Hikayat Ibrahim "Meuturi Ngen Siti Maryam"

Ibrahim Hasan

• Kapai teureubang lam awan tinggi

Dijak kapai ie dalam geulumbang

Watee sikula tamat bak UI

Tamoeng organisasi laju masa nyan

• Jeut anggota lam organisasi

Watee bak UI Ibrahim Hasan

Senat mahasiswa teuma bak UI

Fakultas ekonomi nibak watee nya

• Oeh lheuh nyan teuma anggota HMI

Saboeh Organisasi Mahasiswa Islam

Thong limoeng - limong tamong mulai

Anggota HMI Senat pih meunan

• Meunyoe pemuda na organisasi

Disinan dali pikeran manyang

Le that ileumee meuteumee hai akhi

Lam organisasi hana bandengan

• Dalam sikula hana peu cari

Lam organisasi le pengalaman

Modal pertama kana lam jari

Tinggai geu isi troh u lapangan

• brahim Hasan disinan dali

Bak organisasi cok pengalaman

Masa di gampong gabong ngon santri

Watee sajan mi tarekat sinan

• Disampeng galak bak organisasi

Dalam meunari pih galak gobnya

Diateuh penggong geu ayoen gaki

Leupah meuseuni Ibrahim Hasan

• Seurampang dua blah leupah that ahli

Hanso saingi nibak masa nyan

Kareuna ceudah lam bhah meunari

Gobnyan diseunangi deungoen dipandang

• Liwat tarian sinan meudali

Rame meuturi inong ngon agam

Ho nyang geujak jigrak khanduri

Mudah reuzeuki nibak masa nyan

• Syamsuddin Mahmud pih jeut meunari

Watee bak UI meusapat sinan

Ngon Ibrahim Hasan rakan meunari

Ulee ilie geuba - ba sajan

• Musem luwah blang meuladang campli

Ramee peutani nyang pubuet meunan

Ka tingkat limoeng po bungong giri

Deungoe lon khuen kri nibak masanyan

• Tangui bajee jah payah na dasi

Mangat ogahri watee gob pandang

Sabe tiep minggu meulu bee wangi

Geujak meudodi u rumoh paman

• U Tanjong Priok dawok peurangi

Geujak poh cakra seubab liburan

Abdullah Mahmud geuseubut wali

Syeedara abi Ibrahim Hasan

• Bak si uroe po banta saidi

Ban pagi hari di rumoh paman

Teubit di rumoh oeh beungoeh sunyi

Laju peureugi nibak watee nyan

• Bak teungku Akoeb katroh geu ili

Cit rakan wali Ibrahim Hasan

Sinan di Priok Pak Akoeb ngon istri

Asai dari Pidie katreb disinan

• Ureueng ulee Gle trep cre ngon nanggri

Geu pajoeh gaji bak kapai barang

Kapai KPM beken han sakri

Ulua nanggri sabee berjalan

• Teungku Akoeb nyan Tuhanku neubri

Bungoeng melati kumang lam taman

Na aneuk dara rupa that tari

Nama geurasi Siti Maryam

• Watee troeh teuka po Banta Saidi

Laju meuturi dua awak nyan

Yoh mumat jaroe leungo lam seundi

Sinan phon dali cinta meulabang

• Ka jatoeh hate kande kudangdi

Watee geungieng hi Siti Maryam

Dak jeut beusabe bekle permisi

Bah sajan Siti uroe ngoen malam

• Teungku Akoeb pulot bee wangi

Lam sanubari seunang hana ban

Seubab aneukda hana le sunyi

Kadang Tuhan bri jeut keutunangan

• Bineh gaki glee rabe kubiri

Malam jijeb ie keudeh lam kubang

Jan laen minggu hanpeu neukheun kri

Apel pagi sabee disinan

• Deungon santon langsong peureugi

Hadiah abi dilee saboh jan

Keudeh u Priok katroeh geu ilie

Tujuan meuri u bak Maryam

• Tamoeng u dalam po bintang pari

Duk bak kurusi laju watee nyan

Hana le canggong tangglong kudangdi

Seubab meuturi kalheh saboh jan

• Geuduek disinan sajan ngon siti

Geu meupoh cakri dua awaknya

Hana trep tempoe uroe ka sunyi

Lakee permisi beudoeh jak riwang

• Meunan keuh sabee hana pre hari

Geujak seundiri u bak Maryam

Seubab ka kayem geutem peuduli

Hate dek Siti masa nyan goyang

• Ka jatoeh cinta remaja putri

Ka jatoeh hati keu Ibrahim Hasan

Mantong teupeudam lam sanubari

Goh lom beurani geu peuleumah trang

