စေတန်ရဲ့သားတော် အပိုင်း(၁၅)

စေတန်ရဲ့သားတော်
အပိုင်း(၁၅): ဧဒင်ဥယျာဉ်ကပန်းသီး
#####################

ညကတော့ ပတ်ဝန်းကျင်ကြည့်လိုက်ရင် ပုံမှန်ညတွေအတိုင်းသာ အရာအားလုံးက တိတ်ဆိတ်ငြိမ်သက်လျက်ရှိနေသော်လည်း မဟာရာဇ်ရွာသားများကတော့ မိမိတို့နေရာအိမ်တွေထဲမှာ မအိပ်နိုင်ကြသေးဘဲ တီးတိုးတီးတိုးနှင့်ပင် အိမ်ထဲမှာ စိုးရိမ်ပူဆွေးလျက်အချင်းချင်း တိုင်ပင်နေကြသလို အချို့ကတော့ အထုပ်အပိုးများကို လုံခြုံစွာသိမ်းလျက် ကိစ္စတစ်ခုခုဖြစ်လျင် အမြန်ထွက်ပြေးနိုင်ရန် ပြင်ဆင်လျက်ရှိကြလေ၏ ။ အသိပေးခေါင်းလောင်းသံကလည်း မဟာရာဇ်စံတော်ချိန် တစ်ချိန်ပြီးတစ်ချိန်မြည်နေလျက်ရှိပြီး ထိုခေါင်းလောင်းသံကိုယ်တိုင်ကိုက ခြောက်ကပ်အက်ကွဲနေသယောင်ပင် . . .။ ညဥ့်က ပိုနက်လာလေလေ မနက်ခင်းရောက်ဖို့ အချိန်နီးလာလေလေ တီးတိုးတိုင်ပင်သံများ အချို့အိမ်များမှ အော်ဟစ်ငိုယိုသံများ အချို့အိမ်တို့မှလည်း ရွာပြင်သို့ထွက်ခွာရန်ပြင်ဆင်မှုများ ပိုမိုများပြားလာပြီးနောက် တစ်ရွာလုံးမှာ လှုပ်လှုပ်ရှားရှားနှင့် ဖြစ်လာသည်။ အားလုံးကသာ ထိတ်လန့်နေကြသော်လည်း ယခုအချိန်ထိတော့ မီရာ့စိတ်က ဘယ်လိုမှမရှိသေး။ ဖြူစင်သောအဖြူထည်လေးသပ်သပ်အဖြစ်ပင်ရှိနေသလို သူမ ရွာရဲ့ဟိုးချောင်ဘေးတစ်နေရာမှာ အိပ်နေတော့ ရွာထဲက လှုပ်လှုပ်ရွရွသံများကို ဘာမှ သေချာမကြားရဘဲ ယခုထိပင် အိပ်ပျော်နေဆဲပင်ဖြစ်၏ ။ မီရာ့နားထဲမှာတော့ မဟာရာဇ်မှမဟုတ်သော အသံတို့ကိုကြားနေရသည်။ ထိုအသံမှာ သူမအာရုံထဲမှ အသံလေးသပ်သပ်ပင်ဖြစ်သည်။ ဒီအသံက တီဂေါလ်ကအသံမဟုတ်ပေမယ့် ဘယ်ကအသံမှန်းတော့ မီရာသေချာမသိပါ။ အသံတို့က မီရာ့အာရုံထဲမှာ ပဲ့တင်ရိုက်ရင်းရိုက်ရင်းနှင့် အချိန်ကြာလာတော့ တဖြည်းဖြည်းနှင့်ပီပြင်လာလေသည်။
"ဒါကိုစားမှဖြစ်မှာလား . . . အာဒံ . . .၊ ဒါက ဘုရားသခင်တားမြစ်ထားတဲ့ ပန်းသီးဆိုတာကို ရှင်သိရဲ့လား . . . "
"ဧဝ . . . မင်းသေချာကြည့်ပါဦး . . .ဧဒင်ဥယျာဉ်ကြီးက ဒီလောက်လှပပြီး သာယာနာပျော်ဖွယ်သိပ်ကောင်းတာ . . . ဒီက တားမြစ်ထားတယ်ဆိုတာက ဒါစားလိုက်ရင်တန်ခိုးတွေ အရမ်းကြီးသွားမှာစိုးလို့တားမြစ်ထားတာဖြစ်မှာပေါ့ . . . ကဲပါ . . . သုံးဆောင်ကြရအောင်နော် . . .ကဲ မင်းအရင်စား . . ."
