මගේ සමන් පිච්ච මල් පදුර

හලෝ යාළුවනේ මගේ මිදුලේ සමන් පිච්ච මල් පදුර මගේ සිතට සතුට ගෙනෙන තෝතැන්නක් කීවොත් නිවැරැදියි. මුලින්ම මම මේක හිටවල තිබුණේ මල් පෝච්චියක. ඒත් . පස්සේ මට හිතුණ මේක බිම හිටවන්න ඕනි කියල. මම අහල තිබුණ සමන් පිච්ච වැලක් ගෙයි මිදුලේ හිටවල තියන එක ගොඩාක් හොදයි කියල. කට කතාවකුත් තිබුණ දෙයියෝ වඩිනවා කියල සමන් පිච්ච මල් වලට සුවදට. දෙයියෝ කෙසේ වෙතත් සමන් පිච්ච මල් වල සුවද මිදුල පුරා විසිරෙන විට ගතට අපූරු සුවයක් ලැබෙනවා. ඒ නිසා මම ගෙදර මිදුලට ඇතුල් වෙන තැනම ගේට්ටු කණුව ලග බිම සමන් පිච්ච වැල හිටව ගත්ත.

දැන් මේ පදුර පොඩි වුනත් මල් පිරිලා තියනවා. ඒක දැක්කම මගේ හිතටත් හරිම සතුටුයි. මම හිතනවා ඔයාලගේ ගෙවල් වලත් මේ මල් ඇති කියල. මොකද මෙය ලංකාවේ බහුලව දැකිය හැකි ශාකයක් නිසා. ඒ වුණාට ඔයාල මේ මල ගැන ලොකු විස්තරයක් දන්නේ නැතිව ඇති කියල හිතනවා. ඒ නිසා මම හිතුව මම දැන උගත් කරුණු ඔයාල එක්ක බෙදා ගන්න.

ඉතින් මේ සමන් පිච්ච ගහේ කොළ, මුල්, සහ මල් ඇතුළු ගහේ සෑම කොටසක්ම විවිධ අරමුණු සදහා යොදා ගන්නවා කියල මම කියවල තියනවා. විශේෂයෙන්ම සුවද විලවුන් නිෂ්පාදනය සදහා මෙම ශාඛය වඩාත් වැදගත් වෙනවා. බෞද්ධයන් මේ මල බුදුන් වැදීමට බහුලව යොදාගත්තද. හින්දු භක්තිකයන් සිය කෝවිල් අලංකරණය සඳහාත් හින්දු කාන්තාවන් සිය වරලස අලංකාර කරගැනීම සදහාත් මෙය බහුලව යොදා ගන්නවා.

මෙම ශාඛයේ ඖෂධිය ගුණය ගැන කතා කලොත් ආයුර්වේද වෛද්‍ය විද්‍යාවේදී නොයෙකුත් ලෙඩ රෝග සඳහා බාවිතා කරණ බව පෙනී යන කරුණක්. මෙම ශාඛයේ කොටස් දරුණු චර්ම රෝග සදහාද, ලාදුරු වැනි රෝග සුව කර ගැනීම සදහාද භාවිත වන බව කියවේ. බටහිර රටවල මෙම මල් සිරප් බවට පරිවර්තනය කරගෙන කැස්ස සහ උගුරේ ගොරෝසු බව අඩු කර ගැනීම සදහා භාවිතා කරණ බව කියැවේ. මෙම ගසේ මුල් තලපයක් ලෙස සකසා නළල මත ගැල්වීමෙන් ඕනෑම වර්ගයේ හිසේ කකුමක් සමනය කරගත හැකි බවත්, තලපය ශරීරය මත ගැල්වීමෙන් සමේ ඇති ලප කැළැල් ඉවත් කර ලස්සන සමක් ඇති කර දීමටත් ඉවහල් වන බව කියැවේ. තවද දත් කැක්කුමක් ඇති අවස්ථාවක මෙම ශාකයේ කොළ හපා කෑම මගින් එය සමනය කර ගත හැකි බවටද පෙන්වා දී ඇත.

මෙවැනි ප්‍රයෝජන රාශියක් ඇති ශාකය ඔබේ ගෙවත්තේ තවමත් වගා කර ගෙන නොමැති නම් තවත් බලා නොයිද මේ වර්ෂා කාලයේ පැලයක් සිටුවා ගන්නා ලෙස මම ඔබගෙන් ඉතා කරුණාවෙන් ඉල්ලා සිටිනවා. ඔබට වාසනාවන්ත දිනයක් පතමින් නැවත මෙවැනි ලිපියකින් ඔබ හමුවෙන තුරු මම සමු ගන්නවා.

ස්තුතියි.