• Siti Maryam watee nyan akhi

Sideh bak UKI kuliah gobnyan

Hana that jarak tajak bak UI

Jeut ngoen gaki oh takoh jalan

• Oeh woe sikula po bantan Saidi

Laju bak UKI jeumput Maryam

Han peu panyang ta karang rawi

Maklum seundiri awak pacaran

• Boh timon bruek boh timon phang

Timon panyang dalam raga

Ta balek ayat siat hai rakan

Supaya gampang watee ta baca

• Kuala Bubon aron meureuntang

Kuala Simpang diateuh Langsa

Bah that tip uroe geujak woe sajan

Hate di dalam goh lon teubaca

• Geupula timon bak gunong meudang

Geu pula bawang oh lheuh seumula

Di dalam hatee sabe teu bayang

Peukheuh dek Maryam keulon na cinta

• Lam lungkiek bak u ta tabu kacang

Lungkiek bak pisang tubee ta pula

Bak si uroe deungoe lon peutrang

Ibrahim Hasan surat geurika

• Geu tuleh surat leugat watee nyan

Keudek Maryam si ayeun mata

Deungoe lon rampoe asoe surat nyan

Paneuk ngon panyang keudroe tabaca

• Deungon hormat surat lon layang

Geulantoe badan keunan lon teuka

Ta sambot surat nyoe pat hai intan

Ngoen hate lapang jaroe ban dua

• Ateuh Pulo Weh na geupeh pancang

Seubagai lambang Indonesia

Meuah beuraya teuma keu cut bang

Kadang bak kadang teulanjo haba

• Dilingka rumoh timoh bak pisang

Dikeu halaman na keubon bunga

Bah that beukayem cutlem jak keunan

Han lon jeut peutrang hate lam dada

• Gampong lam Panah meugah hana ban

Gajah meukwan jitron lam rimba

Hate lon luka konk ta tujan

Watee lon pandang gata pertama

• Taloe bineh krueng ureueng meuladang

Geu pulah bayam ngon boh peupaya

Baro uroe nyoe sinoe lon peutrang

Hai dek Maryam lon jatoh cinta

• Di lhokseumawe ramee oh malam

Keudeh ujong blang ureueng tamasya

Ulon boh malee kumbee lam taman

Bak keuh lon peutrang jinoe bak gata

• Samat teungoh leun papeun ta beuntang

Ureueng duek keunan geu meupoh cakra

Kalheuh lon pikee paneuk ngon panyang

Cit gata intan harapan hamba

• Watee ie paseung udeung meukawan

Dijak meureuntang di miengkuala

Habeh lon kalon bangon ngon ragam

Hana nyang saban laen ngon gata

• Ta beudoh bagah tacah ilalang

Bek jiduek musang deungon meuruwa

Hudep beusaree matee beu sajan

Beu jeut lon tuan peudampeng gata

• Oen manek manoe ta puwoe di blang

Tacok sireugam keu ubat luka

Teuma bak gata peuna jawaban

Tatem deungoen han ulon preh haba

• Peurahoe pukat sipat geulumbang

Ta kaloen pawang sibok lagoina

Ohno meumada haba bak cut bang

Lon preh jawaban sinoe bak gata

• Oehka seuleusoe geupasoe reujang

Lam amplop panyang hijo wareuna

Uroe pih beungoh mehmoh kon wayang

Meungui pakaian jak bak sikula

• Oeh woe sikula hana le reunggang

Moto pih reujang laju geu hila

Keudeh u Priok beu ek troh reujang

Ibrahim Hasan meunan keunira

• Hana trep tempo dudoe hai rakan

Ubak Maryan katroh geu teuka

Duek meuseunia teuma wateenyan

Dalam ruangan ngon sabe muda

• Keudeh keunoe meuproe khabaran

Ibrahi Hasan teuma jak gisa

Sira beurangkat surat peureugam

Siti Maryam geusambot sigra

• Oeh leupah gisa Ibrahim Hasan

Siti Maryam teuot meugeumpa

Teuingat surat teumat lam reugam

Asoe di dalam saleh peu haba

• U dalam kama ka geuba reujang

Peureubah badan surat geubaca

Oeh ban geubaca haba di dalam

Hate that seunang hana ngon peusa

• Cit ka barokon ji peusom deundam

Keu Ibrahim Hasan galak geuh raya

Ureueng inong kon hana saban

Han geujeut peutrang apon lam dada

• Oeh lheuh geu baca haba bak cut bang

Geucok le kalam geu balah haba

Keureutah geutuleh nazam

