මහන්සිද පුංචී

අපේ ගෙදර කවුරු උනත් කොහේහරි ගිහින් ආවොත් අනිවාර්යෙන් පිස්සු කන්නට මොනාහරි ගේන්න ඕනි. නැත්තං බෑග් එක අදිනව. බොරුවට අඬනව. ලොකු දේවල් නෙවේ. ටොෆියක් උනත් ඇති එයාට.

මං උනත් කසාද බැඳල එනකම්ම අම්මයි තාත්තයි අයියයි කොහේ ගිහින් ආවත් මොනාද ගෙනාවෙ කියලනම් අහනවමයි. දැන් උනත් ගෙදර යන දවසට මං එයාලට අරන් යන දේවල්වලට වඩා එයාල මට ආපහු ගේන්න දේවල් හොයල හදල දෙනව.

ඉතින් මහන්සිවෙලා ගෙට ගොඩවෙනකොටම පිස්සු කන්න මොනාද ගෙනාවෙ කියල අහ අහ පස්සෙන් එද්දි මාත් ඉස්සර එහෙම කළා නේද කියල අමතක වෙලා මට තරහත් එනව.

"ඔහොම ආපු ගමන් මොනාද ගෙනාවෙ කියල අහල කරදර කරන්න එපා. මහන්සි වෙලානෙ එන්නෙ.ඔයාට ගානක්වත් නෑ අපිට මහන්සිද බඩගිනිද කියල. ගෙදර කාට උනත් එහෙම කරන්න එපා." මං කියනව.

මූණ අකුළගෙන මං දෙන දෙයක් අරන් පිස්සු කන්න යන්න යනව.

ඊළඟ දවසෙත් මං එනකං දොරකඩ ළඟ හිනාවෙවී ඉන්නව.

"පුංචී....ඔයාට මහන්සිද..."
"ඔයාට බඩගිනිද පුංචී..." පිස්සු කන්න මගෙ පස්සෙන් එන ගමන්ම අහිංසක විදිහට තාලෙට අහනව. මං හිනා යන්න ආවත් මහන්සියි කියනව.

මං කාමරේට ගිහින් බෑග් එක තියනව.

"හරිනෙ දැන් ඇහුවනෙ. ඉතින් ඔයා මට මොනාද ගෙනාවෙ පුංචී? "
පිස්සු කන්න අර තාලෙටම අහනව.