කෝච්චි එන්ජිම | 5% to SL Charity

ඒ මීට සතියකට විතර කලින්. අපේ ලොකු අම්මගෙ පුතාගෙ පොඩි දෙන්නෙක් ඉන්නවා. ආදරේට අපි කියන්නෙ දෝණි හා බන්ටු කියලා. දෝණි නම් හතර වසරෙ. බන්ටු මුලින්ම ඉස්කෝලෙ ගියෙ මේ අවුරුද්දෙ වුණාට ඉතින් ඉස්කෝලෙ ගිහින් කරේ සෙල්ලම් ගෙවල් හදපු එක විතරයි. ඊට පස්සෙ ආයෙ කොරෝනා වැඩිවුණ නිසා එදා ඉඳන් ගෙදර. මොන්ටිසෝරියට වුණෙත් ඒ ටිකම තමයි.

අපි එහේ ගියේ වෙන වැඩකට. නෑකමට ඒ දෙන්නා අපේ පුතයි දූයි. මටයි නංගිටයි නැන්දා කිව්වාට අපේ මල්ලිට කියන්නෙ අයියා කියල. එතකොට තමයි දෙන්න හිතෙන්නෙ උඩින් යන්න. 😏 ඔය ඉන්න අතරෙ බන්ටු කිව්වා තව දවස් හතයි කියලා. මං ඇහුවා මොකටද කියල. දෝණි කොහෙන්ද මන්දා ඇවිත් කිව්වා මල්ලිගෙ උපන්දිනේට කියල. එතකොට තමයි මං දැක්කේ සතියකට කලින්ම ගහල තියෙන හැපී බර්ත්ඩේ බෝඩ් එක.

ඒ දෙන්නා හැමදාම එහෙමයි. අම්මයි තාත්තයි දෙන්නම වැඩිය ගෙදර නැති නිසා ඒ දෙන්න ඉන්නෙ අච්චියි සීයයි, ඒ දෙන්නා බලාගන්න එන එක්කෙනයි එක්ක. ඉතින් සමහර දවසට ඔහොම දවස් ගණන් කරනවා. මොකකටද ඇහුවම කියන්නෙ මහ ලොකු හේතු නෙවෙයි. "තාත්තා කිව්ව සෙනසුරාදා බීච් එක්ක යනව කියල", "අම්පාරෙ ගෙදර යනවනෙ අපි", "පාර්ක් එක්ක යනවා කිව්වා" ඔන්න ඔය වගේ හේතුවක් තමයි කියන්නේ.

අම්මල වැඩිය ගෙදර නැති නිසා, මොකක් හරි ඒ වගේ එකක් කිව්වම දෙන්න එක්ක වෙනම කැලැන්ඩර් එකක් හදාගෙන ඒකෙ දින කපනවා. බර්ත්ඩේ එකටත් එහෙම තමයි කරේ. අපි ගෙදර එන්න කලින්ම අපිට කිව්ව කේක් එකක්‍ අරන් එන්න හොඳේ කියල. දෝණිගේ බර්ත්ඩේ එක දවසේ වෙච්ච කරදරේ නිසා අපි ඊට පස්සෙ කේක් හැදුවෙ නෑ. No Cake Birthday ඒ කතාව දන්නෙ නැත්නම් මේකෙන් බලන්න.

කොහොම හරි ඉතින් ඒක ඉල්ලපු විදියට බෑ කියන්න හිතුනේ නෑ. අවුරුදු හයක පොඩි එක්කෙනෙක්ට දෙන්න ඕන මොන වගේ කේක් එකක්ද කියල මං ගොඩක් හෙව්වා. බර්ත්ඩේ එකට දවස් හතරකට විතර කලින් කෝල් එකක් ආවා. නංගි තමයි කෝල් එක ගත්තේ. "දසුනි නැන්දේ මල්ලිට නිල් පාට කේක් එකක් ලු ඕන." අපි ඉතින් හා කියල නිල් පාට කේක් හෙව්වා. ආයේ කෝල් එකක්. "මල්ලිට කෝච්චි එන්ජිමක් ඕනලු." මැදැයි. දැන් හදපන්කෝ කෝච්චි එන්ජිමක්.

යන්තන් මොකක් හරි කරල කේක් එකක් හදල, ඒක අයිසින් කරගන්න පුළුවන් වුණාට එහෙම ලස්සනට කේක් හදන්න මට තේරෙන්නෙ නෑ. ඉගෙන ගෙන හදනවා නෙවෙයිනෙ. ඒත් ඉතින් අරම ඉල්ලුවම හදල නොදී ඉන්න බෑනේ. කෝම හරි මං ඩිසයින් ටිකක් බැලුවා. ඒ බැලුවම නම් හිතුණා හදාගන්න පුළුවන් වෙයි කියලා. කලින් දවසේ කේක් එක හදල තියල ඊයෙ තමයි අයිසින් කරන්න ගත්තේ.

මුලින්ම කරේ කේක් එක කොටස්වලට වෙන් කර ගනිපු එක. ඊට පස්සෙ අවශ්‍ය හැඩේ හදාගත්තා. කේක් බෝර්ඩ් එකකුත් ගෙදරම හදන්න වුණා. ගෙදර තිබුණ බෝ‍ර්ඩ් එච්චර ලොකු කේක් එකක් තියන්න මදි. මුලින්ම කරෙ රේල්පාරක් ඇඳපු එක. ඒක උඩ තමයි එන්ජිම හා කෝච්චි පෙට්ටි ටික තිබ්බෙ. නිල් පාට ඕන කිව්ව නිසා වැඩිපුර ගත්තෙ නිල් පාට. ලස්සන කරන්න ඕන ජුජුබ්ස්, පෙබල්ස් හා මාශ්මෙලොව්ස් කලින් දවසෙ ගෙනත් තිබ්බා. කේක් එක නම් හිතුවට වඩා හොඳට තිබුණා. අන්තිමට අපි කෝච්චි එන්ජිමකුයි, පෙට්ටි දෙකකුයිත් හැදුවා. 😍