නිවාඩු අන්තය | 5% for SL Charity

සුපුරුදු පරිදි සතිය වැඩ කරගෙන ආවට ඊයෙ බ්‍රහස්පතින් දා වැඩ ඉවර වෙද්දි අපේ කට්ටිය, ඔන්න එහෙනම් මේ සතියට වැඩ ඉවරයි කියල තමයි වැඩ නැවැත්තුවෙ. ඒ වචන ඇහෙද්දිත් මාර සැහැල්ලුවක්.

මමත් ලැප් එක ඔෆ් කරල දාලා හොඳ හුස්මකුත් අරගෙන මිදුල පැත්තේ ගියා. මේ ටිකේම උදේ හවස හිටවපු පැල ගැන බැලුවට මිදුල වටේ දාන රවුම දාන්න උනේ නැ. ඉතිං ඒ රවුමත් දාලා, ෆොටො ටිකකුත් ගන්න ෆෝන් එකත් අරගෙන එලියට ආවෙ.

මට ඔයාලට කියන්න බැරි උනා නෙ. මම ඇපල් පැලයක් හදනවා නෙ. මුලින්ම පැල හතරක් තිබුනා. ඒත් තුනක්ම මැරිලා ගියා. මේකත් තව දවස් කියක් තියෙවිද නම් දන්නෙ නැ. ඒත් ට්‍රයි කරල බලන්න ඕන පරිස්සම් කරගන්න.

සිලෝන් ඇග්‍රි කියලා යූ ටියුබ් චැනල් එකක් තියෙනවා. එයාගෙ වත්තෙ ඇපල් හදලත් තියෙනවා. අපි කඩේ දකින කොල පාට පුංචි ඇපල් ලංකාවෙ හැදෙන වර්ගයක්ලු. මුලින් පැලයක් හදාගෙන ඒකෙන් පරම්පර එකක් දෙකක් යනකොට අපේ පරිසරයට අනුවර්තනය වෙනවා කියල තමයි ඒ චැනල් එකේ කිව්වෙ.

අපේ මානෙල් පෝච්චියේ දැන් හැම දවසකම මලක් වරදින්නෙ නැ. හැමදාම උදේට ලස්සනට පිපිල තියෙන දැක්කම හරි ආසා හිතෙනවා. නිල් මානෙල් වගේම රෝස පාට මානෙල් මලකුත් වරදින්නෙ නැ. මෙ දව්ස වල කලින් තරම් අනිත් මල් වර්ග නම් නැහැ. පොඩි පොඩි මල් පැල මැරිලත්. පෑවිල්ල නිසා පොලවත් කාෂ්ඨකයි.

අපේ නාරං ගස් ගැනත් නොකියම බැහැ. මේ දවස් ටිකේ රස්නෙ වෙනුවෙන් සහනයක් දෙන්න පුදුම සේවයක් කරන්නෙ. රස්නෙ වෙලාවට ඕන කෙනෙක්ට මතක්වෙන දෙයක් නෙ බීම කියන්නෙ. මටත් එහෙම තමයි. අම්මට තමයි කරදරේ. අම්මෙ බීම එකක් බොමුද කියලා. ඒ වගේ වෙලාවට අම්මා හා කියන පරක්කුවට දුවලා ගිහින් නාරං කඩාගෙන එනවා. අම්මා නාරං උනත් රසට හදන නිසා හොදයි. නැත්නම් ඒ ඇඹුල නම් දරාගන්න හරි අමාරුයි.

මේ තමයි මම හිටවපු ලූණූ පැල ටික. දැන් කොල ටික කපලා ගන්න පුලුවන් ගානට කොල හැදිලා. ඒක කපාගෙන මොනවා හරි කැමක් හදන්න තමයි තියෙන්නෙ 😁.