Simply Let Them

මම ඔය පාඩම ඉගෙන ගත්තේ හරියටම කවදා ද කියලා කියන්න මට මතකයක් නෑ..

හැබැයි, වයසෙනුයි අත්දැකීම්වලිනුයි මුහුකුරා යන්න යන්න, මගේ ඔලුව ඇතුළේ නිදහස තියා ගන්න, මට ඔය "Let Them" පාඩම හරියට උදව් වුණා..

මේ ළඟදී ඒ සම්බන්ධයෙන් මෙල් රොබින්ස් කියන ප්‍රසිද්ධ ලේඛිකාව එයාගේ සමාජ මාධ්‍යය පිටුවක දාලා තිබිච්ච පුංචි පෝස්ට් එකක් නිසා, ඒ පාඩම ගැන ඔයාලා එක්ක බෙදා ගත්තොත් හොඳයි කියලා හිතුණා..

මම නම් ඒ පාඩම ඉගෙන ගත්තේ සෑහෙන අමාරුවෙන්..

එක පාරක් ඉගෙන ගත්තාට මොකද, ජීවිත කාලේ පුරාම, මට ඒ පාඩම ආයෙ ආයෙත් මතක් කර ගන්නත් සිද්ධ වෙනවා..

හැබැයි, එහෙම අමතක වෙන වාරයක් ගාණේ මතක් කර කර හරි, අපිට ඒ පාඩම දිනපතා පාවිච්චි කරන්න පුළුවන්!

මේකයි ඒ "Let Them" පාඩම..

ඉස්සර මම මිනිස්සුන්ව නැති කර ගන්න තියෙන අකැමැත්තට, එයාලාව දරාගෙන හිටියා..

"එයාලා ඇයි මට එහෙම කළේ?" කියලා විස්සෝප වුණා..
එහෙම විස්සෝප වෙවී, එයාලාව තේරුම් ගන්න උත්සාහ කළා..

කරන්න තියෙන වැඩ ඔක්කොමත් නතර කරගෙන, සති ගණන් කල්පනා කළා..

හැබැයි, කාලෙත් එක්ක මම තේරුම් ගත්තා, මම මිනිස්සුන්ව ළඟින් ආශ්‍රය කළාට, ආදරේ කළාට, උදව්පදව් කළාට, මගේ කියලා හිතාගෙන හිටියාට, ඒ සමහරු, මම ගැන ආපස්සට එහෙම හිතන්නේ නෑ කියලා..

එයාලා අපිට කිට්ටු වෙන්නේ, අපෙන් උදව්වක්, ප්‍රයෝජනයක් ගන්න විතරයි කියලා..

ඉතිං, අර හැමවෙලේම හැමෝවම තේරුම් ගන්න උත්සාහ කරන, හැමෝගෙම අත් වැරදීම් ඉවසන කෙනාගේ චරිතය තව දුරටත් රඟපාන එක මම නතර කරලා දැම්මා..

අම්මෝ... ඊට පස්සේ ඔලුවට දැනෙන සනීපේ!!

මේ වෙනකල් ජීවිතේ ඉගෙනගෙන තියෙන වටිනම පාඩම මොකද්ද කියලා කවුරු හරි මගෙන් ඇහුවොත්, ඒ "Let Them" පාඩම බව කියන්න මම දෙපාරක් හිතන්නේ නෑ..

මිනිස්සුන්ට,
ඔයාව වරදවා තේරුම් ගන්න ඉඩ දෙන්න..
ඔයාව විනිශ්චය කරන්න ඉඩ දෙන්න..
ඔයා එක්ක අවුල් යන්න, හිත් රිද්දවා ගන්න ඉඩ දෙන්න..
ඔයාව මග ඇරලා යන්න ඉඩ දෙන්න.. (ඕනේ ම නම්, එහෙම මග ඇරලා යන කෙනෙක් එක්ක බලෙන් ම පැනලා කතා කරලා, පොඩි ජොලියක් ගන්න..)

ඔයාව සැක කරන්න ඉඩ දෙන්න..
එයාලා හරි, ඔයා තමයි වැරදි කියලා කියන්න ඉඩ දෙන්න..
ඔයා ගැන කතා පතුරවන්න ඉඩ දෙන්න..
ඔයා එක්ක කතා නොකර ඉන්න ඉඩ දෙන්න..

ඔයා අරමයි, ඔයා මෙහෙමයි කියලා ඔයාගේ වැරදි කතා වෙන්න ඉඩ දෙන්න..
ඔයාට අකැමති වෙන්න ඉඩ දෙන්න..
ඔයාගේ මූණට බොරු කිය කියා, "බබා" වෙන්න ඉඩ දෙන්න..
ඔයා ගැන ඕපාදූප කතා වෙන්න ඉඩ දෙන්න..

ඔයා දුෂ්ටයි, නපුරුයි, ආත්මාර්ථකාමියි, අවස්ථාවාදීයි, කපටියි, පණ්ඩිතයි වගේ ඕනේ ම ලේබල් එකක් අළවන්න ඉඩ දෙන්න..

