Excavator වැඩ​ | 5% for SL Charity

මම කලින් දවසක් කිව්වා නෙ අපේ සුදු මැණික ගැනයි එයාගෙ අයියා ගැනයි. සුදු මැණික ඉපදිලා දැන් මාස එකහමාරක් වගේ වෙන නිසා, දැන් අපි එයාව බලන්න එහේ ආවට කමක් නැ කියල අපේ ලොකු අම්මා කිව්වා.

ඒ නිසා ඉතිං අද ඉරිදා නිවාඩු දවසෙ එහෙ යමු කියල අපි සූදානම් උනා, තෑගි එහෙමත් අරගෙන. නංගිට විතරක් තෑගි ගෙනියලා අයියා තරහ උනොත් නිසා, අයියාටත් පොඩි සෙල්ලම් බඩුවක් අරගෙනම ගියේ.

අපේ අම්මානම් අපි දවල් කෑමට ඉන්නෙත් නැතුව එමු කියල තමයි යන්න සූදානම් උනේ. කියනකොටම තාත්තායි මමයි හිනා උනා. අපි දන්නවා ඒක කිව්වට කෙරෙන වැඩක් නෙමෙයි කියලා. අක්කලා නංගිලා එකතු උනාම වෙලාව යනවා දන්නෙ නෑනෙ.

ඔන්න ඉතිං සුදු පුතා එයාට ලැබුන සෙල්ලම් බඩුවත් අරගෙන වැඩ පටන් ගත්තා. හැම කොලු පොඩ්ඩෙක්ටම වගේ මෙයාටත් තියෙනවා, එක එක වර්ග වල වාහන එකතුවක්. කොටන් ගෙනියන ලොරියට සීයා පොඩි දර කෝටු වලින් කොටන් වගයකුත් හදලා දීලා. අපි යනකොට නංගි නිදි. ඔන්න ඉතිං මම අහු උනා අයියාගෙ සෙල්ලම් වලට.

මම එයාට අරගෙන ගියේ බයිසිකලයක් පදින ලමයෙක්. ඒකෙ පිටිපස්සෙ කූඩෙට ගල් පුරවමු කියලා මිදුලට ගියාම, මෙන්න මෙයාගෙ එක්ස්කැවේටර් එක මිදුලෙ. ඒ පාර පුංචිට එක්ස්කැවේටර් එකෙන් පස් කපලා පුතාගෙ වාහනේට පුරවලා දෙන්න උනා😅.

ටික වෙලාවක් සෙල්ලම් කරලා මහන්සි උනාම වාහන ටික පොඩ්ඩක් පාර්ක් කරලා තිව්වා. ටිකකින් ශේප් කරගෙන ගිහින් අත් එහෙම සෝදගෙන ගෙට වෙලා ඉන්න හැදුවට පුතාටනම් එහෙම අදහසක්වත් නැ. ඊලඟට එයා ගෙයක් හදන්න ගත්තා.

දිග ගෙවල් උස ගෙවල් කීපයක්ම හදන්න මාත් සහයෝගය දුන්නා. එයා දොරවල් හයි කරනකම් මට ඒවා අල්ලගෙන ඉන්නත් උනා. බිල්ඩින් බ්ලොක්ස් වලින් එයාම හදාගත්ත මිටියකින් ගහලා දොරවල් හයි කරාට එ ගෙදරට වැඩි ආයුෂ තිබුනෙ නැ. ඒක කඩලා තව එකක් හැදුවා. අන්තිමට ඉතුරු උනේ මෙන්න මෙහෙම පෙට්ටියක් වගේ ගෙදරක්.

ඔය අතරේ සුදු මැණික නැගිට්ටම එයාවත් ටිකක් වඩාගෙන හිටියා. රෝස මලක් වගේ. ආදරේ හිතෙනවා💖. බයෙන් බයෙන් වඩා ගත්තෙත්, සිනිදු අත පයට රිදෙයි කියල බය හිතෙනවා.

එන්න පිටත් වෙනකොට පුතා ඇවිත් පුංචි යන්න එපා කියලා මාව බදා ගත්තා. දාලා එන්න ලෝබ උනත් කරන්න දෙයක් නැනෙ. මම බායි කිව්වම, "බායි කියන්න බැ" කියලත් කියල දුක මූනක් හදාගෙන බලන් හිටියා. පුංචිලා ගොඩක් හිටියත් හැම පුංචිම එයා එක්ක එක්ස්කැවේටර් වැඩ කරන්න එන්නෙ නැනෙ. පොඩි අය එක්ක ඉන්නකොට අපෙත් දවස ගත වෙනවා දැනෙන්නෙත් නැ. දවස ඉවර වෙනකොට හැබැයි හොඳ ගනන් 😂.