ඔයාලත් ඉඳුණු කෙසෙල් විසි කරනවද? 🍌❌🚮

හැමෝම හොදින් කියල හිතනවා. හුඟක් දවසකින් අලුත් කෑමක් හදන්න බැරි උන නිසා අහක දාන දෙකින් රසවත් කෑමක් හදන්න හිතුනා.

සාමාන්‍යයෙන් වැඩිපුර ඉදුනු කෙසෙල් කන්න ගොඩක් අය කැමති නෑ. හැබැයි කෙසෙල් කියන්නෙ ගොඩක් ගුණදායක කෑමක් නිසා අහක දාන එකත් ලොකු අපරාදයක්. මොකද කඩෙන් කෙසෙල් 1kg ගන්නකොට රු.200කට වඩා වෙනවා. අපෙ අම්මගෙ කෙසෙල් වගාවේ එක ඵලදාවක් ලගදි ලැබුනා. ඒක ටිකක් ලොකු සීනි කෙසෙල් කැනක්. ඉතින් අහල පහල හැමෝටම බෙදලත් ඉවර කරගන්න නම් බැරි උනා. කොච්චර අමුවෙන් කැන කැපුවත් , කපල දවස් කීපයක් යනකොට කෙසෙල් හොඳටම ඉදෙනවා. ඒ වගේ ගෙදර තිබුන කෙසෙල් ටික ගොඩක් ඉදිල තිබුනා. ඉතින් මට හිතුනා කෙසෙල් අහක දාන්නෙ නැතිව කෑමක් හදන්න. මම මේ රෙසිපි එක හොයාගත්තෙ නම් youtube එකෙන්.

_{A Facebook image}
අවශ්‍ය ද්‍රව්‍ය :

හොඳින් ඉඳුණු කෙසෙල් ගෙඩි කිහිපයක්
සීනි හෝ හකුරු
වැනිලා ස්වල්පයක්
එනසාල්, කරාබු නැටි, අවශ්‍ය ප්‍රමාණයට ලුණු
උණු වතුර ස්වල්පයක්
ගී හෝ සුදු පොල්තෙල්

මුලින්ම භාජනයකට සීනි ටික දමා එය කැරමල් කර ගන්න. එයට අවශ්‍ය ප්‍රමාණයට ලුණු, එනසාල් සහ කරාබු නැටි කුඩුකර එකතු කරගන්න. කැරමල් එක්ක සකස් කරගත්තායින් පසුව එය මද වශයෙන් නිවෙන්න හරින්න.

හොදින් ඉඳුණු කෙසෙල් ගෙඩි කීපය වතුර එකතු නොකර ලෙන්ඩරයට දමා හොඳින් තලපයක් ලෙස සකස් කරගන්න.
භාජනයකට සුදු පොල්තෙල් ස්වල්පයක් දමා එය රත් වෙන්න තබන්න. එයට අඹරා ගත් කෙසල් මිශ්‍රණය එකතු කරන්න. එය මද ගින්නේ හැඳි ගාන අතරතුරේ නැවතත් පොල්තෙල් ස්වල්පයක් එකතු කරන්න. මිශ්‍රණයෙන් විශාල ප්‍රමාණයේ බුබුළු මතුවන තෙක් මෙයාකාරයට හැඳි ගාන්න.

මේ මිශ්‍රණයට හදාගත් කැරමල් මිශ්‍රණයෙන් ස්වල්පය බැගින් එකතු කරමින් නැවතත් මද ගින්නේ හැඳි ගාන්න. විනාඩි විස්සක් පමණ වන විට මේ මිශ්‍රණය තද ගතියක් අතට දැනෙනවා. හරියටම අපි දොදොල් හදනකොට එන මිශ්‍රණය වගේමයි. මේ විදියට විනාඩි විස්සක් පමණ මිශ්‍රණය හැඳි ගාන විට පහත පරිදි දකින්න පුළුවන්. රට ඉඳි, කජු හෝ රටකජු කැබලි කපා එකතු කරන්න පුළුවන්. කජු හෝ රටකජු තිබුණේ නැති නිසා මම මෙයට රට ඉඳි එකතු කරගත්තා.

මේ තලපය ඉන්පසු තෙල් ගාගත් බඳුනකට හෝ මතට දමා හොදින් අතුරා ගන්න. මෙය විනාඩි 10ක් පමණ ශීතකරණයේ තබන්න. ඉන්පසු ලේසියෙන් කෑලි වලට කපා ආහාරයට ගන්න පුළුවන්. අපි මේ හැදුවේ ගොඩක් ප්‍රසිද්ධ බනානා හල්වා (banana halwa).

මේක ටිකක් පැණි රසයෙන් වැඩි ආහාරයක්. ඉතින් පැණි රසට වැඩිපුර කැමති අයට නම් සවස තේ වේලට මෙය ඉතාමත් පහසුවෙන් සකස් කරගන්න පුළුවන්.

කෑම හදන අතර පින්තූර ගන්න මතක් උනත් හදලා ඉවර උනාට පස්සේ නම් පින්තූරයක් ගන්න මට අමතක උනා. ඉතින් ඉදුනු කෙසල් ටිකක් ගෙදර තියෙන වෙලාවක මේ කෑමත් හදලා මටත් රස කියන්න.

ඒ වගේම තමයි කෙසෙල් කාලා, කෙසෙල් ලෙලි ටික නම් විසි කරන්න එපා. මොකද කෙසෙල් කියන්නේ පොටෑසියම් බහුල ආහාරයක්.විශේෂයෙන්ම කෙසෙල් ලෙලි වල පොටෑසියම් අධික ලෙස තියෙනවා. ඉතින් මේ ලෙළි මල් පැල වර්ධනයට ගොඩක් උපකාරී වෙනවා. ඒ නිසා මේ ලෙළි පොඩි කෑලි වලට කපලා මල් පෝච්චි වලට දාන්න පුලුවන්නම් ගොඩක් හොඳයි. එහෙමත් නැත්නම් වතුර භාජනයකට මේ ලෙලි කැබලි එකතු කරලා ටික දවසකින් මේ වතුර මල් පැල වලට එකතු කරන්න පුළුවන්.