ණ, තෙල් ප්රශ්න, අහස උසට නගින බඩු මිල වගේම මේ අණ්ඩුවේ ප්රශ්නේ.
අනිත් කිසිම අවුරුද්දක වගේ කිසිම අලුත් අවුරුදු හැගිමක් මට නම් මේ අවුරුද්දේ දැනෙන්නේ නෑ. වෙනදා අවුරුදු කිව්වාම නම් එක එක විදිහට අවුරුදු වලට ලැස්ති වෙනවනේ. ඒ උනාට මේ පාර ඒ කිසිම දෙයක් නෑ. මේ අලුත් අවුරුද්දට අලුත් ඇඳුමක්වත් මම ගත්තේ නෑ. මේ රටේ මොනතරම් ප්රශ්න තිබුණත් මිනිසුන්ට තාමත් ඒක දැනිලා නෑ කියන එක මම දැක්කේ රෙදි කඩවල් දිහා බැලුවාම. ගොල්ෆේස් එකේවත් නැති තරම් සෙනඟ ඉන්නවා සමහර කඩවල් වල රෙදි පෝලිම් වල. වෙනදට අවුරුද්දට පත්තු කරන්න රතිඤ්ඤා ගෙනාවත් මේ පාර එකක්වත් මම ගෙනාවේ නෑ. ඇත්තටම මේ අවුරුද්ද කරන්න ඕනිවට කරනවා මිසක් කිසිම උමනාවක් මේ පාරනම් නෑ.
හරි කොහොම හරි මං කියන්න හදපු දේ කියන්න පටන් ගන්නම්කෝ. ඊයේ(13) කියන්නේ අවුරුද්දට කලින් දවසනේ. ඒ දවස ගත කරපු හැටි තමා මම මේ කියන්න යන්නේ. උදේ නැගිටලා කෑම කන ගමන් ෆිල්ම් එකක් බලන්න පටන් ගත්තා. ඒක කොහොම හරි බලලම ඉවර කරා අද.
මේ දවස් වල වැස්සත් තියෙන නිසා සමහර පලතුරු ගස්වල හොඳට ගෙඩි හැදිලා තියෙනවා. ඉතින් අපේ ගෙදර තියෙන පේර ගහේ ගෙඩි එහෙමත් හැදෙන්න පටන් ගෙන තියෙන්නේ. ඉතින් දවල් වරුවේ කලේ වැඩි හරියක් පේර කාපු එක තමා.
ඊයේ මං මාමලාට කියලා තිබ්බේ මේ පාර වෙනසකටත් එක්ක අපි කට්ටිය දොදොලක් හැදිගාමු කියලා. මාමලත් කැමති උනා ඒකට. ඉතින් හවස මාමා එන්න කියලා මම ගියා පොල් ටිකක් එහෙන් අරන් එන්න. ඉතිං එහේ ගියාම මට මීට කලින් නොබීපු බීමක් මාමා හදලා දුන්නා. ඒ තමයි නෙල්ලි කුඩු දාලා පානයක් එකක්. නෙල්ලි කනකොට එකේ රස වර්ග පහක් දැනෙනවා කියලා කියනවනේ. ඒ වගේම තමයි මේ නෙල්ලි පානය බොනකොට මටත් ඒ විවිධ රස දැනුණා. ඇත්තටම ඒක මරු බීමක්.
කොහොම හරි ඉතින් මම පොල් ටිකත් අරගෙන ආවා. ඊට පස්සේ ඉතින් අපි කට්ටිය එකතු වෙලා පොල් ගාලා අවශ්ය කරන අනෙකුත් දේවල් ටිකත් සකස් කරගෙන දොදොල් හැදිගාන්න පටන් ගත්තා. කොහොම හරි පැය එකහාමාරකින් වගේ අපි දොදොල් හදලා ඉවර කරා. ඇත්තටම ඒක හුගාක් රසට ආවා. සිනි පොඩ්ඩක් වැඩි වගේ දැනුනට හෙට ඒ ගතිය හරි යයි කියලා හිතනවා.
ඉතිං අවසානයේ මම ප්රාර්ථනා කරන්නේ ලක්වාසි සියලුම දෙනාට මේ වර්තමානයේ අපි සියලුම දෙනා මුහුණ දෙන ආර්ථික හා දේශපාලන ප්රශ්න ඉතාමත් ඉක්මනින් විසදිලා සියලුම දෙනාට සතුටින් ජිවත් වීමට හැකි වාසනාවන්ත සුබම සුබ අලුත් අවුරුද්දක් වෙන්න කියලා. ❤️
දොදොල් නම් දැක්කෙ වත් නෑ මේ පාර.
අපි හිතමු මේ ප්රශ්න ඉක්මනින්ම විසඳිලා රටට සුබ කාලයක් උදා වෙන්න කියලා.
ඔව් එහෙම වෙන්න කියලා ප්රාර්ථනා කරමු ❤️