Yalnış anlaşılan ifadələr.

Deməli, nənəmiz bir az ağır çəkili qadındı. Əslində bir az yox, lap əməlli başlı ağır çəkili qadındı. Həm də ibtidai sinif müəlliməsi.

Sovet dönəmlərində ən fəal müəllimlərdən biri olub. İndikilər xatırlamaz, o vaxtlar məktəblərdə günüuzadılmış qruplar var idi. O qruplarda uşaqlar dərsdən sonra da məktəbdə qalıb yeyib içirdilər. Ev tapşırıqlarını məktəbdə yerinə yetirirdilər. Sonra həmin gözəl təcrübəni avropalılar və amerikalılar bizdən oğurladılar Az tv demişkən. Bizə qalmadı. Necə deyərlər, başqalarına ağıl verirsən, özünə qalmır kimi bir şey. Mətləbdən uzaqlaşmayaq. Nənəmiz bir qrupun uşaqlarını sıraya düzüb elan edir ki, indi sizi yeməyə aparacam. Uşaqların canına vəlvələ düşür. Sıraya bir ağlaşma düşür ki, gəl görəsən. Uşaqlar elə bilir ki, müəllimə bunları özü yeməyə aparır. Müəllimənin ağır çəkili vücudunu görüncə buna heç şübhələri qalmır. Sözüm onda yox, dilimizdəki sözlər bəzən elə yanlış anlaşılır ki, heç altından çıxa bilmirsən. İndiki dövrdə dilimiz türk sözləri ilə dolub. Uşaqlar ümumiyyətlə türk kanallarına baxdıqları üçün lap çox istifadə edirlər. Məsələn, o gün qızımın doğum günüdür. Qızım mənə deyir ki, nə yaxşı ki, mən doğdum, anne. Yəni doğuldum demək istəyir. Həmin o ağır çəkili nənəmiz uşağın üstünə bir qışqırıq ki, tərbiyəsiz söz danışma. Əslində ən yaxşısı susmaqdı. Gəlin susanda dilmizin gözəlliyinə riayət edərək susaq.

image