Deungoe hai rakan bacut lon rika

• Assamualikom ampoen jeunulang

Surat balasan nyopat neu baca

Nyang phoen harap meuhat maafkan

Kadang meunyimpang bak jaweub haba

• Aneuk cicak khem lam puteng tiang

Oeh wate malam ta deungo subra

Teurimoeng geunaseh meuceh keu cut bang

Nyang ka neu peutrng keu ulon cinta

• Sinyak koh naleung taloe ateung blang

Dua goe riwang ka punoh raga

Sikrak bak kanda cinta meulabang

Dari lon tuan meulipat ganda

• Bak sijaloeh timoh meureuntang

Cabeung jih ridang indah lagoina

Padum trep sabee lam hate deundam

Han jeut lon peutrang ubak kakanda

• Ateuh bak lapeng cicem meukawan

Ateuh bak mancang aneuk leuk kuwa

Hudep beusaree mate beu sajan

Susah ngon seunang sama ta rasa

• Aneuk tuloe woe cot uroe timang

Aneuk guda plang ji tarek kaha

Nyawong ngoen tuboeh lon troh barangjan

Uroe ngon malam jeumba kakanda

• Jipoet angen gle pade goh seudang

Reubah meutimphan dalam blang raya

Rindu lam hate sabe cut bang

Han lon jeut peutrang dilee nyang ka - ka

• Ateuh jambee kleng kayem na musang

Ateuh keutapang jiduek meuruwa

Ta mita lagee meuribee jalan

Ulon ngoen cut bang beu sabe dua

• Oeh supot uroe motoe dum riwang

Peutron peunumpang aneuk sikula

Oeh noe meu mada haba balasan

Dari lon tuan wahe kakanda

• Oeh lheuh geusurat geu lipat reujang

Ngon tanda tangan ka geuboh sigra

Pasoe lam amplop bek gob pandang

Ji peusom yohnyan lam buku sikula

• Oeh watee uroe dudoe komdian

Ek lam geuritan jak bak sikula

Keudeh bak UKI gaki geu goyang

Ikot peulajaran lagee biasa

• Watee meujak woe uroe ka siang

Siti Maryam ka yoe lam dada

Geunging uluwa teuma bak jalan

Kana cut abang ateuh BSA

• Teubit lam glah bagah le reujang

Jak eumpeung cut bang bak jalan raya

Duek seutom BSA lanja watee nyan

Jaroe bak pinggang laju ka geuwa

• BSA jiplueng lam ruweung jalan

Siti Maryam hatnyan keureuja

Surat bak jaroe geu pasoe yoh nyan

Lam balum cut bang nyang na bak dada

• Surat jitamoeng lam kantong kanan

Ibrahim Hasan pura toep mata

Oeh troeh geu antat meuhat Maryam

Moto geu pasang lage sot teuma

• Geu peutron adek geu tarek seuntang

BSA peuriwang u Jakarta Utara

Keudeh u asrama lanja geuriwang

Uroe ka siang lewat poh dua

• Oeh troeh u teumpat meuhat masanyan

Tamoeng reujang laju lam kama

Ateuh peuratah geupeureubah badan

Ngon hate bokbang surat geubaca

• Hate mangat hana pat lawan

Peu nyang geu pandang indah bak mata

Asoe lam surat mangat hana ban

Adek Maryam dibalah cinta

• Jipoet angen jimeuen dahan

Jipot lam badan leupie lagoina

Katroeh ban hawa po muda seudang

Lumpoe saboeh jan jinoe ka nyata

• Saboeh bukti dali cit ka trang

Ibrahim Hasam memang perkasa

Mampu geu reubot boh rambot leukang

Dara rupawan hase geu hila

• Saleh peu cara nyang na bak gobnyan

Bungoeng lam taman meuteumeung jeumba

Peukheuh ileumee geumee u dalam

Nyang jeut Maryam roh jatoh cinta

• Meunyoe ta tilek adek Maryam

Sama ngon bintang oh malam jula

Watee meusapat meuhat lam kawan

Meusidroe pihtan ta bandeng rupa

• Memang raseuki Ibrahim Hasan

Dalam seupot klam meuteumee suwa

Peumuda laen keureuleng cit nyan

Teupaksa riwang ngon putoh asa

• Laju u likot jisurot reujang

Dalam geulanggang taloe juara

Langkah raseuki neubri le Tuhan

Peuteumuen ngoen nyan di dalam donya.

Karangan : Nurman Syamhas

---

Posted from my blog with SteemPress : https://almahdimahdi95.000webhostapp.com/2018/10/hikayat-ibrahim-meuturi-ngen-siti-maryam

---