Bahala Na!
“BAHALA NA”
Depende sa kontesto ug sa tono sa tingog, lainlain ang mahimong gipasabot sa “bahala na”. Adunay bahala na nga namahala na lang. Bisag walay klaro himuon. Bisag pildi na o walay padulngan, padayon lang gihapon. Bisag kuwang ang pagpangandam, buhatun lang gihapon. Mao kini ang mga “bahala na” nga moutong na lang nga walay kadasig. Apan may “bahala na” nga masaligon ug malaumon. Gani molutaw ang orihinal nga pulong nga “Bathala na”. Gitugyan sa Ginoo ang buhatunon. Mao kini ang kinaiya sa Kristohanon.
Ang dagan sa kinabuhi nga kalibutanon sukwahi sa Kristohanon. “Busa ayaw kamo kabalaka diha sa pag-ingon: ‘Unsay among kan-on? o ‘Unsay among imnon?’ o ‘Unsay among ibisti?’ Kay kining tanan gitinguha sa mga Hentil,” miingon si Jesus. Ang gihatagan og dakong pagtagad sa mga kalibutanong tawo mga butang nga dili angay kalbalak-an “kay ang inyong Amahan nga langitnon nahibalo man nga gikinahanglan ninyo kining tanan.” Midugang si Jesus: “Pangitaa ninyo pag-una ang Gingharian sa Dios ug ang iyang katarong, ug kining tanan ikadugang kaninyo.” Aduna pa siyay praktikal nga punto: ”Busa ayaw kamo kabalaka mahitungod sa sunod nga adlaw, kay ang sunod nga adlaw may iyang kaugalingon nga kabalaka; igo na alang sa matag adlaw ang kalisdanan niini.” Bahala na.
Nabag-o ang kinaiya ni Hari Joash. Nakalimot siya sa maayong buhat ni Pari Jehoiada ngadto kaniya. Gipapatay niya ang anak niini nga si Zacarias nga nagpahimangno kaniya ug sa mga kadagkoan sa Juda nga mobalik ngadto sa Dios. Namahala ug nagpatuyang si Joash. Namahala ug mitugyan si Zacarias ngadto sa Ginoo sa dihang gipatay siya. Nagabaan si Joash.
Unsa may gipasabot nimo iniglitok nimo og “Bahala na”?
Your Steem Buddy,
@nickjon
bahala na, kun dili sigurado o sa panahon sa kalibog, mura na sya ug prayer sa akoa...
Mao gud!