පුංචි ඔයා ගෙදර යන්න

චූටි කාලෙ ඉඳන්ම ගෙදර හැමෝගෙම අතේ හුරතල් වෙවී ඉද්දි එයාගෙ බාප්පව කසාද බැඳල එයාගෙ ගෙදරට ගියපු මාව එයා පිළිගත්තෙ ටිකක් අමුතු විදිහට... එයාට සතුටුයි.ඒත් බාප්ප දැන් එයාට ආදරේ නෑ කියල ටිකක් අවුලෙන් හිටියෙ. කවුරුත් නැති වෙලාවට රහසින් මට ගෙදර යන්න කියල එහෙමත් කිව්ව. එයාට පිස්සු කන්න කියල නම දැම්මෙත් එයාගෙ බාප්පම තමයි. (බාප්ප නිතරම ඔරිජිනල් පිස්සු කන්නගෙ වීඩියෝ බලන නිසා වෙන්න ඇති.) හැබැයි පිස්සු කන්න දන්නෙ නෑ එයාට එහෙම කියනව කියල නම්.

පිස්සු කන්න රෑට කාමරේට ආවම යන්නැති නිසා මං කාමරේ දොර වහගෙන ඉන්නව.

"පුංචී....... දොර අරින්නකෝ...."
ඒක තමයි ලෝකෙ තියෙන අහිංසකම කටහඬ.
මං දොයි.. මං කියනව.
"අනේ පුංචී... දොර අරින්නකෝ..." පිස්සු කන්නට කෙඳිරි ගෑවෙනව.
"බෑ ඔයා ආවම යන්නෑනෙ."
"අනේ චුට්ටක් ඉඳල යන්නම්කෝ... අනේ... "

පිස්සු කන්න අඬන්නෙ බොරුවට කියල දැන දැනත් මං දොර අරිනකොට මෙන්න හිනාවෙලා කාමරේට එනව.

සෙල්ලම් කරන්න බැරිම තැන මං නිදි වගේ ඉන්නව.

"අනේ.. නිදාගන්න එපා. අපි මොකක්හරි කරමුකෝ.." පිස්සු කන්න කියනව.

"දැන් ගොඩක් රෑ වෙලානෙ.. ඔයා හෙට ඉස්කෝලෙ යන්නත් ඕනිනෙ. ඔයත් ගිහින් දත් මැදල දොයියගන්න". මං ඇස් පියාගෙනම ආදරෙන් කියනව.

"එහෙනං ඔයා හෙටම ගෙදර යන්න". පිස්සු කන්නගෙ යකා ඇහැරෙනව. පාර හිටින්න කොනිත්තනව. ෂීට් එක බිම දානව. කොට්ටෙ ඇදල ගන්නව. මං එකක් ගහනව. මං ගැහුව කියල එයාට රිදෙන්නෙ එහෙම නෑ. මට රිදුන්නෑනේ කියල කොලොප්පං කරන්නත් එනව. (ඔයා එදා ගහපු එක මට රිදුන කියල වෙන දවසක කියනව)

"ඉන්නකෝ මං තාත්තට කියනව ඔයා මට ගහනව කියල". මං ඇඳෙන් නැගිටිනව.

"එපා....." පිස්සු කන්න රතු වෙලා කෑ ගහනව.

"ඔයා සෙල්ලං කරන්නැත්තං මං දොර වහගෙන එලියට යනව හැබැයි". පිස්සු කන්න මාව බය කරනව.

"අනේ එපා... දොර වහගෙන නම් යන්න එපා"... මං බය වෙලා වගේ කියනව.

එයා දොර වහගෙන යනව. මං ලයිට් ඕෆ් කරල ඇඳට වෙලා ඉන්නව.

"අනේ අපි සෙල්ලං කරමුකෝ..." පිස්සු කන්න තාත්ත ළඟට ගිහින් කියනව. තාත්ත එක්ක හිනාවෙවී සෙල්ලම් කරනවත් මට ඇහෙනව.
තාත්තට කෝල් එකක් එනව. පිස්සු කන්න අම්ම ළඟට යනව. අම්ම පිස්සු කන්නව දත් මදින්න එක්කං යනව. පස්සෙ පස්සෙ කියල කල් දානකොට නම් අම්ම බනිනව. පිස්සු කන්න බාත් රූම් එකේ අඬනව. අම්ම වොෂ් දාගෙන එනකං බාත් රූම් එක ළඟට වෙලා හොටු හූර හූර ඉන්න පිස්සු කන්න හෙමීට හෙමීට මං ඉන්න කාමරේ දොර ළඟට එනව.

"පුංචී......." කියල රහාසින් කියනව.

මට දුක හිතුනත් මං සද්ද නැතුව ඉන්නව.

"ඔයා තනියම සෙල්ලං කරන්නකො". ගෙදර හැමෝම එක එක වැඩ වල ඉද්දි පිස්සු කන්නට එහෙම කියනව. අම්මත් කියනව. තාත්තත් කියනව. කිරි අම්මයි සීයයිත් කියනව. මායි බාප්පයිත් කියනව.

"මට සුරංගනාවියක්වත් නෑනෙ සෙල්ලං කරන්න." පිස්සු කන්න දවසක් මාත් එක්ක කියනව මට මතක් වෙනව. "ඇයි ඔය ඉන්නෙ ශානිකා එහෙම.. නදීකා එහෙම.. "(ඒ එයාගෙ බෝනික්කො. ) මං කියනව.

"එයාල කතා කරන්නෑනෙ.. මට ඕනි කතා කරන එක්කෙනෙක් එක්ක සෙල්ලං කරන්න පුංචී..." එහෙම කියල පිස්සු කන්න බිම බලාගෙන ඉන්නව.

"අනේ අපි චුට්ටක් සෙල්ලං කරමුකෝ"... මට හීනෙනුත් ඇහෙනව.