අමිල ටැලන්ට් - 2

අමිල ටැලන්ට් උළෙල නිමා වී සිව් දිනකට පසු ය අද මා ලියන්නේ.පසුගිය දින කිහිපය මණ්ඩලය මගින් සංවිධානය කරණ ලද සර්ව රාත්‍රික පිරිත් දේශනය සහ දානමය කටයුතු නිසා බෙහෙවින් කාර්‍ය බහුලව ගෙවිණි.ඒ ගැන මීලඟ ලියවිල්ල වෙන් කරමි.

කලින් කියූ සේම සැප්තැම්බර් 24 වැනිදා සවස් වරුවේ මිතුරියක හා ගොස් ත්‍යාග ප්‍රදානෝත්සවයට සහභාගි වීමි. ඉන් පෙර දැක ඇති අය මෙන්ම කිසිදා නුදුටු, නමින් දන්නා හුරුපුරුදු මුහුණු රැසක් හමු වීම විසල් සතුටකි. එය මනාව සංවිධානය කරණ ලද උත්සවයක් බව පෙනෙන්නට තිබිණි.

තරග 15හි විනිසුරන් ලෙස කටයුතු කළ සාහිත්‍යධරයන්, ගායන ශිල්පීන්, නර්තන හා රංගන ශිල්පීන්, සංගීත වේදීන් යනාදි ප්‍රකට පුද්ගලයන් රැසක් පිරිවරා උත්සවය උත්කර්ෂවත් අයුරින් පැවැත්විණි.

ප්‍රධාන නිවේදිකාව වූයේ රංගන ශිල්පිනියක වූ යුරේනි නොෂිකා ය.ඇය පූරක භූමිකාවට ආගන්තුක නොවූවා සේම ඊට මනාව ගැලපිණි. ඇයට සහායක නිවේදකයන් දෙදෙනෙකු හා නිවේදිකාවන් දෙදෙනෙකු ද විය.

ඒ මෙම තරගයේ නිවේදන ඉසව්වේ අවසන් වටය නියෝජනය කරන ලද යොවුන් දරුවන්‍ බව දැන ගතිමු.උළෙලේ ආකර්ෂණීය නර්තන අංග කිහිපය ඉදිරිපත් කරණ ලද්දේ ද එලෙසම නර්තනය අවසන් වටයේ නිර්දේශ ලද්දන් ය.

මට විචාර ඉසව්වේ දෙවන ස්ථානය ලැබිණි.සෑම ඉසව්වකම ප්‍රථම, දෙවන හා තෙවන ස්ථාන සඳහා කුසලානයක්, සහතිකයක් සහ මුදල් ත්‍යාග (පිළිවෙලින් රු.15,000/=, 10,000/= සහ 7500/= බැගින්) පිරිනැමිණි.එය ඉන් වසර දෙකකට පෙර පිරිනමන ලද මුදල මෙන් තුන් ගුණයක් විය.

අමිල ඇතුළු අය විදේශගත රැකියාවල නියැලී හෙළන දහඩිය සුවඳ මුසු යැයි හැඟෙන මුදල් ත්‍යාග හැම විටම මගේ දෑස් කඳුලින් තෙමයි. එමෙන්ම කුසලාන, සහතික සහ මේ කුඩා තිළිණ සතුට සහ සාඩම්බරය දනවයි.

විනිසුරන් සඳහා ද වේදිකාවට නොකැඳවා ඔවුන්ගේ අසුන් ලඟට ගොස් සිහිවටන සම්මාන පිරිනැමිණි.ඔවුන් සඳහා අදාළ ගෙවීම් ද නිසි ලෙස කරන්නට ඇත.

අමිල උත්සවයට සතියකට පෙර මවුබිමට පැමිණි අතර නිමවී දින 2ක් තුළ පිටවී ගියේය.ඔහු වෙනුවෙන් මෙරට සිටින මිතුරු මිතුරියන් සියල්ල සූදානම් කරන්නට ඇත. ඔවුන් අමිල වෙනුවෙන් උපහාර ගීතයක් පටිගත කර තිබිණි. එය උළෙල ආරම්භයේ දී සජීවීව ගැයුනි.

උත්සවය ප්‍රමාද වී සවස 3ට පමණ ඇරඹුණු හෙයින් රාත්‍රී 7.00 පමණ වන විට වෙනත් මිතුරියක සමඟ එතැනින් පිට වීමි. රාත්‍රී 8ට කොටුවෙන් කන්කසන්තුරය බලා ධාවනය වූ රාත්‍රී තැපැල් දුම්රිය අනුරාධපුර දුම්රිය ස්ථානයේ නවත්වන විට රාත්‍රි 1 වී තිබිණි.

වෙහෙසකර නිමාවක් සනිටුහන් වුව ද සුන්දර ස්මරණ සහිත සන්තුෂ්ඨිමත් දිනකි ඒ.