أسوأ 9 ممثلين في رمضان 2017
يوسف الشريف"، للحزن على موت أحمد مالك في لا تطفئ الشمس، لملعون أبو الناس العزاز .. ده شهر المسلسلات بامتياز، وفي وسط كل ده قيم المشاهدين أداء الممثلين، وفيه ممثلين كانوا الأسوأ.
مش لازم يكونوا أسوأ علطول الخط، يعني مثلًا نيللى كريم كان بيتقال عليها "باردة" لحد ما بقت نجمة والناس بتستنى مسلسلها، لكن هما الأسوأ السنة دي في المسلسلات دي. الترتيب ده مش معناه أي حاجة، كلهم في مكانة واحدة
أحمد فهمي
المسلسل اللى بيدور عن "هشام" الراجل الخاين و"جميلة"، كان المسلسل الأكثر دراما السنة دي، ورغم كدة ماحدش فهم أحمد فهمي ليه طول المسلسل بيدينا نفس رد الفعل؟ طيب هو ليه أحمد فهمي ساب الغنا وبقى يمثل؟
هاني عادل
مغني وسط البلد ليه دور مهم في مسلسلين، حلاوة الدنيا في دور "عمر" اللي بيسيب خطيبته بعد مرضها بالسرطان، و"حازم" المذيع صديق بطل هذا المساء، وسبحان الله دوره في الاتنين من غير أي تعبيرات وش، بس فيها صوت عالي ونرفزة مش مفهومة، الأدوار الكتير اللى بياخدها هاني عادل رغم تعليق الناس في أغلب الأوقات على تمثيله، خلت الناس تسأل طيب ده ليه علاقة بالمنتجين؟
جميلة عوض
بعد دورها في تحت السيطرة الناس كلها كانت مستنية الدور الجاي لجميلة عوض، ورغم إن مساحة دور "آية" في "لا تطفئ الشمس" أكبر بكتير، لكن ماشفناش أي جديد، السوشيال ميديا كانت بتهزر إنها دايمًا بتدي نفس تعبيرات الوش في كل المواقف زي ما بتعمل نجمة هوليوود كريستين ستيورات، الأكيد إن في لحظة ما شكلها الصغير مش هيشفع للأدوار وهيكون لازم تقدم "جميلة" تمثيل أكتر.
https://www.youtube.com/watch?list=PLk7aOjrbxuopqaym_cd9XQVdTEbpYi-lV&v=mklmIShcOjQ
أحمد مجدي
ماهو مش معنى إنك مز والبنات بتعلق دايمًا عليك إنك ماتمثلش كده! "يوسف" شخصية مركبة، بيحب مراته جدًا بس بيسمح إنها تكون على علاقة مع صاحبه قدامه علشان شغله يعدي ولما مراته بتواجهه بيندم، الشخصية دي كانت تحتمل تعبيرات وش من أحمد مجدي تبكينا، طيب شوية مجهود علشان نحس بالصراع الداخلي، لكن المسلسل كله نفس tone الصوت ونظرة العين! ليه كده؟
ميرفت أمين
تقريبًا المخرج محمد شاكر خضير كان بيتكسف يقول للفنانة القديرة ميرفت أمين تعيد مشاهدها، فطلع المسلسل عامل كده، ميرفت أمين مابتقولش غير "ش" وتبرق عينها وترفع حواجبها وتزعق لما تكون بتطبطب، وتضحك لما يكون المفروض تزعق، ومابقناش فاهمين هي ليه مش بتشتغل على الشخصية أكتر من كده شوية؟
https://www.youtube.com/watch?list=PLk7aOjrbxuopqaym_cd9XQVdTEbpYi-lV&v=MqJnlB2cUyY
ميس حمدان
الممثلة الأردنية اللي عرفناها من تقليد الممثلين، بتاخد أدوار مهمة في مسلسل جريمة وتشويق، دور "إنجي" اللي بتحرك جزء كبير من أحداث طاقة نور، خلى "ميس" تصوت طول المسلسل، وتفوقت على الفنانة روجينا في السنين اللي فاتت وكسبت منها جائزة أحسن صريخ في رمضان.
ملك قورة
الفنانة ملك قورة بتتكلم زي نيللى "دنيا سمير غانم" في مسلسل نيللى وشيريهان، مياصة ودلع وطريقة أرستقراطية، بس ده كان مقبول مع شخصية نيللي لكن إيه لازمة إن مسلسل خلصانة بشياكة كله يبقى كده؟ بتتكلمي كده ليه طيب؟ أنتي قرفانة مننا؟
مي عمر
ماحدش أنكر إنك زي القمر، بس لما المسلسل تقدمي فيه أكتر من 20 شخصية كلهم تمثيلهم وحش تبقى مصيبة! "ريح المدام" هو أفضل عمل كوميدي السنة دي، بس مي عمر غلطة المسلسل. لازم تشوف الحلقة كاملة علشان تدرك اللي بنقوله ده، بس ممكن الأغنية تديك نبذة.
كريم فهمي
كريم أصلًا ممثل شاطر، أو يمكن كان بيتدارى في الأدوار اللطيفة، والدور ده علشان مختلف فلت منه، يعني نتمنى إنه يرجع يعمل أدوار لطيفة أو يتدرب أكتر من كده شوية.