|Steemit Enagement Challenge ||💚||Season2, Week #1 ||💚|| 🛫🌏 Your travel manager ✈ Dünyanın mərkəzi Qəbələ |#club5050

Axşamınız xeyir. Əvvəlcə nəhayət bizim topluluğun da bir müsabiqədə ev sahibliyi etdiyi üçün çox sevindiyimi bildirim. Mən Azərbaycanın Qəbələ rayonunda yaşayıram. Bu gün Qəbələ haqqında yazacağam. Qəbələnin tarixi çox qədimdi, hətta Qafqaz Albaniyasının dövrlərinə gedib çıxır. Mən bu postda tarixə çox da toxunmayacağam, çünki əlimdə bununla bağlı rəsmlər yoxdu. Mən bu günün Qəbələsindən danışmaq istəyirəm. Bu gün Qəbələ yalnız Azərbaycanda deyil, Qafqaz zonasında məşhur olan turizm mərkəzlərindən biridi. Hər il minlərlə turist Qəbələnin gözəl təbiətindən, dadlı təamlarından, büllur bulaqlarından feyziyab olur. Rayonumuzun ən sevilən istirahət mərkəzlətindən biri də Qəbələnd istirahət mərkəzidir. Uşaqların sevimli məkanı. Əgər ailənizdə kiçik yaşlı uşaqlarınız varsa, LUNAPARKA mütləq gəlməlisiniz.

Bu yol sizi düz rayonun yuxarı hissəsinə aparıb uşaqların və böyüklərin sevimli məkanı olan lunaparka çıxaracaq. Burada müxtəlif əyləncə növləri var. Kanatdan tutmuş, toqquşan maşınlara, şeytan çarxından tutmuş tərsinə evə qədər. Kompakt şəkildə uşaq və böyüklərin əylənə biləcəyi ən ideal məkandı. Mövsüm boyunca burada yaxından və uzaqdan gəlmiş çoxlu sayda turistlər görə bilərsiniz.

Deməliyəm ki, parkın tikilməsinə xeyli vəsait sərf olunub. Hardasa 10 ildən çoxdur ki, yerli insanlara və turistlərə xidmət edir. Ümumiyyətlə, rayonun kənd başı deyilən hissəsi son 10 ildə öz simasını tamamilə dəyişib. O uzaqdan gördüyünüz Tufandağ kanat kompleksidi. Düzdür, mənim yüksəklik fobiyam olduğu üçün minməmişəm, amma deyilənə görə, möhtəşəm bir gəzintidi. Dağın başında da milli və dünya mətbəxinin ən dadlı yeməkləri qonaqlara təqdim edilir.

Qayıdaq lunaparka. Əyləncə mərkəzi təzadlıdı. Karusellərdə əylənən insanları səs - küyü və eyni zamanda sakit, hüzur dolu ara küçələr. Gül çiçəyin gözəlliyi də adamı bihuş edir. Başdan ayağa təmiz hava, oksigen deposudu. Hələ küçənin ortasında çəkilmiş labirintə baxın. Yaşından asılı olmayaraq bütün keçənləri cəlb eləyir.

Deməliyəm ki, yayda insanların ən çox ehtiyacı olan nemət sudur. Həm içməyə, həm sərinləməyə. Bizim inşaat mühəndisləri onu da düşünüblər. Düz parkın ortasında onu uzununa kəsən bir göl var ki, üstündə çoxlu sayda körpülər var..İstəsəniz, suyun kənarında oturub gölə tamaşa edə bilərsiniz, ayaqlarınızı suya sallayıb sərinlənə də bilərsiniz, hətta göldə kiçik qayıqlarla səyahət də edə bilərsiniz.

Və sonda demək istəyirəm ki, bu Qəbələnin gözəl məkanlarından yalnız biridi. Qafqazda ən böyük tikililərdən biri olan konqres zalı, beş ulduzlu otellər, muzeylər, tarixi məkanlar, çox şık restoranlar, kafelər və bunlara aparan şüşə kimi asfalt yollar. Qəbələyə gəlin, istirahətinizi bizə etibar edin. Peşman olmayacaqsınız. Mən sonda bu müsabiqədə iştirak etmək üçün @revan746 və @gulaybagirzade yə səslənirəm. Gəlin, mən deməyənləri də siz deyin. Oxuduğunuz üçün təşəkkürlər 🖐️
@urcah.com