Mənim son hobbim.

Həmişə müxtəlif hobbilərim olub. Son dəfə üç ay əvvəl dərziliyi öyrənmək qərarına gəldim. Şəhərimizdəki dərzilik kurslarından birinə yazıldım. Kursa bir ay getdikdən sonra başa düşdüm ki, kursda istədiyimi öyrənə bilməyəcəyəm. Çünki kursdakı müəllimə bizə yalnız həndəsə dərsindəki kimi çertyoj çəkdirirdi. Odur ki, kursdan çıxdım.

Proffesional bir dərzinin yanına gedib ondan öyrənməyə başladım. Həftədə iki dəfə onun yanına gedirəm və bir neçə saat məşğul oluruq.
Dərziliyə həvəsim həmişə olub, keçən qış anam mənə paltartikən maşın hədiyyə etdi. Bundan sonra düşündüm ki, tikməyi öyrənməliyəm.

Dərslərə başlayanda bəzi şeylər almalı oldum. Rəngli saplar, düymələr, parçalar və.s. Amma tikmək çox maraqlıdır və məni gündən günə daha çox cəlb edir.

Bunun bir neçə səbəbi var. Birincisi odur ki, mən gözəl geyinməyi sevirəm. Tikməyi öyrənəndən sonra özümə fərqli geyimlər tikəcəm. Beləliklə də geyimə qənaət edə və fərqli görünə bilərəm.
Tikmək insana səbirli olmağı öyrədir, əsəbləri sakitləşdirir. Öz tikdiyin geyimi geyinəndə inanılmaz zövq alırsan və özünə güvənin artır.
Bəzən aldığımız bir geyim əynimizə kiçik ya da böyük olur. Dərzilikdən bir az başı çıxan qadın istənilən paltarı ölçüsünə görə dəyişə bilər.

Mən özümə müxtəlif paltarlar tikirəm, düzdü hamısı hələ əla alınmasa da bəziləri heç də pis deyil. Paltarların hamısı tam hazır olmadığına görə şəkillərini çəkmədim. Bu haqda daha bir yazı yazıb şəkillərlə paylaşaram.
Tam olmasa da nəyisə bir az öyrənmək insana nə vaxtsa lazım ola bilər. Ona görə də vaxt olduqca bacardığımız qədər nələrisə öyrənək.