ගළවාගැනීමේ මෙහෙයුම | 5% to SL Charity

_{image from pixabay}
ඊයෙ අපි සාලේ ඉඳන් ටීවී එක බල බල ඉන්නකොට ජනේලෙන් එළියෙ අමුතු සද්දයක් දිගටම ඇහුණා. සාමාන්‍යයෙන් අපේ ගෙදර අධි සංවේදී කණ් දෙකක් තියෙන්නෙ මට. ඉතින් මේකත් මුලින් ම දැනුණේ මට. මුලින් මං ගණන් ගත්තේ නෑ. ඒත් දිගින් දිගටම එකම සද්දෙ එද්දි මාත් ටිකක් බැලුවා. එතකොට තමයි දැක්කෙ වෙන්නෙ මොකක්ද කියල.

ඒක ගළවාගැනීමේ මෙහෙයුමක්. මාර වැඩේ. පැණි කුරුල්ලෙක් හිර වෙලා. කාටවත් බේරගන්න බැරි තැනක. අපිත් උඩ බිම බැලුවා. දැන් මොකද කරන්නේ? බේරගන්න එතනට යන්නත් බෑ. ඒ වෙද්දිත් තව එක්කෙනෙක් වැඩට බැහැලා. මාර මහන්සියක් වෙනවා හිර වෙච්ච එක්කෙනාව බේර ගන්න. අපිට තිබ්බෙ බලන් ඉන්න විතරයි.

අපි නිකන් බලන් හිටියට අර‍යා නම් නිකන් හිටියෙ නෑ. හිර වෙච්ච තැනට උඩින් යනවා, යටින් යනවා, මැදින් යනවා. එක කලබලයක්. මං ඉතින් නූතන මහජනතාවගෙ වගකීම ඉටු කරා. ඒ මොකක් ද කියලද බැලුවේ. ඇයි දැකල නැද්ද? මොන තැනක කොහෙ කාට කරදරයක් වුණත් මිනිස්සු සාක්කුවට අත දානවා, ෆෝන් එක එළියට ගන්නවා, වීඩියෝ කරනවා.

රිය අනතුරක් වුණත්, කවුරු හරි වතුරෙ ගහගෙන ගියත්, රණ්ඩුවක් වුණත්, කාටහරි කරදරයක් වුණත්, ඒමත් නැත්නම් රණ්ඩුවක් වුණත් බේර ගන්න කෙනෙක් නැති වුණාට වීඩියෝ සාක්ශි නම් එමටයි. ඒ අපේ කට්ටිය පොදුජන වගකීම් ඉශ්ට කරන නිසා. 😅 ඉතින් මාත් කරේ ඒකමයි. ෆෝන් එක ගත්තා. වීඩියෝ කරා.

මං කිව්වනේ හිර වෙලා හිටියෙ කවුද කියල. එතකොට බේර ගත්තේ කවුද? හිර වෙලා හිටියේ කොහෙද? ඒ ටිකනෙ කිව්වෙ නැත්තේ. බලන්නකො හිතාගන්න පුළුවන් ද කියල ඒවට උත්තර. 🙊

හිතපු එක හරි. එයා තමන්ගෙම රූපෙට තමයි රැවටුණේ. අහම්බෙන් වාහනේ කණ්ණාඩියෙන් එයාවම දැක්කම හිතන්න ඇත්තේ තව එයා වගේ කෙනෙක් ඒක ඇතුළේ හිර වෙලා කියල. ඉතින් එයා මාර විදියට උත්සාහ කරා එයාවම බේරගන්න. අපි මොකක් කරන්නද ඉතින්. සිංහලෙන් කියල තේරුම් කරන්න බෑනේ.

අපේ තාත්තා කිව්වා මතකයි ඉස්සර එයාලගෙ කෑම්ප් එකේදිත් මේ වගේ දේවල් වෙනවලු. එතන තිබිල තියෙනව එළියේ හදපු නානකාමර පද්ධතියක්. ඒවට සවි කරපු කණ්ණාඩි වඳුරෝ ඇවිත් සොලවල සොලවල කඩල බිඳලා දානවලු. අන්තිමට බැරිම තැන වටෙන්ම කවර් කරල එන්න බැරි විදියට හදන්න වුණාලු. ඒකටත් හේතුව මේකම තමයි කියල හිතාගන්න පුළුවන්නේ. 😅