Harvesting

_Source

ඉතින් කොහොමද? . ඊයෙයි අදයි කියන්නෙ මට ටිකක් සතුටු හිතුන දවස් දෙකක්.ඒ මීට හරියටම අවුරුද්දකට කලින් කරපු දේක ප්‍රතිපලයක් ලැබුන නිසා. විභාගයක් පාස් උන එකක් එහෙම නෙවෙයි. මන් කියන්නම්කො මුල ඉදන් කතාව.

ගිය අවුරුද්දෙ නොවැම්බර් මාසෙ අන්තිම සතිය. මම උසස් පෙල ලිව්වෙත් ඒ කාලෙමයි. මට මතක විදිහට ඉංග්‍රීසි ලියල ඉවරයි. IT තමයි ඉතුරුවෙලා තිබ්බෙ. ඉතින් කොහොමහරි ඒ සතියේ එක්තරා දවසක අම්ම සූදානම් උනා ගෙදර එහේ මෙහේ හැදිල තියෙන කහ අල වලින් පැල කරන්න පුලුවන් තත්වෙ අල ටිකක් හොයල පොඩි වගාවක් දාන්න. හැබැයි නොවැම්බර් , දෙසැම්බර් කියන්නෙ අල වර්ග ගලවන කාලයක් මිසක් අල හිටවන කාලයක් නෙවේ. අල වර්ග හිටවන්න ඕන පෙබරවාරියේ,මාර්තු වගේ කාල වලදි. ඉතින් අපි ඒ ගැන වැඩිය හිතන්නෙ නැතුව වැඩේට ලේස්ති උනා. ඉතින් කොහොම හරි අම්ම වැඩේ මට බාර දුන්න. අම්ම කරේ අව්ශ්‍ය උපදෙස් දුන්න එක. හරියටම ගෙදර ඉස්සරහ තියෙන පොල් ගහ යට ලොකු මුල්ලුවකින් හොදට පස් බුරුල් කරා.

ඊට පස්සෙ අපි හොයාගත්ත කහ අල වල කද කොටස අයින් අයින් කරල අලේ කොටස ඉතුරු කරගත්තා. අල වර්ග හිටවන්න ඕන හවස.ඉතින් ඊට කලින් තමයි අපි මේ පෙර සූදානම් කටයුතු කරේ. ඊට පස්සෙ එදාම හවස මම පරිස්සමට අල ටික පොලොවට යට කරා. ඊට පස්සෙ වතුර ටිකක් එහෙම දාල වැඩේ ඉවර කරා. ඉතින් අම්මයි මායි දෙන්නම හිතුව සති කිහිපයක් යද්දි අල වලින් ගිරි ඒවි කියලා. කියන්න සන්තෝසයි ටික දවසක් යද්දි හිටවපු තැන් වල කූබිත් ගෙවල් හදන් හිටියා. ඉතින් ඔහොම මාසයක් දෙකක් බැලුවත් කිසි ප්‍රගතියක් තිබ්බෙ නෑ .ඒත් හරියටම මාර්තු මාසෙ වෙද්දි අපිව පුදුම කරවන්නත් එක්ක හිටවපු අල වලින් ගිරි උඩට ඇවිල්ල තිබ්බා. ඉතින් ඔහොම ඔහොම් හෙමින් හෙමින් සරුවට කහ පදුර හැදුනා. ලොකුම කරදරේ කරේ ගොලු බෙල්ල තමයි. ඌ කොලේ පොඩ්ඩ පොඩ්ඩ කාල තිබ්බත් ඒ වෙද්දි ඉතින් පදුර හොදට තිබුනා.

ඉතින් අල ගලවන්න ඕන කාලෙ දෙසැම්බර් නිසා අපි දෙසැම්බර් වෙනකන්ම හිටියා. ඉතින් අම්මයි මායි තීරනේ කරා අල ටික ගලවන්න. ඇත්තටම මම හිතුවෙ නෑ මහ අල ගොඩක් තියේවි කියලනම්. ඉතින් මම පලවෙනි පදුර ගැලෙව්ව. ඒක දැකල මම සෑහෙන පුදුම උනා. මම වැඩිය කියන්නෙ නැතුව ෆොටෝම දාන්නම්. ඉතින් මේ විදිහට මුලු කහ වගාවම ගැලෙව්ව. අම්මටත් පුදුමයි.ඉතින් අල ගලවන අතරෙ අම්ම කිව්වා "Al ලියල ඉද්දිත් හිතුවෙ නෑනෙ කැම්පස් යන්න පුලුවන් වෙයි කියල. අල හිටෙව්වමත් මෙහෙම අල තියේවි කියල හිතුවෙ නෑ නෙ.කොහොම හරි ඒ දෙකම හොද විදිහට උනා නේ අන්තිමට" කියලා. අම්ම කිව්ව කතාව ඇත්ත.

මම හිතාගෙන ආයෙ ඊලග මාර්තු මාසෙ මේ විදියටම කහ ටිකක් හිටවන්න. ඉතින් අද අත්තම්මයි තාත්තයි අල ටික වෙන් කරල හොදට හෝදල දුන්නා. ඉතින් තෙත ගතිය යන්න වේලල බර කිරල බැලුවා. අල කිලෝ 8 යි ග්‍රෑම් 200 ක් තිබුනා. මගෙ අතින් කරල මේ වගේ ඵලදාවක් ලැබුන එක ගැන මට පුදුම සතුටුයි. කහ කියන්නෙ ඉතින් ලංකාවෙ මිල අදිකම දෙයක් නෙ. කහ කුඩු ග්‍රෑම් 50 ක මිල රුපියල් 200 ත් 300 අතර වෙනස් වෙනවා. කහ කුඩු කිලෝ එකක මිල රුපියල් 5000 ත් 6000 ත් අතර වෙනව ඒ විදිහට බැලුවම. ඉතින් අපි බලමු මේ අල වේලල කුඩු කරල ගත්තම කොච්චර ඒවිද කියලා. එහෙනම් මගේ කහ කතාව ඉවරයි.අසා සිටි ඔබ සැමට තැන්කූ.