Hikayat Aceh

SALEUM HOREUMAT

Seunuson ; ZA.Moh.Amin

Assalamu'alaikum kawom sahabat
Timu ngoen barat seuramo mekkah
Keue ureueng aceh tarekh loen intat
Pihak loen minat ibu dan ayah

Gasin ngoen kaya seunang meularat
Malem ngoen bangsat dum hamba Allah
Sambot salem loen kuntom malakat
Geuelantoe loen lhat bungoeng siulah

Soe yang tem baca na munafa'at
Donya akhirat raya faedah
Koen haba lumpou putrou ngoen daulat
Koen meuekat ubat ie mani gajah

Jeuet keue peudoman jampang oh sisat
Jeuet keue nasihat oh tinggi darah
Tamse peunawa umpama ubat
Koen haba silat peue payang lidah

Neuecok keubulueng neutueng keue ubat
Waleet pon neulhat bak binteh dayah
Kadang oh dudoe ek jeuet keue tungkat
Neuetueng ibarat teungku meutuwah

Peunulang guree teuntee loen intat
Pusaka meuhat masa didayah
Jinoe loen bagi loen bie keue ummat
Dalam hikayat supaya mudah

Geuelantoe loen pulang gudang hikeuemat
Keue ureueng ta'at buet ahlusunah
Umat iseulam reugam amanat
Hadist ngoen ayat bek sampe ubah

Karena nanggroe katoe kiamat
Maksiet ngoen laknat hanlee soe bantah
Peungaroh syetaan rijang meuekumat
Hanlee soe ingat suroh ngoen teugah

Islam nyang suci meuri meularat
Leukang alamat goep peugah-peugah
Pubuet pue yang roeh pajoh pue mangat
Hate kabatat lupa keue Allah

Peuturoet nafsu pumaju syahwat
Gadoh keueramat seuramoe mekkah
Keunong peungaroh bungkoh dibarat
Leukang alamat agama Allah

Inong ngoen agam karam dum sisat
Hana lee teupat jikheuen bismillah
Nyang suroeh robbi benci di ingat
Mabok ngoen syahwat bermegah-megah

Dakna sidroe-droe nyang toue ngoen ta'at
Yang tem peuteupat lage peurintah
Kajicap kolot meugampoh kawat
Hanjeuet tamumat beuneng ka basah

Jikheuen doseuta Nabi Muhammad
Hadist ngoen ayat sang-sang beurakah
Sidumnan jahe kaphe sangkilat
Beue ingat-ingat kawoem meuetuwah

Allahu Rabbi pakri keue ummat
Uroe akhirat hana soe peuglah
Bek sampee sarok mabok ngoen lazat
Peuturoet syahwat lupa keue Allah

Hudep lam donya hana treb lambat
Tapiyoh siat dang-dang puleh grah
Ohtrih panggilan rijang beuerangkat
Amai ibadat mita bubagah

Soe-soe na salah bagah neue taubat
Bek sampe sisat oh dudoe teulah
Tuhan peue ampoen dum desya ummat
Asai ta taubat dingoen ikheulah

Bala raya that uroe akhirat
Loen cie riwayat seun-seun sipatah
Aneuek kunci syurga nama hikayat
Loen harap rahmat fhala seudeukah

(Hikayat aneuek kunci syurga)