මේ දවස්වල මං - 5% to Sl Charity

ඉතින් කොහොමද කට්ටියට... මේ දවස් ගැනනම් ඉතින් කතා කරන්න දෙයක් නෑ කියලා තමයි හැමෝටම කියන්න තියෙන්නේ කියලා මං දන්නවා. මේ වෙද්දීනම් හැමෝම වගේ බලාගෙන ඉන්නේ අයවැය ගැන තමයි. ඒ කියන්නේ මොනවගේ පුදුම කිරීමකට අපිට මුහුණදෙන්න වෙයිද කියලා තමයි හැමෝම බලන් ඉන්නේ, ඒ තරමට පාලකයෝ ගැන විශ්වාසයි අපිට😂😂. මං මේ කියන්නේ පැත්තක් අරගෙනනම් නෙවෙයි. මතක තියෙන කාලෙ ඉඳලා ලබපු අත්දැකීම් එක්ක තමයි මෙහෙම කියන්නේ.

ඉතින් ඊයේ දවල් මං පොඩි වැඩකට ගියා කොට්ටාවට ගිහින් එන්න. රාජගිරියේ තියෙන අපේ ඔෆිස් එකෙන් තමයි ගමන පටන්ගත්තේ. යන්න තියෙන ලේසිම පාර තමයි පාර්ලිමේන්තුව පැත්තෙන් ගිහින් යන එක. පුරුදු පාර හින්දා පාගලා යන්න පුලුවන් කියලා හිතාගෙන හැරෙව්වා දියත උයන ලඟින් පාර්ලිමේන්තුව පැත්තට. ඔය කොරලා තියෙන්නේ කියලා හිතුනා දාගෙන ටික දුරක් යනකොට. හැමතැනම ආරක්ෂක අංශවල නිලධාරීන් පිරිලා. ඒත් මං බැලුවා මේ මොකද්ද මේ කියලා. වෙනදට දවල් තියෙනවට වඩා වාහන තදබදයත් වැඩියි. අර මං පාගලා යනවා කියලා හිතපු එක නිකන් විහිළුවක් වෙලා කියලා මට තේරුණා. ඔන්න එතකොට මට ඇහුනා වාහනේ රේඩියෝ එකේ කියනවා අද අයවැය ඉදිරිපත් කරනවා කියලා. ඔන්න ඒ වෙලාවේ තමයි මට තේරුනේ මං කරගෙන තියෙන වැඩේ ගැන. මගේ හිත කෑගහල කියනවා ඇහුනා "ඔයා තමයි හොඳටම කරලා තියෙන්නේ කියලා " 😂😂. දැන් ඉතින් මොනවා කරන්නද. ඒ වාහන පෝලිමේ ගාට ගාට ගියා. අපරාදේ පෙට්‍රල් ටික 😭😭. කමක් නෑ අපිට හොඳ රටක් ගෙනෙන්නනේ මේ හැමදේම කරන්නේ, ඒ හින්දා එයාලා ආරක්ෂා වෙලා ඉන්න ඕනිනේ කියලා හිත රවට්ටගෙන ගියා.

ඔන්න ඉතින් කොට්ටාවට ගිහින් එතන වැඩ ටිකත් කරගෙන ආපහු එන්න පටන්ගත්තා. එද්දී හොඳටම කරගෙන ආව හින්දා දැම්මා වෙන පැත්තකින්. හොඳ වෙලාවට කලින් වගේ තදබදයක් නැතුව ආපහු එන්න පුලුවන් උනා. ඒත් ඉතින් එයාලා ඉදිරිපත් කරලා තිබුණු අයවැය යෝජනා ඇහුවම මට ආයෙත් හිතුනා අපරාදේ පුච්චපු පෙට්‍රල් කියලා. ඒ තරමට සන්තෝසයි ඒ යෝජනා ටික දැක්කම 😁😁.

ඔන්න ඉතින් සයිට් එකට ඇවිල්ලා වැඩටික කරගෙන යද්දී රෑ වෙනකන් කරන්න වැඩ වගයකුත් තියෙනවා කියලා පෙනුනා. කමක්නෑ ඕ.ටී ගෙවනවනේ කියලා ගෝල බාලයෝ ටිකට වැඩටික පැහැදිලි කරලා බෙදලා දුන්නා. එයාලත් ඉතින් බලන් ඉන්නේ ඕ.ටී පාරක් කරගන්න කියලා. ඉතින් හවස 6 වගේ වෙද්දී ගෙදරින් කෝල් එකක්. වෙනදට ඒ වෙලාවට එන්නේ රෑට කන්න මොනවද හදන්නේ කියලා අහන කෝල් එක උනත් මේක වෙනස් එකක්. වයිෆ්ට ඔලුවේ කැක්කුමක් හැදිලා හොඳටම වැඩිවෙලා. ඉතින් ඒ වෙලාවෙම එයාට බෙහෙත් ගන්න යන්න ලෑස්තිවෙන්න කියලා මට යන්න උනා. සිකුරාදා හවස හින්දා ලොකු වාහන තදබදයක්. එහෙන් මෙහෙන් අස්සෙන් දාගෙන ගියා බෙහෙත් ගෙනෙන්න යන්න. ඩොක්ටර් කිව විදියටනම් එයාට ටිකක් ස්ට්‍රෙස් එක වගේලු. නිදිමරන්න එපා කියලා බෙහෙත් වගයක් දුන්නා. චොකලට් කන්නත් එපා කීවා. ඉතින් ඒ හින්දා ගෙදර තිබුණු චොකලට් ටික මං තනියම කාලා ඉවරයක් කරනවා කියලා ඒ වෙලාවෙම හිතාගත්තා 😁😁. රෑට කන්න කොත්තුත් අරන් අපි ගෙදර ගියා. දැන්නම් බෙහෙත් වලට ටිකක් අඩුයි කියලා තමයි මං කතා කරපුවම කීවේ. ඒත් ඒ චොකලට් පෙරේතකමේද කියලනම් මට සැකයි 😁😁😁.