මුහුද ළඟ මොහොතක්

අපේ ජීවිතේ අපි වැඩිපුරම ආස කරන දේවල් තියෙනවා. අපේ වැඩිපුරම ඉන්න කැමති තැන් තියෙනවා. ඒ වගේ ගෙදරට අමතරව මම වැඩිපුරම ඉන්න කැමති තැනක් තමයි මුහුදු වෙරළ.

හිතේ තියෙන ගොඩක් ප්‍රශ්නවලට අපි නොහිතන විදියේ විසඳුම් හොයාගන්න මේ තැන හරිම ලස්සන තැනක්. කවදාක්වත් නොහිතපු විදියේ දේවල් ගැන හිතන්න මුහුදු වෙරළ කියන්නේ නිස්කලංක තෝතැන්නක්. ජීවිතය ආපස්සට හැරිලා බැලුවම අපි කරපු හොඳ නරක ගොඩක් දේවල් ගැන ආයෙ ආයෙත් හිතන්න ඉඩ දෙන්න මේ තැනට පුළුවන් .

මුහුද රළ කකුල්වල හැප්පෙද්දී ඒ දැනෙන සුවය කියල නිම කරන්න බැරි තරම්. මේ දවස්වල ටිකක් රස්නය වුණත් ඒ මුහුදු හුළඟ නිසා ඇඟට දැනෙන්නේ පුදුම සහනයක්. මුහුදු රළ මුහුදු හුළඟ නිසා දැනෙන මානසික සහනය තවත් තැනකින් ලබාගන්න නොහැකි තරම්.

මුහුදු වෙරළ ලස්සනම ඉර බහින හැන්දෑවට. ඉර බහින විදිය බලාගෙන ඉන්නකොට හුඟක් දේවල් හිතට එනවා. ඒ මොහොත ඇත්තටම චිත්‍රයක් වගේ. ඒ වෙලාවට සිහියට එන්නේ අපි පුංචි කාලේ චිත්‍රයට නගින ඉර බහින හැන්දෑවක්. රැකියාවේ ප්‍රශ්න ගෙවල් දොරවල්වල දේවල් එක්ක අමතක වෙලා ගියපු කවි සිතිවිලි වලට පණ දෙන්න ඒ මොහොත ගොඩක් වටිනවා. පුළුවන්කමක් තිබුණ තිබුණනම් ගතවෙන හැම හවසක්ම මුහුදු වෙරළේ මේ අසිරිය විඳින්න මට නම් තවත් ඒ වගේ දෙයක් නැති තරම්.

හැබැයි මේ මොහොත කොච්චර ලස්සන උනත් හැමදාම මුහුද ළඟ පදිංචි වෙලා ඉන්න අයට, මුහුද එක්ක ජීවිතේ දේවල් බැඳිල තියෙන අයට මෙතන තවත් එක් තැනක් විතරයි. හැබැයි මේ මුහුදු වෙරළ මට නම් ජීවිතේ ගොඩක් අත්දැකීම් ලබා දුන්නු, හරි අපූරු මිනිස්සු එක්ක කාලය ගත කරන්න ලැබුණු , ලස්සන සිතුවිලි වලට ජීවය ලබා දුන්නු , හරිම ආදරණීය අමතක නොවෙන තැනක්.