ඒක හරි ලස්සන අගෝස්තුවක්... | පුංචි ඉරිසියාකාරි

ඒක හරි ලස්සන අගෝස්තුවක හි තෙවන දිග හැරුම ලස්සන වෙන්න යන්නේ පුංචි සුරංගනාවියෙක් ගෙන්. කලින් දවසේ දෙවන දිග හැරුම අවසන් කරේ ඒ ගැන පුංචි ඉංගියකුත් දීලා. ඔන්න ඉතින් කතාව පටන් ගන්න හදන්නේ.

පුංචි ඉරිසියාකාරි....

ලිසරි කියන්නේ මගේ අක්කගේ චූටි දුව. මම එයාගේ පුංචි. ඉතින් එයා දැන් පෙරපාසල් යන චූටි බෝනික්කියක්. පෙර පාසලේ නිවාඩු ලැබිලා මෙදා පාර අගෝස්තුවේ ලිසරි ආවා පානදුරේ. මම ඔෆිස් ඉවර වෙලා ගෙදර එද්දි දඟම දඟ හා පැංචෙක් වගේ පුංචී..... කියාගෙන තමා එයා මාව පිලිගත්තේ. මම හරි කැමතියි එයා මට පුංචි කියනවට...❤️

ඉතින් උපන්දිනේ ගැන කලින් කිව්වනේ. මතකද මම කිව්වා මගෙන් මටම ලැබුණු උපන්දින තෑග්ග ගැන. ඔව් ඔව් ඒ ටෙඩියා තමා. මම ඒක ගෙදර ගෙනාවේ උපන්දිනේට කලින් දවසේ. ඉතින් මම ඒක එලියට අරන් ටිකක් හුරතල් කරා. ලිසරිගේ සද්දේ එක පාරටම අඩු වෙලා ඇඳ උඩ වාඩි වෙලා අත් දෙකත් බැදන් බුම්මගෙන ඉන්නවා මේ දඟ මල්ල.

මට හේතුවක් හිතා ගන්න බැරි වුණා. උපන්දිනේ දවසේ ගෙදර යනවා කිව්වමත් ඒ ඉරියව් ඒ විදියමයි. ඉතින් මම හිතුවේ මේ පුංචි දඟ මල්ලට ටෙඩියෙක් ඕනි වෙලා කියලා. මම ඉතින් ඒක එයාට තියා ගන්න දුන්නා. දන්නවද වුණ දේ... පුංචි ලිසරි මගේ ටෙඩියව ඇගිලි දෙකෙන් අල්ලලා පැත්තකින් තිබ්බා හරියට කුණු ගොඩක් වගේ. මොකද ඒ වුණේ ??

ඔන්න ඉතින් නිදා ගන්න වෙලාව කිට්ටු වුණාම මම ලගට ආව පුංචි ලිසරි මට හරිම ආදරණීය තර්ජනයක් කරනවා එයාගේ පොඩි කොට්ටෙත් අතේ තියන්. ඒ මෙන්න මේ විදියට. "පුංචි, ඔයා කීයට නැගිට්ටත් කමක් නෑ හෙට. ඔයා යන්න ඕනි මගේ උපන්දින තෑග්ග අරගෙන.. මම අද ඔයාගේ ඇදේ නිදා ගන්නේ ඔයා එක්ක. එතකොට ඔයාට මට හොරෙන් යන්න බෑ...."

ඒක මාර සැලසුමක්. ඔන්න ඉතින් එයා එක්ක ඇඳට ආවා නිදා ගන්න. ඇඳේ ඉන්න ටෙඩිය දැක්කම ආයිමත් පුංචි ලිසරිගේ හැසිරීම වෙනස් වුණා. ඉතින් මම ආදරෙන් ඇහුවා මොකක්ද හේතුව කියලා. ඉතින් පුංචි ලිසරි ලග තිබුණේ පුදුමාකාර උත්තරයක්. ඒ තමයි, "මම කැමති නෑ පුංචි මට වඩා ටෙඩියට ආදරේ කරනවට..."

එතකොට තමයි මට තේරුනේ කතන්දරේ. ඒක ලිසරිගේ හිතේ ඇති වුණ පුංචි ඉරිසියාවක් . අපි හැමෝම එහෙමයි. ආදරේ අඩු වෙනවට කැමති නෑ. ඉතින් මම චූටි බබාට කිව්වා "ඔයා හැමදාම මෙහේ ඉන්නේ නෑනේ.. ඔයා ගියාම තනියට තමයි මම මෙයාව ගෙනාවේ" කියලා. ඔන්න ඉතින් එහෙම කිව්වම තමයි පුංචි ලිසරිගේ හිතේ ටෙඩියා ගැන ආදරයක් ඇති වුණේ.....❤️

ඉතින් උපන්දිනේ දවසේ උදේම නැගිටලා එයා මට දුන්න කාඩ් එක තමයි මේ. ඉතින් මේ දඟ මල්ලගේ කතාවත් එක්ක ඒක හරි ලස්සන අගෝස්තුවක් කතා මාලාව ඉවර කරන්න තමයි හදන්නේ. ඉතින් මේ කතා මාලාව නිසා මට සැප්තැම්බරෙත් අගෝස්තුවේ ජීවත් වෙන්න පුළුවන් වුණා...❤️

-සඳුපි-
💚