G30S Himapol 'Peutroh Haba Rakyat'

Assalamualaikom Warahmatullah,Pujoe keu Allah yang maha esa

Kamoe HIMAPOL katrok meulangkah,Kamoe neuk peugah padum2 krek haba

Wahee Wakil lon yang ka geulantik,Nyopat kamoe dari ilmu Politik

Bek neutuwee janji yang ka lupah,Bek neukubah rakyat yang apoh apah

Yoh Masa dile rakyat neujanji kupi,neujanji gari neubri honda astrea

Bek yoh kageulantik rakyat hana le neuturi,Hana le meukri yang pileh gata

Mulai jinoe mandat rakyat bri, bek neu ingkari wahee anggota DPRA

Neu guna beu get demi kepentingan negri, bek neujak korupsi neu ba yah-yah wa

Dana otsus meruah pusat jok, neupike hai atok keu bangun bangsa

Saket hatee rakyat nyee neusak lam plok, neusak lam pacok bagi bagi rupia

Triliun rupia peng hile u Aceh, neu pike hai syeh keu kaom duafa

Fasilitas publik neu atoe beu bereh, beu meusaheh duson sampoe u kuta

Jinoe ureng droe hudep ka mangat, gaji ka mupat tiep-tiep tanggai sa

Bek neutuwee ureng droe wakil rakyat, kamoe mahasiswa kerja beu mupat

Droe neuh neuduek lam rumoh meugah, moto cukop mewah merek toyota

Adak kamoe meujak pinto beu nepeuhah, ie saboh glah hana kamoe me saka

Harapan rakyat beutrok ban hajat, eh ka mupat pajoh ka meumada

Kamoe rakyat hana meulakee jioh that, nanggroe aman Alhamdulillah rayek that

Anggaran u gampong beutrok u Camat, ta neu ubat saket hana le dikira

Biaya sikula pree sampoe an tamat, meunan meuhat rakyat jelata

Cuma oh noe haba kamoe rakyat, haba peu ingat keu DPRA

Neu pike beu get neu telaah cermat, kamoe rakyat meupreh buet nyata.

Sp.5 Banda Aceh 30/9/2014 | Moment Pelantikan DPRA