ගෝල්ෆේස් සිතුවිලි!

සමහර වෙලාවට අපිට තිබුන හීන සහ ඇත්ත ලෝකෙ අතර අනන්තෙක දුරක් තියෙනවා. ඉස්සර දවස් වල සතුට තිබුණෙ මහා විශාල දේවල් වල කියලා මම හිතන් හිටියා. ඒ විශාල හීන නැතිවුණොත් මට සතුටින් ඉන්න බැරිවෙයි කියලා හිතුවා. ඒත් ඇත්තටම වුණේ ඒ මහා විශාලයි කියලා හිතුව හීන නැත්තටම නැති වෙලා ගියාට පස්සෙ ඒ හීන වලින් වැහිලා තිබුණ පුංචි කියලා හිතුව දේවල් වල තියෙන මහා විශාල සතුට මට පේන්න ගත්ත එක!

දැන් මට, වැඩියෙන් පවුඩර් මූණෙ උලාගෙන නාරාහේන්පිටින් බස් එකට නැගලා බොරැල්ල කනත්ත ළඟින් බහින ඉස්කෝලෙ යන පොඩි පැංචෙකුගෙන් මගේ හිතේ සතුටු ලෝකයක් මවා ගන්න පුලුවන්. දෙකේ සීට් එකක වාඩි වෙලා යන පොඩි ඔලු ගෙඩි තුනක් දිහා බලාගෙන සතුටින් හිනා වෙන්න පුලුවන්.

හොඳටෝම මහන්සි දවසටත් ගෝල් ෆේස් එකේ මැදින් තියෙන තණකොල උඩ වාඩි වෙලා නාඳුනන මිනිස්සුන්ට, අහසට, සරුංගල් වලට, එහෙම නැත්නම් අර ලොකූ පාලමට යටින් ඉන්න පුංචි කකුලුවෙක්ට හරි හිතින් කතා කරගන්න පුලුවන්. එහෙම වෙලාවට මට හිතෙන්නෙ මේ ජීවිතේ මට ඕනෙ හැමදේම තියෙනවා කියලා.

සතුටින් ඉන්න වෙලාවට මේ ලෝකෙ මට ඕනෙ හැමදේම තියෙනවා කියලා හිතුවට ඒක වෙනස් වෙන්න යන්නෙත් ටික වෙලාවයි. ඉතින් එදා දවසෙම ඒ ගෝල්ෆේස් එකේදීම පුංචි බබෙක් වගේ රිලා පැංචෙක් කවුරු හරි අයිති කරගෙන තිබුණා. බඩ මැදින් චූටි දම්වැලක් දාලා එයාව නටවනවා, තව අයට වඩාගෙන ෆොටෝ ගහන්න කියලා සල්ලි හම්බ කරනවා. සමහර වෙලාවට එයා හොඳටෝම බයවෙලා කෑ ගැහුවත් එක්ක. මං එතනින් එන්න ආවා.

ඒ අහිංසක බය වුණ මූණ මාව හොඳටම කම්පාවට පත් කළා. අනෙක් කෙනා පිඹුරෙක්. එයාව කරේ දාගෙන තව කට්ටියක් ෆොටෝ ගහනවා. නපුරු පිඹුරෙක් වුණත්, අහිංසක රිලා පැංචෙක් වුණත් ඒ දේවල් සිද්ධ වෙන්නෙ එහෙම නම් මේ ලෝකෙ මට ඕනෙ හැමදේම තියෙන්න විදියක් නෑ!

පුංචි වගේ පේන විශාල දේවල් වල සතුටු විශ්වයක් තියෙනවා වගේම පුංචි වගේ පේන විශාල සිතුවිලි වලත් යහපත් ලෝකයක් තියෙනවා. උදාහරණයක් විදියට ඔබට කරනවාට අකමැති දේ අන් අයට නොකර ඉන්න වගේ සිතුවිල්ලක් අරගෙන ඒක ගහකොළ, සතා සීපාවා, මිනිස්සු, හැමදේකටම වෙනසක් නැතිව ආදේශ වෙන දවසට රිලා පැංචෙක්ට තියා පිඹුරෙක්ටවත් අඬන්න වෙන එකක් නෑ අනේ අපිට පාඩුවේ ඉන්න දෙන්න කියලා!

අපිට හැමවෙලේම ඉතාම හොඳ, කරුණාවන්ත, අවංක, නපුරු නොවන මිනිස්සු වෙන්න බැරි බව ඇත්ත! ඒත් අපිට පුලුවන් උත්සාහ කරන්න! අන්න ඒ උත්සාහය තමයි මේ ලෝකෙ හොඳ තැනක් බවට පත් කරන්න උදව් කරන්නෙ! ඒ උත්සාහය තමයි දුකින් ඉන්න ගහක කොළයක් හරි සනසවන්න පුලුවන් මනුස්සයෙක් බිහි කරන්නෙ!

මට හිතෙන්නෙ එහෙමයි!