සඳ තරු අතරේ අතරමං වෙන්න ගිය ගමන
සති අන්තය කියන්නේ හරියට බොම්බයි මොටයි වගේ දෙයක්. ඒක බොම්බයි මොටයි වගේ රසවත් වගේම ඒ පැත්ත බලලා මේ පැත්ත බලද්දි දියවෙලා යනවා. රස විතරක් මතකයේ ඉතුරු කරලා. බාල මහලු තරුණ සියලු දෙනාම ඉතාමත් ආසාවෙන් බලන් ඉන්න දවස් දෙකක් තමයි සති අන්තය කියන්නේ. සතිය පුරාම එක දිගට වැඩ කරලා සති අන්තයේ නිදහසේ ඉන්න අපි හැමෝම කැමතියි. ඉතින් ඒ විදිහට පසුගිය සති අන්තයේ විනෝදයෙන් ගත කරන්න මට අවස්ථාවක් ලැබුණා. මගේ රැකියා ස්ථානයේ මිතුරන් සමඟ ග්‍රහලෝකාගාරයක් බලන්න යන්න අපිට පුළුවන් වුණා. පුංචි කාලයේ කොළඹ තියෙන ග්‍රහලෝකාගාරය බලන්න ගියාට පස්සේ ජීවිතයේ එහෙම අවස්ථාවක් ලැබිල තිබුනෙ නෑ. ඉතින් ඒක හරිම අපූරුව අත්දැකීමක් උනා.
ඒ ග්‍රහලෝකාගාරය නම් කරලා තියෙන්නේ ශ්‍රී ජවහල්ලාර් නේරු තුමාගේ නමින්. බැංගලෝරයේ තමයි ඒක පිහිටලා තියෙන්නෙ. අපිට රියදුරෙකු සමග බස් රථයක් ආයතනයෙන් ලැබුණා. අපි උදේ අටයි තිහට විතර මේ ගමන පිටත් වුණා. ඉන්දියාවේ මාර්ගවල වාහන තදබදයත් එක්ක අපි එතැනට ළඟා වෙද්දි උදේ දහය විතර වෙලා තිබුණා. ඊට පස්සේ අපි ප්‍රවේශ පත්‍ර පෝලිමට එකතු වුණා. අපි දහයයි තිහේ දර්ශනය සඳහා ටිකත් පත් මිලදී ගන්න කටයුතු කළා. එතන ටිකට් පතක මිල වුනේ ඉන්දියන් රුපියල් 75 ක් විතරයි. එතන දර්ශනය පටන් ගන්න විනාඩි තිහක් විතර කාලයක් තිබුණු නිසා ඒ කාලේ වටපිටාවේ ඇවිදිමින් ඡායාරූප කිහිපයක් ලබාගන්න මට පුළුවන් වුණා.
එතන විද්‍යාත්මක දේවල් ප්‍රායෝගිකව පෙන්නන්න හදපු උද්‍යානයක් තිබුණා. ඒක හරියට විනෝද උයනක් වගේ. එතැනට යන එන අයට විද්‍යාත්මක කරුණු ඉගෙන ගන්න ගමන් විනෝද වෙන්නත් පුළුවන්. ඒ අතර මගේ හිත ගත්තු තවත් එක නිර්මාණයක් තමයි ඉන්දියාව විසින් කක්ෂගත කරපු චන්ද්‍රිකාවක අනුව. ඒක යෝධයෙක් වගේ එතන ඉඳගෙන ඒ ස්ථානයට හරිම අභිමානයක් එකතු කරනවා. තවත් බොහෝමයක් නිර්මාණ බලලා අපි ග්‍රහලෝකාගාරය තුළට ඇතුළු වුණා. ඇතුලේ දර්ශනය පටන් ගන්න කලින් මම ඡායාරූප කිහිපයක් ලබා ගත්තා. දර්ශනය පටන් ගත්තට පස්සෙ නම් දුරකථන භාවිතා කිරීම තහනම් වුණා. ඒ නිසාම එම දර්ශන වල මතකයන් හිතේ විතරක් තියාගන්න අපි හැමෝටම සිද්ධ වුණා. එහිදී ප්‍රදර්ශනය වුනේ මිනිසා පියවරෙන් පියවර අභ්‍යවකාශය ජයගත්තු ආකාරය පිළිබඳවයි. ප්‍රථම අභ්‍යවකාශ ගමන ප්‍රථම සඳ ගමන වගේ දේවල් හරි අපූරුවට එහි නැවත ප්‍රතිනිර්මාණය කරලා තිබුණා. පැයක පමණ ඉතාමත් වටිනා දර්ශනයක් අවසානයේ අපි එළියට පැමිණියා.
එදා හරිම රස්නේ තිබුණු දහවලක්. ඉතින් ඒ නිසාම අපි අයිස් ක්‍රීම් කන්න තීරණය කරා. එතන අයිස් ක්‍රීම් වර්ග කිහිපයක්ම තිබුණත් බ්ලැක් කරන්ට් කියන අයිස්ක්‍රීම් වර්ගය කන්න අපි හැමෝම තීරණය කරා. ඒ අයිස් ක්‍රීම් කෝන් එකක මිල වුණේ ඉන්දියන් රුපියල් තිහක් පමණයි. මේ ඡායාරූපයේ ඉන්නේ අයිස් ක්‍රීම් එකක රසවිදින මගේ මිතුරෙක්.
ඊට පස්සේ අපි දවල් 12ට විතර එන්න පිටත් වුණා. එදා වරුවක පමණ විනෝද ගමන අවසාන කරලා අපි නැවතත් බෝඩිමට ආවා. ඔන්න ඔය විදිහට තමයි වාෂ්පෙලා යන සති අන්තයේ ආරම්භය පටන් ගත්තේ. ඉතින් මම ඔයාලටත් කියන්නේ ජීවිතයේ අන්තිමට ඉතුරු වෙන්නේ අත්දැකීම් හා මතකයන් විතරයි. ඉතින් ඉඩක් ලැබෙන හැම වෙලාවකම හිනා වෙලා විනෝදෙන් ඉන්න උත්සාහ කරන්න. සුභ දවසක් යාලුවනේ.
සති අන්තය හැමෝටම ඒ වගේ. ඉක්මනින් වාෂ්ප වෙලා යනවා.හැබැයි සතියන්ගේ විනෝදයෙන් ගත කරන එක තමයි අපි හැමෝගෙම තිබෙන ආසාව.විවිධ ආහාර වර්ග ගැනීමට සහ විවිධ විනෝදජනක ගමන් යෑමට අපි නිතර නිතර සැලසුම්කර සති අන්තය වන තෙක් බලා සිටින්නේ අපගේ මානසික තෘප්තිය උදෙසා කාර්යබහුල ජීවිතයෙන් මිදී කාලය ගත කිරීමට.කෙසේ වෙතත් ඔබ ගතකළ කාලය සුන්දර බව පෙනේ.ඔබට සුභ පැතුම් මිත්‍රයා👍
බෙහෙවින්ම ස්තූතියි ඔබට