Steemit tələbə təqaüd proqramına START dedik ...

Öz hekayəmlə və tələbə həyatımla postlara davam edəcəyəm. Adım artıq bildiyiniz kimi Gülşəndir. 18 yaşım var. 553 balla keçən il, 2020 - ci ildə tələbə adını qazanmışam.

Keçmiş ADNA - Neft Akademiyası, indiki ADNSU - nun 2-ci kurs tələbəsiyəm. O universitet ki, binanın içində dörd divar gəzə gəzə səkkiz dəfə "kruq" vurduqdan sonra axtardığın otaqı güc bəla ilə tapırsan... :)
İxtisasım kimya mühəndisliyidir. Əlavə olaraq bildirim ki, həm də Sabah tələbəsiyəm. Bildiyiniz kimi Sabah qruplarına qəbul xüsusi imtahan və müsahibə mərhələləri vasitəsilə, 2 etapdan ibarət olur. Bununla da tələbələr seçilir, ümumi bir qrupa toplanır və xüsusi təlim, treyninq keçmiş müəllimlər tərəfindən dərslərlə ən yeni standartlar əsasında tədris edilir. Hələ ki, yeni başlamışıq. Sevdiyim bir neçə məqam artıq var və bunlar haqqında da zaman zaman yazacağam.

Hətta qeyd edim ki, Steemit platformasını da yeni qrup yoldaşım - Aybəniz vasitəsilə kəşf etmişəm 😊

Universitet dərsləri ilə paralel olaraq hər gün ən azı 10-15 səhifə bədii mütaliəyə yer ayırmağa çalışıram. Bu düşünürəm ki, insanı həm az müddətlik də olsa stressdən, əlavə qayğılardan uzaqlaşdırır, həm də dünyagörüşü, psixoloji, mental sağlamlığında öz izini qoyur. Sənədli filmlər izləməyi, ümumiyyətlə mənə maraqlı gələn istənilən bir mövzu haqqında araşdırma aparmağı sevirəm.

Bizlər birinci kursu online tədris formatında başa vurmuş tələbələrik. Bu səbəbdən keçən il heç bir formada laboratoriya dərslərində iştirak edə bilməmişdik. İxtisasım tətbiq gərəkli olduğundan dolayı yeni tədris ilində laboratoriya dərslərində iştirak məni çox sevindirir.

Postu sona qədər oxudunuzsa əgər təşəkkür edirəm. Ümid edirəm ki, tələbə həyatından qısaca danışa bildim. Növbəti postlarda eyni mövzu altında, silsilə şəkildə davam etməyə çalışacağam.

Hələlik, Steemit ailəsi.