Mineralogiya muzeyi-ADNSU

Salam, Steemit Azerbaijan ailəsi. Sizi Azərbaycan Dövlət Neft və Sənaye Universitetinin daxilində yerləşən Mineralogiya muzeyi ilə tanış etmək istəyirəm.

Buranın varlığını öyrənir-öyrənməz vaxt itirmədim və baş çəkdim.Muzey Geoloji Kəşfiyyat fakültəsində yerləşir və direktoru ADNSU-nun “Faydalı qazıntı yataqlarının geologiyası və işlənməsi ” kafedrasının dosenti Ağamehdi Ağayevdir. İçəri girən zaman məni gülərüzlü Arzu xanım qarşıladı. Arzu xanım muzeydə fəaliyyət göstərir, eyni zamanda tələbələrə dərs deyir. Məni də muzey haqqında əlavə məlumatlandırdığı üçün təşəkkür edirəm.

Belə ki, Mineralogiya muzeyi 1920-ci ildə Azərbaycan Sənaye Universitetinin Geoloji-kəşfiyyat fakultəsində təşkil edilmiş mineralogiya kabinetinin bazasında yaradılmışdır. 2017-ci ildə Azərbaycan Respublikasının Turizm və Mədəniyyət Nazirliyi tərəfindən kabinetə muzey statusu verilmişdir. Muzeyin mineral ehtiyatı 6400 nümunədən və 350-yə yaxın mineral növündən ibarətdir.Və Arzu xanımın dediyinə görə Qafqazın mineralla ən zəngin muzeyi bura imiş. İçəri olduqca geniş və maraqlı idi.

Muzeydə Boliviyadan Yaponiyaya ,Qrenlandiyadan Cənubi Afrikaya kimi coğrafi ərazini əhatə edən ölkələrdən minerallar var. Hətta bəzi ölkələrdən hədiyyə olaraq göndərilmiş minerallar da vardır ki, onları şəkillərini buraya yerləşdirəcəm. Təbii ki, ölkə daxilindən də gətirilmiş minerallar da var idi.Bəzilərinin adı hələ təyin edilmədiyindən onlar ayrıca olaraq qoyulmuşdu, adları müəyyən edildikdən sonra isə digərləri kimi vitrinə yerləşdiriləcək.

Hər zaman sadəcə adını eşitdiyim mineralları əyani şəkildə görmək mənim üçün çox maraqlı idi. Məncə, universitetin də tələbələri bu fürsətdən yararlanaraq oraya baş çəkib, həm məlumatlanmalı, həm də oranı görməlidirlər.😊Oxuduğunuz üçün təşəkkürlər, mənimlə ADNSU'nu kəşf etməyə davam :)