පොඩ්ඩන්ගෙ තෑග්ග 💐

මං ළඟට එන පොඩ්ඩන්ගෙන් මම දවසක් ඇහුවා ඔයාල මට කොච්චර ආදරෙයිද කියල. එයාලා හයියෙන් කෑ ගහලා කියනවා ගොඩක් ආදරෙයි කියලා. ඉතින් මං කිව්වා ඇත්තටම මට ආදරේ නම් හැමදාම මාව බලන්න එනකොට එක මලක් හරි අරගෙන එන්න කියලා. ඒ කිව්වා වගේම එදා ඉඳලා අද වෙනකම්ම හැමදාම මාව බලන්න එනකොට පුංචිම පුංචි මලක් හරි එයාල මට අරගෙන එනවාමයි.

මම පොඩ්ඩොන්ට දේවල් කියලා දෙන්නේ සල්ලි බලාගෙන නෙවෙයි. ඒ විදියට මුලින්ම මං ගාවට ආපු පොඩ්ඩ (පොඩ්ඩ කිව්වට මෙයා පොඩ්ඩියෙක්.) ඉස්කෝලේ ඇරිලා අපේ ගෙදරට ආපු වෙලාවේ ඉඳලා ඒ දවසේ ඉස්කෝලෙදි වෙච්ච හැමදේම මාත් එක්ක කියනවා. එයාගේ යාළුවො ගැන කිසිම දෙයක් මම දන්නේ නැති උනත් ඒ හැමදේම මං අහගෙන ඉන්නවා. මට වැඩිපුරම ඕන වුණේ එයාට හොඳ යාළුවෙක් වෙලා, ඉංග්‍රීසි විෂයක් නොවී එයාට ඉංග්‍රීසි උගන්වන්න . ඉතින් දවසේම විස්තර කියන අතරේ සමහර වෙලාවට එයාට නොදැනීම මට අම්මේ කියවෙනවා. ඊට පස්සේ ටික වෙලාවකින් ආයෙමත් කියනවා සොරි ටීචර් මට සමහර වෙලාවට ටීචර්ට කියවෙන්නේ අම්මා කියලා.ඉතින් මට හිනහත් යනවා.

ඉතින් මං ඇහුවා මට කොච්චර ආදරෙයිද කියල . එයා වටපිට බලලා මට මෙහෙම කිව්වා.

"ටීච, ටීචර් අපේ අම්මට කියන්න එපා. හැම ටීචර් කෙනෙක්ගෙම වගේ මම ගුටි කාලා තියෙනවා. සමහර ටීචර්ලා හයියෙන් බනිනවා. මම හරි බයයි එහෙම කෑගහලා බනිනවට. හැබැයි ටීචර් මට බනින්නේ නැති නිසා මං ටීචර්ට හරි ආදරෙයි. ටීචර් අපෙ අම්මා වගේ. "

ඉතින් මං එදා කිව්වා ඔයා ඇත්තටම මට ආදරේ නං හොඳටම වැඩ ටික කරන්න පාඩම් කරන්න. මතක් වෙලා මාව බලන්න එනකොට මලක් ගෙනැත් දෙන්න කියලා. ඊට පස්සේ සතියෙ ඉඳලම මේ පොඩ්ඩ මට මල් ගෙනත් දෙනවා. හරියටම දැන් අවුරුදු දෙකක්. එයා දැන් හතර වසරේ.

ඒ විදියට මට මුලින්ම ගෙනත් දීපු රෝස මල එයාව මතක් වෙන්න මම පොතක් ඇතුලේ දාලා තිබ්බා. හැබැයි ඊට පස්සේ ඒක මට අමතක උනා. මේ ළඟදි මම මේසෙ අස්කරන කොට පොතක් ඇතුලෙ තිබිල ඒ මල බිමට වැටුනා.

මං ඒ මල අරන් තියල ඒ පොඩ්ඩට ඒක පෙන්නුවා. වැඩි වෙලාවක් ගියේ නැතුව ඒ පොඩ්ඩ මගෙන් ඇහුවා
"ටීචර් මේ මං දීපු මලක් නේද?"

මං කිව්වා

" ඔව්. ඔයාට ඒක මතකද?"

එතකොට ඒ පොඩ්ඩා කියනවා

" ඔව් ටීචර්. මම ඒ මල කැඩුවේ පන්ති එන්න කලින් දවසේ. මට අමතක උනොත් කියලා මම ඒක කඩල වතුර එකක දාලා තිබ්බා. මම මුලින්ම ටීචර් කෙනෙක්ට රෝස මලක් දුන්නේ එදා. ඒක හරි සුවද නිසා මට ඒක ටීචටම දෙන්න හිතුනා. "

ඇත්තටම මට හරි ආදරේ හිතුණා. ඒ වගේම ගුරුවරයෙක් වෙච්ච එක ගැන පුදුම සතුටක් දැනුනා. ඉතින් අදටත් එයා මාව බලන්න එනකොට අනිවාර්යයෙන්ම මලක් ගේනවා. දවස ගානේ ලැබෙන ඒ මල් ටික තමයි ඒ දවසට මට ලැබෙන ලස්සනම තෑග්ග.