අවියකින් නිහඬ කල අපූරු මිනිසෙක්

ලංකාව ගැන කතා කරනකොට ගොඩක් වෙලාවට බොහෝ පිරිසක් කියන්නේ ලංකාව සාරධර්ම අතින් ඉහලින්ම ඉන්න සදාචාර්මය අතින් ඉහළින්ම වැජඹෙන අපූරු රටක් විදියට. හැබැයි මේ වෙනකොට ඒ ලස්සන සමාජය ටිකක් පිරිහිලා. අපි මොනයම් හෝ මාතෘකාවක් ගැන ගැඹුරින් කතා කරොත් ඒ වගේම අසාධාරණයට විරුද්ධව නැගී සිටියොත් අපේ හඬ නසන්නට බොහෝ පිරිසක් උත්සාහ දරනවා. ඒ ගැන මට වගේම ඔබටත් නොයෙක් ආකාරයේ අත්දැකීම් ඇති.

පහුගිය කාලයේ ලංකාවේ දේශපාලනමය තත්ත්වයත් එක්ක ආර්ථිකමය පිරිහීම් ගැනත් ඒවායේ ප්‍රතිඵල ගැනත් කතාබහට ලක්වුණා . ඒ අතරින් ලංකාවේ පොහොර ප්‍රශ්නය, ගොවීන්ගේ ප්‍රශ්න වගේම ආහාර පිළිබඳවත් බොහෝ සෙයින් කතාබහ කෙරුණා. විශේෂයෙන්ම ආහාරවලට එක් කෙරෙන පිළිකාකාරක ද්‍රව්‍ය සහ වෙළද පොළේ විකිණීමට තිබෙන ඇතැම් නුසුදුසු ආහාර පිළිබඳවත් බොහෝ කරුණු හෙළිදරව් වුණා.

මේ කරුණු පිළිබඳව හෙළිදරව් කරන්නට සෞඛ්‍ය ක්ෂේත්‍රයේ බොහෝ පිරිසක් ඉදිරිපත් වුණා. ඒ අතරින් මහජන සෞඛ්‍ය පරීක්ෂක රොෂාන් කුමාර මහත්මයා විශාල සේවයක් ඉටුකළා.

මම රොෂාන් මහත්මයාව හඳුනන්නේ ගොඩක් පුංචි කාලෙ ඉඳලා. ඒ ඔහු මගේ අම්මා සමග බද්දේගම සෞඛ්‍ය සේවා නිලධාරි කාර්යාලයේ සේවය කළ නිසා .එතුමා ප්‍රසිද්ධ වුණේ නීතියට වැඩ කරන ඒ වගේම බොහොම කරුණාවන්ත, ගුණ යහපත් පුද්ගලයෙක් විදියට. දුකකදී කරදරයකදී කිසිම වෙහෙසක් නොබලා තමන්ට පුළුවන් උපරිමයෙන් උදව් කරන කෙනෙක් විදියට. අම්මා විශ්‍රාම ගියාට පස්සේ නිතර හමු නොවුනත් අතීත මතකයන් ගැන කතා කරනකොට අම්ම නිතරම රොෂාන් මහත්මයව මතක් කලා.

හැබැයි ටික කාලෙකට පස්සේ ආයෙමත් රොෂාන් මහත්මයාව මතකයට ආවේ නම් එතරම් සුන්දර පුවතක් එක්කනම් නෙමෙයි. පහුගිය සතියේ සඳුදා ඔහුව ඉතාමත් කුරිරු විදියට ඔහුගේ නිවසේදී ඝාතනය කර තිබුණා. එතරම් සුන්දර නිහතමානී පුද්ගලයෙක්ව තමන්ගේ පුංචි දරුවා අබියසදී ඒ විදියට කුරිරු විදියට ඝාතනය කළේ කොහොමද කියල තාමත් හිතාගන්න බැහැ.

අපි ඔහුගේ අවසන් කටයුතුවලට සහභාගි වෙනකොට ඉතා විශාල පිරිසක් ඒ සඳහා සහභාගී වෙලා තිබුණා. ඒ තමයි ඔහු ඔහුගේ ජීවිත කාලය තුළ එක් රැස් කරගත් වත්කම. කිසිම කෙනෙක්ගෙ කටින් ඔහු පිළිබඳව කිසිම නරක වදනක් පිට වුණේ නම් නැහැ. කොතරම් නිහතමානී වුණත්, කෙතරම් කාරුණික මිනිසෙක් උනත් අසාධාරණයට සහ අයුක්තියට එරෙහිව හඬ නගපු නිසා තමන්ගේ ආදරණීයයන් අතහැරලා ඔහුට සදහටම ජීවිතයෙන් සමුගන්න සිදුවුණා.

දිනෙක ඔහුට නීතියෙන් සාධාරණයක් ඉෂ්ට වුණත්, ඔහු හඬ නැගූ අසාධාරණකම් වලට යුක්තිය ඉටු උනත්, ඔහුගේ ආදරණියන්ට නම් නැවතත් ඔහුව ජීවමානව ලැබෙන්නේ නැහැ.

අවියකට පුළුවන්
නසන්නට එක ගතක්..
නිහඬ කරවන්න බෑ
එයින් නැගි මහ හඬක්...