පිරිත් නූල | 5% to SL Charity

පිරිත් කියන්නෙ ගොඩක් පූජණීය දෙයක් වගේම පිරිත් නූල්ත් ගොඩක් පූජණීය දෙයක්. ඉස්කෝලෙ කාලෙ ඉඳන්ම පිරිත් නූලක් මගේ අතේ වැරදුණේ නෑ. ඒ කාලෙ අපිට පට තුනකට වඩා මහත පිරිත් නූල් බඳින්න අවසර දුන්නේ නෑ. දවස් තුනකට වඩා පරණ නූලුත් ගලවන්න කියනවා. පිරිත් නූලක බල තියෙන්නෙ දවස් තුනයි කියල විස්වාසයක් මිනිස්සුන්ගෙ තියෙනවා. ඒ නිසා තමයි එහෙම දවස් තුනකට වඩා පරණ නූල්වල බල නැහැ කියල ඉස්කෝලෙදි ගැළෙව්වේ.

තව කතාවක් තමයි නිර්මාංශික අයගෙ අත්වල තියෙන පිරිත් නූල්වල බලය දවස් තුනට වඩා තියෙනව කියන එක. ඕවගෙ ඇත්ත නැත්ත නම් මං දන්නෙ නෑ. ඒත් මට අතේ පිරිත් නූලක් නැති වුණාම අත පාළුයි. මං ආභරණ පළඳින්න කැමති කෙනෙක් නෙවෙයි. ඒත් මට මේ පිරිත් නූල නම් නැතුව බැරි දෙයක්. ඇත්ත නැත්ත මොකක් වුණත් පිරිත් නූලක් අතේ තියෙද්දි මට ආරක්ශිත හැඟීමක් දැණෙනවා.

ඉස්සර ඉඳන්ම මට පිරිත් නූල් ගෙනත් දෙන්නේ ළඟ ගෙදරක සීයා කෙනෙක්. එයා පිරිත් කියන්න යන කෙනෙක්. ඒ නිසා එහේ පිරිත් නූල් වරදින්නේ නෑ. එයා උදේ හවස පැය ගාණක් පිරිත් කිය කිය බුදුන් වඳිනවත්. සාමාන්‍යයෙන් අපෙ ගෙදර එනව නම් අනිවාර්‍ය්‍යෙන් පිරිත් නූලක් ගෙනත් දෙනවමයි. ඒත් මේ කොරෝනා එක්ක මිනිස්සු යන එන එක සීමා වුණ නිසා මේ දවස්වල පිරිත් නූලක් ලැබෙන්න එක්කො පන්සල් යන්න ඕන. නැත්නම් කොහෙන් හරි කලාතුරකින් ලැබෙන එකක් තමයි.

අද හවස බුදු පහණට මල් පූජ කරන්න යද්දි තමයි දැක්කේ පිරිත් නූල් මිටියක්ම එතන තියෙනවා. මට ඉහේ මලක් පිපුණා වගේ. අම්මා හොයන් ගිහින් ඇහුවම අම්මා කිව්වා, එයා කලින් දවසක් පොල් තෙල් මෝලෙන් හිඳගෙන ආපු පිරිසිඳු පොල් තෙල් අර සීයට යවපු නිසා ඒකට පිළිතුරක් විදියට අර සීයා පිරිත් නූල් මිටියක්ම එවල කියල. මාත් ඉතින් ඉක්මනට ඒකෙන් අතට සෑහෙන ප්‍රමාණයක් කඩාගෙන බැඳගත්තා. එතකොට තමයි අතයි හිතයි දෙකම පිරුණේ.

සාමාන්‍යයෙන් පිරිත් නූල කතුරෙන් කපන්නෙ නෑ. පිරිත් කරන්න ගන්න නූල පට තුනකින් තියෙනවා. ඒක අතින් කඩන්න පුලුවන්. ගළවන පිරිත් නූල් පෑගෙණ තැන්වල දාන්නෙත් නෑ. සාමාන්‍ය‍යෙන් ගහක අත්තක හරි මල් පෝච්චියක් උඩ හරි තියන්වා මං නම්. ගොඩක් වෙලාවට තරුණ අය අත්වල බැඳන් ඉන්න පාට නූල් පිරිත් නූල් නෙවෙයි. අර දේවාල වගේ තැන්වල විකුණන නූල්නෙ ඒවා.

පිරිත්වල, පිරිත් නූල්වල ඇත්තටම බලයක් තියෙනව ද? මේවා සමාජයේ සංවාදයට බඳුන් වුණ කාරණා. මං ඉස්කෝලෙ කාලෙ ඉස්කෝලෙ තිබුණ දේශනයක් මට මතකයි. ඒකේ දි කතා වුණා මේ දේ ගැන. ලංකාවෙ කරපු පර්‍යේෂණ නෙවෙයි. ඒවගෙන් ඔප්පු කරල තිබ්බා පිරිත් වලින් ජල අණුවලට බලපෑමක් කරනවා කියල. එයාල ජල අණු භාවිතයෙන් තමයි මේක පරීක්ශා කරලා තිබ්බේ. ඒ වගේම අමිහිරි දේට නිරාවරණය කරපු ජල අණුත් ඍණාත්මක විදියට වෙනස් වෙනවා කි‍යල ඒකෙන් ඔප්පු වෙලා තිබුණා. මට ඒ රූප රාමු තාම මතකයි.

පිරිත් කියන්නෙ බුදුන්වහන්සේ වදාළ ධර්මයනේ. ඉතින් මේ කතාව ඇත්ත වෙන්නත් පුළුවන්. විවිධ රෝග බිය, අමනුශ්‍ය බිය වගේ තුන් බිය නැති කරන්න පිරිත් කිව්වා කියල අපි ශාසන ඉතිහාසයේ අහල තියෙනවනෙ. අලුතෙන් ගෙදරකට යද්දි, නිවැසියෙක් මිය ගියහම, ලෙඩකදි දුකකදි, ආරක්ෂාව, සෙත් ශාන්තිය ප්‍රාර්තනා කරල තමයි අපි පිරිත් කියන්නෙ. ලෝකෙ කොච්චර ඉස්සරහට ගියත් මේ දේවල් බොරු කියල අපිට බැහැර කරන්න නම් බෑ. අපිට පේන දේට වඩා නොපෙනෙන දේ බොහොමයිනේ. 🌸