රජෙකුගෙ වගේ ඔටුන්නක් ඇති | 5% to SL Charity

අපි පොඩි කාලෙ කියපු තේරවිල්ලක් තිබුණා. ඒකෙ කියවුනේ මෙන්න මෙහෙම කතාවක්. ඔයත් අහල තියෙනවද කියල බලන්නකෝ. පහළ ටික කියවන්න කලින් හිතෙන උත්තරෙත් කමෙන්ට් එකක් දාන්න. අපි බලමුකො කවුද හරියටම කියන්නෙ කියල.

රජෙකුට වගේ ඔටුන්නක් ඇති
මුදලාලිගෙ වගේ බඩක් ඇති
වඳුරෙකුගෙ වගේ නැට්ටක් ඇති...!

මේකෙන් කියවෙන්නෙ පළතුරක් ගැන. තව පදයක් තිබුණ ද නැද්ද කියල මට මතක නෑ. ඒත් දන්න කෙනෙකුට නම් මේ ටික ඇති වෙයි උත්තරේ දෙන්න. මේ පළතුර ලංකාවෙ සමහර ප්‍රදේශවල තමයි දකින්න ලැබෙන්නේ. විශේෂෙන් ලංකාවේ දකුණු පළාතෙ කළපු / මුහුදට ආසන්න ගංඟා ආශ්‍රිතව ගොඩක් දකින්න ලැබෙනවා. ඉතින් මේ හැම අවශ්‍යතාවයක්ම ත්ෘප්ත කරන ප්‍රදේශයක ජීවත් වෙන මටත් මේ කියන පළතු‍ර සමීපයි.

කිරල! ඒ තමයි මං මෙච්චර වෙලා කතා කරපු පළතුර. රතු/ රෝස පාට කෙඳි කෙඳි මලක් පිපෙන මේ ශාකයේ විශේෂත්වයක් තියෙනවා. ඒ මේ ශාකයේ මුල්. ඒව පොළවෙන් ඉහළට එන ආකාරයට තමයි පිහිටන්නේ. පොඩි කාලෙ විද්‍යාව පරිසරය පාඩම් මතක ඇතිනේ. මේවට කියන්නේ වායුධර මුල් කියල. මං දන්න තරමින් නම් හේතුව තමයි මේ ශාකය වැවෙන කඩොලාන ආශ්‍රිත මඩ සහිත පරිසරයේ ඔක්සිජන් අඩුයි. ඒ නිසා මේ ජලයෙන්/ මඩෙන් උඩට වැඩෙන මුල් හරහා වායු හුවමාරුව හොඳින් වෙනවා. බෝතල් මූඩි විදියටත් ඉස්සර කිරල මුල්වලින් හදන ඇබ ගත්තලු. ඒවා හරිම සැහැල්ලුයි. වතුරට දැම්මොත් පාවෙනවා.

මං අද කතා කරන්න යන්නේ මේ ශාකයේ එන පළතුර ගැන. මගේ ප්‍රියතම පළතුරුවලින් එකක් මේක. මේ පළතුර බීම වර්ග හදන්න ගන්නවා. අන්න ඒකට තමයි මං කැමති. ගෙඩි දෙකට කඩන්න පුළුවන් අතෙන් තද කරල. ඒම කැඩුවම ඇතුළෙ චූටි ඇට ගොඩාක් තියෙනව. මේ ඇතුලේ තියෙන මදයෙන් තමයි බීම හදන්නේ. සමහරු මේ බීම එකට පොල් කිරිත් දානවලු. මං නම් ආස පැණි රහට හදන බීම එකට. මතක් වෙද්දිත් ආයෙ බොන්න හිතෙනවා.

මේ කිරල ගෙඩියෙ උඩ තියෙනව ඔටුන්නක් වගේ එකක්. අන්න ඒකට තමයි අර රජෙකුගෙ වගේ ඔටුන්නක් ඇති කියල කියන්නෙ. ගෙඩියෙ අනිත් පැත්තේ තියෙනව නැට්ටක්. නිකන් බැලුවම හිතෙන්නේ ඒ නැට්ටෙන් තමයි ගෙඩිය ගහට සම්බන්ධ වෙන්නේ කියලා. ඒත් මේ ගහේ ඒක වෙනස්. ඔටුන්න පැත්තෙන් තමයි ගහට සවි වෙන්නේ. අනිත් පැත්තෙ නැට්ටක් වගේ පෙනුනට එතතින් නෙවෙයි. (රූපේ පේනවට වඩා දිග නැට්ටක් තියෙනවා.) ඔටුන්න වගේ කොටස ගැළෙව්වොත් ඇතුළෙ රෝස පාට රවුමක් දකින්න පුළුවන්.

මට කියන්න අමතක වුණා. මේ පළතුරේ ඉංග්‍රීසි නම තමයි mangrove apple කියන්නේ. නමෙන් ම තේරෙනවනේ කොහෙද මේව තියෙන්නෙ කියල. මේ පළතුරේ අධික පැණි හා ඇඹුල් රස නිසා සමහර ගෙඩිවල පණුවෝ ඉන්නවා. ඉතින් කොච්චර ආස වුණත් ගෙදර හදපු කිරල බීම විතරයි මං නම් බොන්නේ.

අධික සුවඳකින් යුක්ත පළතුරක්. මදය පොඩිකරල වතුර ටික ටික දදා පෙණේරයක් භාවිත කරලා පෙරා ගන්නවා. ඉතිරි වෙන ඇට ටික අයින් කරනවා. මේ තද ඇට නිසා බ්ලෙන්ඩර් කරල ගන්න එක එච්චර සාර්ථක නෑ. අතින් පොඩි කරල ගන්න එක තමයි හොඳ.

සාමාන්‍යයෙන් කිරල විකුණන්නේ වැලක් විදියට. මේකට පාවිච්චි කරන්නේ ඉරට්ටක්. ගෙඩිවල ඔටුන්න විදගෙන ගෙඩිය හරහා යන විදියට ඉරෙට්ට යවලා ගෙඩි ටික අමුණලා තමයි කිරල වැල් හදන්නෙ. සාමාන්‍යයෙන් මේ වැලක ගෙඩි 10ක් විතර තියෙනවා. රුපියල් 100ක් විතර වෙනවා. මේ පැත්තෙ නම් සමහර තැන්වල එහෙම ගන්න තියෙනව. මේ පහු වෙන්නෙ කිරල වාරය. ගොඩක් තැන්වල විකිණන්න තියෙනව මං දැක්කා. මේ කිරල ගෙඩි නම් පහළ ගඟ ළඟින් අහුලන් ආවේ තාත්තයි මල්ලියි.

ආයෙ දවසක චායාරූප එක්ක කිරල ගහ ගැනත් කියන්නම. අදට මේ ඇති. අවස්ථාවක් ආවොත් කිරල බීම ටිකක් බීල බල්නන. ඔයත් කැමති වෙයි.