එක ගලෙන් කුරුල්ලො දෙන්නෙක්!
එක ගලෙන් කුරුල්ලො දෙන්නෙක් කියන කතාව දන්නවනෙ. යාලුවෙක්ගෙ වෙඩින්ග් එකකට නුවර ගිහින් වැව රවුමෙ ඇවිදලා එන එකත් එක ගලෙන් කුරුල්ලො දෙන්නෙක් වගේ වැඩක් කියලා දැන් මට හිතෙනවා. Batch එකේ මුස්ලිම් යාලුවෙක්ගෙ wedding එකකට අපි ඔක්කෝටම invite කරලා තිබුණ නිසා යාලුවො ගොඩාක් දෙනෙක් ඒකට යන්න තීරණය කරලා තිබුණා. ඉතින් ඒ wedding එක තිබුණෙ නුවර!
තිබුණ එකම නිවාඩු දවස කැපකරගෙන පාන්දර 5.55 ට්රේන් එකෙන් ඉතින් අපි නුවර යන්න පිටත් වුණා. නුවර ගමනද, බෝඩිමට වෙලා නිදාගන්න එකද වටින්නෙ කියලා කෙනෙක් ඇහුවොත් මම තෝරගන්නෙ දෙවෙනි එක. දිව්ය ලෝකෙට ගිහින් එන්න තිබ්බත් මට දැන් වටින්නෙ නිවාඩුව නිදහසේ ඉන්න එක. ඒත් ඒක යන්නම ඕනෙ ගමනක් වුණ නිසා මං උදෙන්ම පිටත් වුණා.
පොඩි වැහිබර ගතියක් තිබුණත් වැස්සෙ නෑ. කොළඹ නුවර පාර වෙනද වගෙම ලස්සනයි. ඉතින් කොහොම හරි පැය තුනකින් වගේ අපි නුවරට ළඟා වුණා. ගොඩ දෙනෙක්ට දළදා මාළිගාවට යන්න ඕනෙ වුණ නිසා අපි මාළිගාවට ගිහින් යන්න තීරණය කළා. මාළිගාව ඇතුළට ගිහින් එන අය එනකම් මම වැව රවුමෙ ඇවිද ඇවිද ඒ ලස්සන බලාගෙන ඉන්න හිතුවා.
නුවර පාරවල් දිගේ ඇවිදිනකොට ඇඟට දැනෙන සනීපය වෙනම එකක්. ඒ සීතල සුළඟට මං ආදරෙයි. වැව රවුම වුණත් හරි ලස්සනයි. ඒකනෙ ඉතින් ඔය තරම් කවි සිංදු වුණත් ලියවෙන්නෙ. ඉරිදා දවස නිසා සෑහෙන්න සෙනඟ!
ෆොටෝස් වල, වීඩියෝස් වල නිතර දකින ලස්සන තැනක ඉන්නවා කියන්නෙත් මැජික් එකක් වගේ දෙයකට කියලා ඒ වෙලාවෙත් හිතුණා. කවි සිංදු වල තියෙන තරම්ම දෙයක් නැති වුණත් නුවර කියන්නෙ ලංකාවෙ තියෙන ලස්සනම නගරෙකට. පිටත් වෙන්න වෙලාව එනකම්ම ඒ අවට බල බල ඉන්න එක මහන්සියක් නොවුණෙ ඒකයි..!
මං දන්නවා ඔයාලටත් නුවර මතකයන් තියෙනවා කියලා..!
මම නම් ආශා පළවෙනි තේරීමට, මොකද ගේ අස්සට වෙලා නිදා ගන්නවට වඩා මම ජීවෙතේ විදින්නේ සොබා සුන්දරත්වය රස විදිමින්. ඉතින් එලියට බැහැල යන ඕනෙම තැනක මම සුන්දරත්වය විදිනවා.
❣️