කොටින්ම, ඔයා ගැන ඕනේ විදියකට හිතා ගන්න ඉඩ දෙන්න..

ගොඩාක් මිනිස්සු ඔය දේවල් කරන්නේ, නොදැනුවත්ව නෙමෙයි..
එයාලා කරන දේ ගැන එයාලා හොඳට දන්නවා..

ඒත්, එයාලා එහෙම කරනවා..

ඉතිං, එහෙම දැන දැන ඔයාට රිද්දන මිනිස්සුන්ට ඒ දේවල් කරන්න ඉඩ දීලා, ඒ අය ගැන වද වෙන එක නතර කරන්න..

අවංකකමක් නැති තැන, අන්‍යොන්‍ය ගෞරවයක් නැති තැන, කරුණාවන්තබවක් නැති තැන, තමන්ගේ හැසිරීම ගැන වගකීමක් ගන්න තරම් පරිණතවීමක් නැති තැන, අධික මාන්නෙන් ඉන්න තැන, බොරු කියන තැන, ගැඹුරු මිනිස් සබඳතා රැඳෙන්නේ නෑ..

සමහර මිනිස්සුන්ට අපිත් එක්ක එහෙම ගැඹුරු සබඳතාවක් හදා ගන්න තරම් උවමනාවකුත් නෑ..

සමහරුන්ට ඒ දේ කරන්න ඕනේකමක් තිබුණත්, ඒකට ඕනේ බුද්ධිමත්බවයි හැකියාවයි නෑ..

ගොඩාක් මිනිස්සු අපිත් එක්ක සුහදව රැඳෙන්නේ, එයාලාට වාසියක් ලැබෙනතාක් කල් විතරයි..

ඉතිං, එහෙම මිනිස්සු එක්ක අපි කොච්චර උත්සාහ කළත්, අර්ථවත් සබඳතාවක් පවත්වන්න අමාරුයි..

හොඳම දේ, එයාලාට ඕනේ දෙයක් කර ගන්න කියලා, ඈත් වෙන එක!

කාටහරි කෙනෙක්ට අපේ සමීපතමයෙක් වෙන්න අපි අවස්ථාවක් දෙනවා කියන්නේ, අපි ඒ කෙනාට දෙන සුවිශේෂම වරප්‍රසාදයක්!

ඒ වටිනා වරප්‍රසාදය කවුරුම හරි අවභාවිතා කරනවා කියලා දැනුනොත්, ඒකට දෙන වටිනාකම ගැන ඔයා තෘප්තිමත් නැත්නම්, ඒ වරප්‍රසාදය ජීවිත කාලෙටම එයාලාට අහිමි කරලා දාන්න දෙපාරක් හිතන්න එපා!!

එහෙම මිනිස්සුන්ගෙන් ඈත් වෙද්දී, ඔයාගේ පැත්තෙන් කතාව කිය කියා ඉන්නවත් කරදර වෙන්න එපා..
එයාලාට ඕනේ දෙයක් හිතා ගන්න ඉඩ දීලා, අයින් වෙන්න..

එතැනින් එහාට, කිසිම විදියකට එයාලා ගැන හොයන්න කරදර වෙන්න එපා..

එයාලාට නැති වෙන්නේ, එයාලාට ආදරේ කරපු, එයාලාව තේරුම් ගන්න උත්සාහ කරපු, එයාලාගේ ඕනේම දේකට හිටපු අවංක මනුස්සයෙක්!

හැබැයි අපිට නැති වෙන්නේ, අපෙන් වාසි ගන්න බලාගෙන කිට්ටු වෙච්ච, අපේ කරෙන් ගොඩ ගියපු, වංක මනුස්සයෙක්!
එහෙමත් නැත්නම්, අපිත් නොදැනම අපිත් එක්ක තරග කරපු, අපිට ඊරිසියා කරපු කෙනෙක්!

රිදිච්ච මිනිස්සු, අනුන්ටත් රිද්දනවා..
නිවිච්ච මිනිස්සු, අනුන්වත් නිවනවා..

රිදිච්ච මිනිස්සු නිසා, ඔයාගේ සතුට නැති කර ගන්න එපා..

ආයෙත් මතක් කරනවා..

ඔයාට ළං වෙන්න, ඔයාව ආශ්‍රය කරන්න ඉඩ දෙන එක වරප්‍රසාදයක්!

කවුරුම හරි ඒ වරප්‍රසාදය අවභාවිතා කරන බව දැනෙනවා නම්, ඒ වරප්‍රසාදය දෙන එක එතැනින්ම නතර කරලා දාන්න..

එතැනින් එහාටත්, එයාලා එක එක දේවල් කරයි.
එක එක දේවල් කියයි..
එක එක දේවල් හිතයි..

ඉතිං, අපිට මොකෝ??

Simply, Let Them!