Dünyanın ən gözəl qızı məzun oldu

Bu gün keçirdiyim hisslərə ad qoya bilmirəm. Çox dolaşıq, qarmaqarışıq hisslərdi. Qızım məzun olur bu gün. O gün mənə oxuyur ki, ana, insanın yaşı artıqca illər sürətlənir. Doğrudan da belədi. İllər işıq sürəti ilə keçib gedir. Sanki dünən idi, başına ağ bant vurub məktəbə göndərdiyim.

Düz 11 il keçdi, nə vaxt böyüdüyünü hiss eləmədim. Əslində bir az hiss eləmişdim. Səhər işə gedəndə məktəbə geyəcəyim koftamı tapmayanda:) Özəlləşdirib öz paltarlarının yanından asmışdı.
Bu gün dünyanın ən gözəl qızı məzun oldu.

Oxuduğu 11 ildə bir dəfə də olsun ondan mənə töhmət gəlmədi. Məktəbin öncül, sevilib seçilən şagirdlərindən oldu. Çəkdiyi rəsmləri sosial şəbəkələrdə paylaşıb çoxlu bərəkallahlar qazandım mən də.

9-cu sinifdə oxuyanda buraxılış imtahanından ən yüksək nəticə toplayıb rayon birincisi oldu. İndi də tələbə olmağa hazırlaşır. Anasının göz bəbəyidir o. Yalandan guppuldatdığım şeirlərin rejissoru, hərdən də mənim monqolluğumdan hirslənib "cahilsən, ana)))" deyən qızım. Bu gün məzun oldun. Gün o gün olsun ki, universitet qazanıb tələbə olasan və daha önəmlisi Vətənə, cəmiyyətə layiq bir vətəndaş kimi yetişəsən.