"အို . . ကျွန်မတစ်ယောက်တည်းတော့ အရင်မစားနိုင်ပါဘူး အာဒံ . . .၊ ဒါဆို ရှင်နဲ့ကျွန်မနဲ့အတူတူစားကြမယ်လေ . . . "
မီရာ့ အတွေးအာရုံထဲမှာ စကားပြောသံများခဏငြိမ်သက်သွားပြီး ပန်းသီးကိုက်နေသော အသံများကိုသာ တီးတိုးလေးကြားနေရလေသည်။ ပြီးနောက်တွင်တော့ -
"အားးး . . . ငါ့လည်ပင်းမှာဘာကြီးလဲ . . . တစ်ခုခုတစ်သွားပြီ. . . "
"အာဒံ . . ရှင့် . . ရှင့်လည်ပင်းမှာ ပန်းသီးစေ့ တစ်, နေတာနဲ့တူတယ် . . အစေ့လေးတစ်စေ့ ထွက်လာတယ် . . ."
"အားး . . . ဘုရားသခင်တားမြစ်ခဲ့တာ ဒါကြောင့်ပေလား . . .ဒါနဲ့ ဧဝ မင်းကကော ဘာမှမဖြစ်ဘူးလား . ."
"ဟုတ်တယ် . . ပန်းသီးက ကျွန်မကိုယ်ထဲကို လျှောလျှောရှုရှုဝင်သွား . . . . .အားးး . . အာဒံ . . .ကျွန်မဗိုက်တွေအရမ်းနာနေပြီ . . .ဟယ် . . သွေး . . သွေး . . ကျွန်မအောက်မှာ သွေးတွေသွန်နေပြီ . . .ဘုရားသခင်ရဲ့စကားကို နားမထောင်မိတာမှားပြီထင်တယ် . . ."
မီရာ့အာရုံထဲမှာ စကားသံနှစ်ခုလုံးက အသံတဖြည်းဖြည်းနှင့်ပြန်လည်တိုးညှင်းသွားပြီးနောက် လေတိုက်သံကဲ့သို့ တဝူးဝူး တဝေါဝေါအသံများကိုကြားလာရပြီးနောက် လေတိုက်သံများကြားထဲမှ စေတန့်အသံဟု ရာနှုန်းပြည့်ယူဆရသောအသံတစ်ခု လေတိုက်သံထဲမှာတိုးဝှေ့ကပ်ပါလို့လာသည်။
"ဟားဟားဟား . . . . ကမ္ဘာဂြိုဟ်ကလူသားတွေရဲ့နိမိတ်ဆိုးတွေနဲ့ အချစ်တွေရောက်လာပြီ။ ပန်းသီးအပိုင်းအစဟာ အာဒံမှစ ကျိန်စာသင့်အမျိုးသားတိုင်းရဲ့ လည်ပင်းမှာတစ် နေစေပြီး လည်စေ့အဖြစ်နဲ့တည်ရှိနေရလိမ့်မယ် . . .ဒီလိုပဲ ဧဝမှစကာ ပန်းသီးဟာ ခန္ဓာကိုယ်ထဲလျှောရှုစွာဝင်လျက် အပိုင်းအစနှစ်ခုကွဲကာ ဝမ်းဗိုက်ရဲ့ ဘယ်ညာ အောက်တစ်ဖက်တစ်ချက်စီမှာ မမျိုးဥ (Ovary) အဖြစ်နဲ့တည်ရှိနေပြီး သူနဲ့ သွေးနှောမယ့်သူကို စောင့်မျှော်နေရလိမ့်မယ်။ တစ်လတိုင်လို့ သွေးနှောမယ့်သူမလာပါက မျိုးဥကိုယ်တိုင်သွေးအဖြစ်အရည်ပျော်ပြီး သွေးစီးဆင်းစေရတော့မယ် . . . ဒါက တစ်ကြိမ်သာက မှာမဟုတ်ပါဘူး . . . တစ်လကြာတိုင်း တစ်လကြာတိုင်း ဒီအပိုင်းအစဟာ ပြန်လည်မွေးဖွားပြီး ပြန်လည်သွေးစီးဆင်းစေရလိမ့်မယ် . . . ဒါကို ရာသီလာခြင်းအဖြစ်သတ်မှတ်လိမ့်မယ် . . .
