සති අන්තෙකට පසු කෙටි නිවාඩුවක්
සතිය ඉවර වුණේ දුක්බර අවසානයකුත් එක්ක. ඒ මගේ තාත්තගේ පොඩි අයියගේ අභාවය නිසා. මළගෙදරට පස්සෙන්දා මට කැම්පස් එකේ විභාගයක් තිබුණත් මල ගෙදර වැඩ කටයුතුත් එක්ක හරියට පාඩම් කරන්න නම් ලැබුනේ නැහැ. ඒත් විභාගය කියලා මළ ගෙදර වැඩ කටයුතු අතපසු කරන්නත් බැහැ. කොහොම උනත් හරිම අමාරුවෙන් ඒ සති අන්තය ගෙවලා දැම්මා.
කොහොම හරි ඒ සති අන්තය නිවාඩු දවස් තුනක් එක්ක තිබුන දීර්ඝ නිවාඩුවක් වුණත් ඒ දවස් කීපයේ රෑට නම් මම පැය දෙකකට තුනකට වඩා නිදාගන්න නැතුව ඇති. ඒ නිසාම අද මම නිවාඩුවක් දැම්මා. ඒ ටිකක් වැඩිපුර නිදාගන්නත් එක්ක වගේම මේ සතියේ ඉරිදට තියෙන ඊළඟ විෂයන් දෙකට සූදානම් වෙන්න ඕන නිසා.
ශ්‍රී ලංකා විවෘත විශ්ව විද්‍යාලය කියන්නේ අභ්‍යන්තර උපාධි පිරිනමන රජයේ විශ්වවිද්‍යාලයක්. හැබැයි මේ විශ්වවිද්‍යාලය ඉගෙනගන්න බොහෝ සිසුන් විවිධ රැකියාවල නියුතු වෙන්නන්. උපාධිය පමණක් කරන සිසුන් ඉන්නේ බොහොම අල්ප පිරිසක්. ඒ නිසාම තමයි සති අන්තයේ විභාග කටයුතු සහ අනෙකුත් අධ්‍යයන කටයුතු යොදාගෙන තියෙන්නේ. ඇත්තටම ඒක රැකියා කරන ඉගෙනගෙන සිසුන්ට ලොකු උදව්වක්. ිශ්ව විද්‍යාලයක ඉගෙන ගන්න තරමටම මේක ටිකක් ආතති සහගත වැඩක්. මොකද රැකියාවක් කරන ගමන් උපාධියක් කරනවා කියන්නේ ටිකක් අමාරු දෙයක්. මොකද රැකියාවේ වැඩ කටයුතු වගේම තමන්ගේ වැඩ කටයුතුත් එක්කම දේශනවලට සහභාගි වෙන්නත්, විභාගත්, පැවරුම් කටයුතු කරන්නත් අපිට සිද්ධ වෙනවා.
ගුරුවරයෙක් විදිහට සේවය කරද්දී මේ කටයුතු තවත් ටිකක් අමාරුයි. සමහර දවසට හවසට පාසලේ පන්ති තියෙනවා වගේම දරුවන්ගේ පොත්පත් බලන්න වෙනම වෙලාවක් යොදවන්න සිද්ධ වෙනවා. ඒවගේම මම කරන විෂය ඉංග්‍රීසිත් එක්ක සමහර දුර්වල ශිෂ්‍යයන්ව වෙනම නවත්තගෙන ඉගැන්වීම් කටයුතු කරන්න සිද්ධ වෙනවා. ඉතින් කොහොම වුනත් මං ඒ හැම දෙයක්ම කරන්නේ හරි සතුටින්.
කොහොම හරි විභාගය ඉවර උනාට පස්සේ මාතර ඉඳන් ගෙදර ආවේ හරිම මහන්සියෙන්. මේ දවස්වල තියෙන රස්නෙත් එක්ක එළියට බහිනවා කියන්නෙම ඇඟට හරිම අපහසුයි. ඉතින් ගෙදර ආපු හැටියෙම කලේ ගෙදර තිබුණු කොමඩු ගෙඩියකින් බීම එකක් හදපු එක. ඒක ටිකක් සිසිල් කරලා බිව්වම ඇත්තටම ඇඟට දැනුනේ පුදුම සනීපයක්.
ඉතින් ඔන්න ඔය විදියට මගේ දීර්ඝ සති අන්තය ගෙවුනා. අද ඉදන් ආයෙමත් ඊළඟ දවසේ විෂයන් වලට සූදානම් වෙන්න ඕන.
අපිට මොන ප්‍රශ්නවලට මුහුණ දෙන්න සිදුවුනත් ඒ හැම ප්‍රශ්නයක්ම අත්දැකීමක් කරගෙන ඒ දේවල්වලට මුහුණ දෙන ගමන් අපේ කටයුතු කරගන්න එක තමයි ජීවිතය කියන්නේ.
ඉතින් මේ පටන් ගත්ත සතිය සියලුම කටයුතු සාර්ථකව කරගන්න පුළුවන් වෙන යහපත් සතියක් වෙන්න කියන එකයි මගේ එකම ප්‍රාර්ථනය.