Beberapa Bait "Hikayat Prang Sabi"

Ainul Mardhiyah that sambinoe
Diyub langet nyo tan seunabe
Hanjeuet sikali tangieng muka
Laye mata lazat beurahi

Jingieng baklon kheem teuseunyom
Bibi ranom sang bintang pari
Sira jikheun puteh lumat
Wahe dosyah manyoh kami

Kamo nyoe dum darabaro prang
Preh cut abang ateuh keurusi
Nyoe keuh bulueng geubri le Allah
Badai payah yoh lam nanggri

Entreuk taeh ngon lon sapat
Meuchen lon that keusuami
Meunan jikheun puteh lumat
Suara mangat na ban bangsi

Keuluah roh ngon seumangat
Manyoh lazat ngon beurahi
Badan lon nyoe miseue geumpa
Han ek saba he ya Saidi

Lon tajo le lon keumeung wa
Pojroh rupa lom jikheuen kri
He tengku cut bungong keumbee
Piyoh dile payong nanggri

Cit siat treuk troh bak watee
Riwang dilee bak Prang Sabi

Pinto syeuruga bandum teuhah
Suroh Allah neuyue buka
Soe nyang syahid that meutuah
jipo pantaih lam syeuruga

Jak he tengku bak prang kaphe
Bek taiem le po bentara
Aneuk ngon judo bek sayangle
Rabbul Qade nyang peulara

Taprang kaphe fardhu ain
Beuta yakin geutanyoe dumna
Meunan hadis Saidil Mursalin
Muhammad Amin peulita donya

Sidroe mate kaphe tapoh
Meuligoe jroh Tuhan janji
Sititik darah nyang na tijoh
Hana gadoh disisi rabbi

Ainul Mardhiyah Tuhan pulang
Darabaro prang lam meuligoe
Nyan keuh judo muda seudang
Pahlawan prang peutheuen nanggroe

Troh sambinoe jak theun jaroe
Baro samlakoe reubah meugule
Oh trok lam leumueng po sambino
Nyawong geutanyoe jiteubit le.