ဒါ့အပြင် ကမ္ဘာဂြိုဟ်သူဂြိုဟ်သားတွေအားလုံး အိုနာသေခြင်းကို မလွဲမသေရင်ဆိုင်ရပြီး ဒီကိစ္စပြီးနောက်ပိုင်း ရောဂါဘယတွေတိုးပွားလာရလိမ့်မယ် . .
ဟားဟားဟားဟား . . .ဟားဟားဟားဟား . . .
ဒီနေ့ကစပြီး တီဂေါလ်အာဏာလည်း ကမ္ဘာမှာမရှိစေရတော့ဘူး . . . ."
လေသံများက ပိုမိုပြီး ဖုံးလွှမ်းရင်းဖုံးလွှမ်းရင်းနှင့် နောက်ဆုံးမှာတော့ တိတ်ဆိတ်သွားပါတော့သည်။ ဖြတ်ခနဲရုတ်တရက် တိတ်ဆိတ်ခြင်းနဲ့အတူ မီရာ့မျက်လုံးကိုဖွင့်ကြည့်လိုက်တော့ မဟာရာဇ်မှာ မိုးတောင်စင်စင်လင်းနေချေုပြီ . . .။
"အိပ်မက်ကိုး . . . . ဘာပဲဖြစ်ဖြစ် စေတန် ကောက်ကျစ်တာက ကောက်ကျစ်တာပဲ . . သူ့ကိုသတိထားနေရမယ် . .ဒီရက်ပိုင်း သူ့လုပ်ပုံတွေကအရမ်းထူးဆန်းနေတယ် . . ."
ဟုသာပြောရင်း မိမိကိုယ်ကို သတိပေးလိုက်မိသည်။ ထို့နောက် -
"ဟာ . . . ငါ halo နှစ်ခုပဲလိုတော့တာပဲ . . ."
ဟုပြောရင်း မဟာရာဇ်တွင်းသို့ သုတ်ခြေတင်ပြေးသွားပါတော့သည်။
× × × × × × × × × × ×
"ဧဒင်ဥယျာဉ်ထဲကပန်းသီး . . .ကမ္ဘာမြေက အချစ်ရှိတဲ့နေရာမှာပဲပေါက်တဲ့ သော်ကပန်း . . . အချစ်ကို ကိုယ်စားပြုတဲ့ စွယ်တော်ရွက်. . . ."
စေတန်က ပန်းသီး သော်ကပန်းနှင့် စွယ်တော်ရွက်တို့ကို တစ်ခုချင်းစီ စီထားရင်း လက်ညှိုးထိုး ရေတွက်လျက်ရှိသည်။ အိုင်းစတိုင်းက စေတန့်အမူအရာကို ကြည့်ရင်းနှင့်မေးလိုက်သည်။
"ခမည်းတော် ဒါတွေကဘာတွေလဲ . . . ."
"ဒါတွေက အချစ်ဆိုတာကို ကိုယ်စားပြုတဲ့ အရာတွေပဲ သားတော် . . . ."
"ဒါနဲ့ . . . ဒီနေ့ မီရာ့ရဲ့ ၁၆ နှစ်ပြည့်မွေးနေ့မဟုတ်လား. . .သူဖျက်စီးတော့မှာလား ခမည်းတော် . . ."
စေတန်ကတော့ အခန့်ညားဆုံးဖြစ်အောင် ပြုံးလိုက်ရင်း တိကျပြတ်သားစွာပင်ပြန်ဖြေလိုက်သည်။
"အာဒံနဲ့ ဧဝ ပန်းသီးစားခဲ့သလိုသာ မီရာတစ်ယောက် အရာသုံးခုရဲ့ဝါးမြိုမှုကိုခံရရင်ပေါ့လေ . . ."
"အဲ့ဒါတွေက ဘာတွေများပါလဲခမည်းတော် . . ."
"တီဂေါလ် . . . .
portalနဲ့
အလင်းနှုတ်ဘူံအလွှာတို့ပါပဲ သားတော် . . ."
"သားတော်ကို အလင်းနှုတ်ဘုံအလွှာအကြောင်း ခမည်းတော်ဒီနေ့ပြောပြမယ်ပြောထားတယ်နော် . . ."
"ဒါပေါ့ . . . ဒါပေမယ့်အချိန်မကျသေးဘူး သားတော် . . . မကြာမီ ပြောပြတာထက်သားတော်ကိုယ်တိုင် . . ."
