නිවන් සුව කිවිඳුනි

කවිය කියන්නේ සිංහල සාහිත්‍යයේ සුවිශේෂී සාහිත්‍යාංගයක්. සඳැස් කවි, නිසඳැස් කවි, ජනකවි , වස් කවි වගේ අනු ඛණ්ඩ වලට කවිය බෙදා වෙන් කරන්න පුලුවන්. ඒ අතරින් හිටිවන කවිය කියන්නේ වෙනස්ම ආරයක්. ඉහත කී සියලුම කවි ආර වලට වඩා හිටිවන කවිය ඉතා විශේෂයි. ඒ වගේම හිටිවන කවියෙක් වෙන්න ද සුවිශේෂී හැකියාවක් තියෙන්න ඕන. හිටිවන කියන වචනයේ තේරුම තමයි හිටිහැටියේම හෙවත් පෙර සූදානමක් නොමැතිව කවිය ඉදිරිපත් කිරීමයි. අවස්ථාවට අනුව කවියා ගේ හිතේ ඇතිවෙන අදහස් කවි කර දැක්වීමක් හිටිවන කවියේදී සිදුවේ. එම නිසා එයට විශේෂ හැකියාවක් තිබිය යුතුය.

මම අද මේ ලිපිය ලියන්න අරමුණ වුණේ අපේ රටේ හිටිවන කවියේ යෝධයකු වුණු වුණු මාකඳුරේ අමරසිංහ කිවිඳුන්ගේ හැර යාමයි. එතුමා ගුණ කථනයක් සිදු කළ යුතුම කවියෙක්. එතුමා අවුරුදු අසූවකට වැඩි කාලයක් ආයු වළඳා හිටිවන කවි වේදිකාවේ දක්ෂතා දැක්වූ කවියෙක්. මා දන්නා තරමින් හිටිවන කවි වේදිකාවෙ ඔහුගේ හැකියාවට අභියෝග කරන්න සමතෙක් හිටියේ නෑ. මං ඒ තරමටම ඔහුගේ කවිය පරිපූර්ණයි. මම මේ ලිපිය ලියන කොට එතුමා සමු අරන් ගිහින්. කිවිඳුනි මෙම කවි පෙල ඔබට උපහාරයක්ම වේවා.

ගසමින් මැස්ස හිටිවන වැල යන අතට
කවි මැව්වේය ලය මත් ගලපා තිතට
රළු තැන රළුව තෙත තැන අමුණා තෙතට
ඔබ පෑ සියලු කවි සිසිලකි මගෙ හිතට

හිටිවන කවිය කවි මඩුවල කඩුවක් ය
ඔබෙ වචනයෙන් නම් ඔබ හරි බඩුවක් ය
වාදෙට පැටලුණොත් එය හරි නඩුවක් ය
ඔබෙ කවි නොමැති තැන එය හරි අඩුවක් ය

හිටිවන කවිය ගිලෙනට නොම දී අඳුරේ
එක් එක රටා විව්වෙකි නුඹ කවි පැදුරේ
මුල හෙලවිලා ඇත රිදෙනට කවි පඳුරේ
අම මහ නිවන් සුව කිවිඳුනි මා කඳුරේ

අමරසිංහ කිවිඳුන් කියන්නෙ ඇත්තටම කවි කලාවේ අපූරූ දායාදයක්. එතුමා කවි කියන වේදිකාවක් කියන්නෙ සිනා සාගරයක්. හිටිවන කවි මඩුවල කවි සංවාද සඳහා එතුමා තරම් දක්ශයෙක් මම දැකලා නෑ. ප්‍රතිවාදියා විසින් කුමන එල්ලයක් ඔස්සේ කවි ඉදිරිපත් කලද මැනවින් ලය, විරිත, එලිවැට ගලපලා කවි කියන්න එතුමාට හැකියාවක් තිබුනා. ඔබගේ රස වින්දනය උදෙසා එතුමා සහභාගි වූ කවිමඩුවල වීඩියෝ දර්ශන කිහිපයක් යූටියුබයෙන් උපුටා දක්වමි.

_{වීඩියෝව යූ ටියුබයෙනි}

දැන් ඔබලාට පැහැදිලි ඇති එතුමාගේ දක්ශතාවය. අපේ කලා කෙතට තවත් සම්පතක් ඒ විදිහට නැති වුනා. අපි සියලු දෙනාම එතුමාට නිවන් සුව පතමු. කේයස්,කුමරතුඟු ,කුඩලිගම පරපුරේ කිරුළු නොපලන් කිවිඳුනි ඔබට අමා මහ නිවන්සුව ලැබේවා.