Taprang Ganja di Nanggroe Endatu

Foto source : https://news.okezone.com/read/2017/09/21/338/1780284/ogah-beli-seorang-pria-tanam-7-pohon-ganja-di-rumahnya

Salam ‘alaikom lon puphon kalam
Pujoe keu Tuhan rabbol izzati
Lheuh nyan seulaweut ateuh janjongan
Pang ulee alam derajat tinggi

Kisah lam nanggroe bacut lon karang
‘Oh lheuh reuda prang GAM deungon RI
Jinoe ka makmu nanggroe ka aman
Rakyat dum seunang rahmat Tuhan bi

Mita raseuki hana le mumang
Di gle ngon di blang jeut ta seumula
Tapi na bacut yang han ek ta pham
Pakon na rakan yang pula ganja

Bak bakong ijo ganja jiboh nan
Ladom kheun barang rumput fatima
Na yang kheun cimeng untuk samaran
Ladom hai rakan kheun naleung Cina

Aceh that jithee deungon naleung nyan
Ramee yang tanyong di nanggroe luwa
Malee that hate meunyoe ta keunang
Nanggroe iseulam meusyeuhu ngon ganja

Katrok bak masa jinoe hai rakan
Geutanyoe ta prang barang narkoba
Toke ganja talet ngon parang
Sabu ngon kokain sipak lam paya

Le that mudharat oleh barang nyan
Ureung dum mumang keunong narkoba
Utak jih reuloh, akai jih runyam
Takalon ruman lagee bui tuha

Ureung pi’ep bakong malee hana le
Yang keunong sabee pih leupah gura
Dalam hayalan donya jih pangkee
Sang-sang lam juree lam awan mega

Syuruga donya rasa lam ulee
Padahai bangke pajoh di gata
Asoe nuraka ‘oh watee mate
‘Oh uroe page meunyeusai teuma

Gata yang muda ato baresan
Tanyoe tamuprang deungon narkoba
Bek le tameuhe’ut ganja ngon kokain
Mandum barang nyan musoh agama

Nibak neugara brat that larangan
Keunong kutopan tamong peunjara
Bapak Kapolda meunan geupeusan
Aceh beu-aman dari narkoba

Beudoh syedara jinoe tamuprang
Ta asah parang, rincong ngon suda
Toke ganja, sabu ngon kokain
Tapicrok u blang ta tot ngon suwa

Nanggroe endatu keuneubah Sultan
Tanyoe peutimang beukong agama
Ganja dalam gle mandum tareupang
Tagantoe kacang, campli, halia

Tapula rambong ateuh gle Sawang
Coklat ngon pinang di Nisam Antara
Ta tanom sawet sideh Alue Mbang
Kupi ngon nilam pih meuhai harga

Nanggroe Aceh nyoe le that komoditas
Lam gle Po Tallah dum jeut ta pula
Bek le ta galak keu rumput fatimah
Hanco akheulak reuloh agama

Meunan keuh misi jinoe di Pemkab
Seulama Cek Mat pimpin bak punca
Wabup Sidom Peng ureung that cerdas
Dukungan meutamah dari KPA

Keu pak polisi tabi horeumat
Mandum neubrantas sabu ngon ganja
Neucarueh mandum soe yang terlibat
Beu-abeh neusikat di Aceh Utara

Keude Seunuddon simpang Piadah
Di sinan meugah na Malem Diwa
Aceh tapeudong beukong maruwah
Bek le meulabah deungon narkoba

@nasirage