စေတန့်စကားမဆုံးခင်မှာပင် ခန်းမဆောင်ကြီးအတွင်းသို့ အစိမ်းရောင်အလင်းတန်းများဝင်လာပြီးနောက် ဗိမာနယာဉ်က သူတို့အပေါ်မှ ဝဲကာပျံလျက်ရှိနေတော့သည်။ ထိုအပေါ်မှ နတ်သမီးတစ်ပါးက အောက်သို့အော်ပြောလိုက်သည်။
"စေတန် . . . ရှင်တို့အဖွဲ့သားတွေ မီရာ့ကို ပထမဆုံးအကြိမ် တီဂေါလ်ပို့ပေးလိုက်တဲ့ portalတံခါးဝကို ချက်ချင်း ကိုယ်ယောင်ပြထုတ်ပေးပါ
. .။ အားလုံးမပြီးဆုံးသေးခင်အချိန်မီသေးတယ်နော် . . . "
စေတန်က ရုတ်တရက် အပေါ်သို့ ဆက်ခနဲမော့ကြည့်လိုက်ပြီးနောက် နတ်သမီးကိုမြင်သောအခါ တည်ငြိမ်စွာရွဲ့ပြုံးပြန်ပြုံးလိုက်ပြီး ပြန်ပြောလိုက်သည်။
"ဘာတွေလာမေးနေတာလဲ . . . သွားစမ်းပါ . . . ငါ့မှာ မင်းလိုမျိုး စတုမဟာရာဇ်နဲ့ အသူရာ သွေးနှောထားတဲ့ သွေးနှောမျိုးမစစ်နတ်သမီးတွေနဲ့ ပြောဖို့အချိန်မရဘူး . ."
"ရှင် လက်လွတ်စပယ်မပြောပါနဲ့ . . . တာဝတိံ သာဘုံနဲ့ အသူရာတို့ မတည့်ကြဘူးဆိုပေမယ့် တာဝတိံသာအောက်က စတုမဟာရာဇ်နဲ့ အသူရာပြည် သွေးနှောတာဟာ ဘာများအပြစ်ဖြစ်သွားပါသလဲ . . .ထားလိုက်ပါ . . . ကျွန်မကို အသာထား ကျွန်မအခု ဗုဒ္ဓဘာသာဘုန်းကြီးတစ်ပါးကို ပင့်လာခဲ့တယ်. . . .
ဘုန်းဘုန်းဘုရား ခဏကြွတော်မူပါ . . ."
ရှင်ပညောဘာသ က ဗိမာနယာဉ်အရှေ့သို့ထွက်လာပြီး အိုင်းစတိုင်းတို့ရှိရာအောက်သို့ ငုံ့ကြည့်လိုက်လေသည်။ စေတန်ကတော့ အိုင်းစတိုင်းကိုကြည့်ပြီးနောက် ပြောလိုက်သည်။
"အိုင်းစတိုင်း မင်းသေချာကြည့်စမ်း . . . ဟိုးပေါ်က သစ်ခေါက်ဆိုးရောင်သင်္ကန်းကိုရုံထားတဲ့ပုဂ္ဂိုလ်က မင်းရင်ဆိုင်ရမယ့် ဂေါတမဘုရားရဲ့တရားတော်တွေ သယ်ဆောင်လာသူပဲ . . .
မင်းဒီပုဂ္ဂိုလ်နဲ့ သူမျှဝေနေတဲ့ တရားတွေကို ဆန့်ကျင်ရမယ် . . . ."
အိုင်းစတိုင်းက စေတန့်စကားအတိုင်း သူ့အပေါ်တွင်ရှိနေသော ရှင်ပညောဘာသကိုမော့ကြည့်လိုက်သလို ရှင်ပညောဘာသကလည်း အိုင်းစတိုင်းကို ကြည့်ရင်း အာမေဋိတ်တစ်ခုကိုသာ အောက်ပါအတိုင်းသာ ရေရွတ်လိုက်မိပါတော့သည်။

"ပရမတ္တအမှုန်ကနေ ပြန်လည်မွေးဖွားလာတဲ့ အိုင်းစတိုင်းလက်သစ် . . . . ."
အိုင်းစတိုင်းကလည်း ရှင်ပညောဘာသကို ကြည့်ကာ သူဟုတ်မှန်ကြောင်း ထောက်ခံသည့် သဘောဖြင့် ခေါင်းကိုညိတ်ကာ ပြုံးပြလိုက်ပါတော့သည် . . .။

အပိုင်း(၁၆)ကိုစောင့်မျှော်ဖတ်ရှုကြပါရန်။

Own Feeling @ 2016 by
ကာရှိုင်း (ကြယ်စင်ချစ်သူ)

@AuroKarshine