ඉර මුහුදට බැස්ස හැටි!

ලස්සන කහ පාට බෝලයක් ගෝල්ෆේස් අහස මැද්දෙන් ඇවිත් මතුවෙනකොට මම ඇවිත් ඒ අහස ලස්සනට පේන තැනක වාඩි වුණා. එතන වාඩි වෙලා ටික වෙලාවක් බලන් හිටියා. චීන හරි ජපන් හරි පෙනුමක් තිබුණ මහත්තයෙක් මට ටිකක් ඉස්සරහින් හිටගෙන ඒක වීඩියෝ කරන ගමන් හිටියා. උඩින් තියෙන ෆොටෝ එකේ ඉන්නෙ එයා තමයි.

ටිකෙන් ටික ඉර අහසෙ පහළට පහළට එන්න පටන් ගත්තා. කවුරුවත් කවදාවත් ඒ වගේ උපමාවක් පාවිච්චි කරේ නැත්තෙ ඇයි කියලා මම එවේලාවෙ හිතුවා. සමහර විට පාවිච්චි කරලත් ඇති. මොකද මම මේ ලෝකෙ හැම කවියක්ම හැම පොතක්ම කියවලා නෑනෙ. ඒක ඒ තරම්ම ලස්සනයි.

මට එක විනාඩියක් වත් මිස් කරගන්නත් ඕනේ වුනේ නෑ ඒ දර්ශනයෙ. ෆොටෝ ටිකක් ගන්න විතරයි ඒක මිස් කලේ. ඒක ඇස් දෙකින්ම දකින්න ඕනෙ එකක්. ටිකෙන් ටික පහළට ඇවිත් ඉර ගිනි බෝලයක් වගේ පෙන්න ගත්තා. අන්තිමේ ටිකෙන් ටික ටිකෙන් ටික මුහුදෙ ගිලිලා ගියා. එයා මේ වෙලාවෙ එළිය අරන් යන්න ඇත්තෙ මොන රටටද කියලා මම කල්පනා කරා. සමහර විට උදේ වුණාම කෑම නොකා ඉස්කෝලෙ යන මල් තියෙන රටකට නොවෙන්න පුලුවන්.

ඊට පස්සෙ තමයි ලස්සනම දර්ශනය.පොඩි කාලයක් ඇතුළෙ අහස එක එක විදියට වෙනස් වුණා.රත්තරන්, තැඹිලි නිල් පාට වළාකුලු ඒක පුදුම ලස්සනක්. ඉදලකින් අතුගාල වගේ. මුහුද අයිනෙ ඉන්න ඔයාලා ගොඩක් අය මේ දර්ශනය නිතරම දකිනවා ඇති. මුලු ගෝල් ෆේස් එකම චිත්‍රයක් වගේ ලස්සනයි. මේ අහසෙ ෆොටෝ එක බලාගෙන මේ විදියට අඳින්න ට්‍රයි කරන්න ඕනෙ කියලා හිතුවට ඒක කරන්න බැරි දෙයක්.

නාරාහේන්පිටට බස් නෑ ඉරිද දවස් වල.ත්‍රීවිල් වල යන එක කරන්න බැරි වැඩක් මේ දවස් වල. ඒ හින්දා අපි දෙන්නට එතනින් එන්න් වුණා. එන්න කලින් ගෝල් ෆේස් එක අයිනෙ තරාදියක් තියන් බර කිරන අංකල් ගෙ තරාදියෙන් අපි දෙන්න බර කිරාගත්තා. අපි දෙන්නා දැනටම අපේ බර දන්නවා වුණත්! දවස සම්පූර්ණ වෙන්න එහෙම දේකුත් තියෙන්න ඕනෙ.

ඉතින් ඉර මුහුදට බැස්සෙ එහෙමයි!