Kusina ni Nanay Romeskie | Adobong Sitaw

_Source

Magandang araw! Mataas na ang araw kaya kailangan na namang kumilos. Pinaikot ko na ang mga labahin kaya pwede nang maghanda ng tanghalian habang naglalaba. Ang ulam natin ngayon ay walang iba kundi Adobong Sitaw!

Sunod-sunod na araw na baboy at manok ang pinagpapalit-palitan kong ulam kaya ngayong linggo, mag-gugulay tayo!

Tara na't magluto!

Mga Sangkap

1. Sitaw
   Putul-putulin nang may habang isa-t kalahati o dalawang pulgada.

1. Baboy
   Pang sahog lang. Hiwain nang maliliit.

1. Sibuyas
   Hiwain nang maliliit.

1. Bawang
   Pitpitin at tadtarin

2. Toyo
   Kaunti lang nito. Huwag sosobra. Matuto sa nakaraang pagkakamali.

3. Suka
   Kalahati lang ng dami ng toyo.

4. Tubig
   Isang tasa lang. Para may sabaw kahit papaano.

5. Paminta, Patis/asin, malunggay powder

Paraan ng pagluluto

1. Painitin kawali bago ilagay ang mantika
2. Kapag mainit nanrin ang mantika, ilagay ang sibuyas
3. Kapag maputla na ang kulay ng sibuyas, isunod na ang bawang. Samyuhin ang amoy ng ginigisang sibuyas at bawang. Ang sarap, ano? Huwag mong sunugin, igisa mo lang nang maigi.
4. Isunod ang baboy. Gisahing maigi hanggang sa maputi na ang bawat gilid nito.
5. Isunod ang sitaw. Igisa rin para kumapit din dito ang lasa ng ginisang sibuyas at bawang. Huwag lang masyadong haluin nang sobra dahil malalamog ang gulay. Lahat ng sobra ay masama kaya makuntento sa sapat-sapat lang.
6. Lagyan ng 1/8 tasang toyo. Kung nakukulangan ka, pwede mong dagdagan pero kaunti lang. Huwag trigger-happy para hindi uliy maging matapang ang pagkakaluto.
7. Natandaan mo ba kung gaano karami yung toyong idinagdag mo? Kalahati nun ang dami ng suka na ilalagay mo. Hindi gaanong sitaw kaya kontian mo lang ang suka, anak.
8. Lagyan ng paminta.
9. Kung nakukulangan ka pa sa alat, lagyan ng kaunting patis o asin. Hinay-hinay lang sa maaalat at masama sa kalusugan ang masyadong maalat.
10. Lagyan ng Malunggay powder.

Mabilis lang ang pagluto ng Adobong Sitaw. Huwag mong masyadong tagalan dahil magiging masyadong malambot ang gulay. Kapag naman kulang sa oras ang pagkakaluto ay medyo malutong ang gulay na parang hindi naluto. Kaya tantiyahing maigi ang oras. Kumuha ng isang pirasong sitaw sa niluluto para matingnan kung kuntento ka na ba sa pagkakaluto nito. At tandaan, mababang apoy lang dapat ang gamitin lalo na kapag gulay ang iniluluto para hindi agad malamog.

Komento ng hurado:

Maraming nakaing kanin ang anak ko ngayon at talaga namang nanghingi pa ng dagdag. Mukhang hindi matapang ang luto ko.

Si Tatay Ritsard naman ay nalungkot. Kasi naparami na naman daw ang kain niya. Ako nama'y tuwang tuwa. Hehe

Bukas gulay ulit ang lulutuin sa Kusina ni nanay Romeskie.

Laging tandaan, ubusin ang gulay para lahat tayo'y hayahay.

---

Maraming salamat sa pagbabasa!

---

Pagyamanin ang kakayanan sa pagsusulat ng tagalog na akda. Sundan si @tagalogtrail at makigulo sa Tambayan

---

Sundan din ang @steemph.manila at tayo ay magkulitan sa Discord

---