තනියම යන දිග ගමන්! | 5%to SL Charity

කොළඹ ඉඳන් මොණරාගල යනවා කියන්නෙයි මොණරාගල ඉඳන් කොළඹ එනවා කියන්නෙයි එකම පාරක් හරහා වෙන දෙයක් වුණත් ඇත්තටම ඒ දෙක දෙකක්! ගෙදර යනවා කියන්නෙ මේ ලෝකේ තියෙන හොඳම හැඟීම් වලින් එකක්. හේතුව කියන්නද? ගෙදර කියන්නෙ අපිට කිසිම ප්‍රශ්නයක් නැතිව කැතටම ඉන්න පුලුවන් තැන!

මගේ ගොඩාක් යාලුවන්ට මේ වෙනකොට කොව්ඩ් වැළඳිලා හින්දා ටික දවසකට අපිට ගෙදර යන්න කිව්වා. ගෙදර ගිහින් ඔන්ලයින් ක්‍රමයට ඉගෙනගමු කියලත් කිව්වා. ගෙදර ඉන්න එක හොඳයි හැබැයි ඔන්ලයින් හොඳ නෑ. කොහොම වුණත් සිටුවේශන් එකේ හැටියට එහෙම කරන්න වෙනවා.

ටික දවසකට එන්න වෙන හින්දා මගේ බඩු ටික ටිකක් වැඩි වුණා. අතින් කටින් එල්ලගෙන උදේ පාන්දර නැගිටලා උදේ 5.30 විතර වෙනකොට තව යාලුවෝ දෙන්නෙක් එක්ක කොටුවට යාගන්න පුලුවන් වුණා. මාතර, ගාල්ල හරහා යන ඒ ගමනට මම ඇත්තටම හරිම කැමතියි. හයිවේ එක 100% හොඳයි නෙමෙයි. ඒකෙන් අහිංසක සත්තු ගොඩකට, ගස් ගොඩකට ලොකූ අසාධරණයක් වෙලා තියෙනවා.

මොණරු බහුලව ගැවසෙන ප්‍රදේශ වල ප්‍රවේශමෙන් ධාවනය කරන්න කියලා ගහලා තියෙනවා ඔයාලා දැකලා ඇති. සත්තු ගානක් ගස් ගොඩාක් එක්ක ජීවත් වුණ කැළයක් මැද්දෙන් හයිවේ එක හැදුවේ කියලා තාත්තා කියනකොට ඇත්තටම මට ඒ ගැන දුක හිතුණා. ඉතින් ඒ කැලේ මැද්දෙන් හැදුණ පාරෙන් යනකොට මට හැමදාම ඒ සත්තුන්ව, ගහ කොළ මතක් වෙනවා.

මම කැමති සිංදු ගොඩාක් ගොඩාක් තියෙනවා. හැබැයි මම කවදාවත් ඒ සිංදු download කරලා play list එකක් හදාගෙන ඒ සිංදු එපා වෙනකම් අහනවා වගේ වැඩ කරන් නෑ. ඒ වෙලාවට අහන්න ඕනෙ වුණොත් you tube එකට ගිහින් අහනවා. මම හිතන්නෙ බස් එක තමයි ඒකට හොඳම තැන.

වායෝ බෑන්ඩ් එකේ හඳ අල්ලන්න ආස ගමනේ කියන්නෙ මම ආසම සිංදුවක්. ඒත් මේ වචන ටික අහුලගත්තෙ අද එන ගමන්.

නොමැති වු දාක කැමති දේ...
අඳුනගත්තාද හිත අපේ..

ඒ මුලු සිංදුවම හරිම ලස්සනයි!❤ ජනේලෙන් එළිය බලනකොට අහස පේනවා. ඒ අහසට යටින් කොළ පාට වැතිරිලා තියෙනවා. අහසෙ එක එක විදියෙ චිත්‍ර ගොඩාක් තියෙනවා. පුලුන් පුලුන් වගේ වළාකුලු අහස පුරාම විසිරිලා තියෙනකොට මට හිතෙනවා ඒ වෙලාවෙ මම ඉන්නෙ ගොඩාක් සතුටින්, ලොකුවට කියලා. එහෙම හිතෙන් නැද්ද?