Əzəmət

Son bir ayda xeyirli səbəbdən Azərbaycanın bir neçə rayonunda oldum. Vallah kim nə deyir desin. Qəbələ kimi gözəlini görmədim. İstəyirsiniz bunu yerlibazlıq kimi qəbul edin, istəyirsiniz etməyin. Həqiqətən çox gözəldi. Dünən Qəbələnin ən gözəl yerlərindən birində olduq. Möhtəşəm konqres zalının qarşısından keçdik.

Yalançı mən olmayım, deyilənə görə yaşadığımız coğrafi məkanın (bir az Avropa, bir azdan çox Asiya) ən böyük və əzəmətli konqres zalıdır. Zala gedən yolun üstündə körpü var.

Yadımdadı, bir dəfə demişdim ki, əcəb intihar etməli körpüdü:)
Zalın yerləşdiyi yer o qədər uyğun seçilib ki, sanki insan əməyinin bəhrəsi ilə təbiətin gözəlliyinin sintezi ezackar bir mənzərə yaradıb. Zalın tikintisində türk inşaat briqadası iştirak edirdi. Deməli, həmin briqadanın yeməklə təmin edilməsinə yerli əhalidən adamlar cəlb edilmişdi. Bizim qohumlardan da orada işləyən qadınlar vardı. Bir dəfə bir məzəli əhvalat danışırdılar. Deməli, abilər acı souslu yeməklər sevirlər. Bizim mətbəxlə abilərin mətbəxi arasında əməlli başlı fərq var. Deməli, bir dəfə abilərin yeməyi bir az kəm olub, bizimkilər də bilməyiblər neynəsinlər. Əl altda da xeyli dana ciyəri olubmuş. Götürüb bu dana ciyərini bizim üsulla içinə də kartof qatıb qızardıblar. Türk abilərə servis ediblər. Əsl olay bundan sonra yaşanıb. Yemək qonaqların o qədər xoşuna gəlib ki, əlavə istəyiblər. Qadın söhbət edir ki, ondan sonra yeməklərdə həm türk , həm Azərbaycan mətbəxinin ən gözəl təamlarından istifadə etdik. Dünən konqres zalının qarşısından keçəndə bu hadisə yadıma düşdü. İnsanlar bu gözəlliyə ürəklərini qoyublar, odur ki, belə gözəlliyi yaradıblar😊

P. S. Şəkillər axşam çəkilib 😊